ދުނިޔޭގައި މިހާތަނަށް ހިނގި އެންމެ ބޮޑު ހަމަނުޖެހުމަކީ، ނުވަތަ އެންމެ ގެއްލުން ދެނިވި ހަނގުރާމައަކީ 1939ވަނަ އަހަރުން 1945ވަނަ އަހަރަށް ކުރިޔަށްދިޔަ ދުނިޔޭގެ ދެވަނަ ބޮޑު ހަނގުރާމައެވެ. މި ހަނގުރާމައިގެ ނަތީޖާއެއްގެ ގޮތުން 70 މިލިއަނާއި 85 މިލިއަނާއި ދެމެދުގެ އަދަދެއްގެ މީހުން ދުނިޔެއިން ނެތިގެން ގޮސްފައި ވެއެވެ. ނުވަތަ މަރުވެފައި ވެއެވެ. މިއީ އޭރުގެ ދުނިޔޭގެ އާބާދީ (1940ވަނަ އަހަރު އަންދާޒާ ކުރެވިފައިވާ 2.3 ބިލއަިން މީހުންގެ އާބާދީ)ގެ %3 މީހުންނެވެ. އެހެންނަނަމެވެސް ހަގުރާމާގައި ދިން ހަމަލާތަކާއި ބަދަލު ކުރެވުނު ހަމަލާތަކުގައި (ހަގުރާމައާއި ސިދާ ގުޅުހުރި ގޮތުގައި) މަރުވެފައިވާ މީހުންގެ އަދަދަކީ 50 މިލިއަނާއި 56 މިލިއަނާއި ދެމެދުގެ އަދަދެއްގެ މީހުންނެވެ. މީގެ އިތުރުން މަރުވެގެން ގޮސްފައިވާ 19-28 މިލިއަން މީހުންނަކީ މި ހަނގުރާމައާއި ގުޅުންހުރި މަރުތަކެވެ. އެއީ މިހަގުރާމައިގެ ނަތީޖާއެއްގެ ގޮތުން ޖެހުނު ބަލިތަކާއި އަދި އޭގެ ފަހުން ކުރިމަތިވެގެންދިޔަ ބަނޑުހައި ހޫނުކަމުގައި ދުނިޔެއިން ނެތިގެންދިޔަ މީހުންނެވެ.

ދުނިޔޭގެ ދެވަނަ ބޮޑު ހަގުރާމަވެސް ހިގައިގެން ގޮސްފައިވަނީ، ޖާމަރނީގެ އޭރުގެ ލީޑަރ އެޑޮލްފް ހިޓްލަރ ޔޫރަޕްގެ ގައުމެއް ކަމުގައިވާ ޕޮލެންޑަށް 1939ވަނަ އަހަރު އެރުމާއި ގުޅިގެންނެވެ. އަދި ޕޮލޭންޑަކީ ފްރާންސްއާއި އިނގިރޭސިވލާތުން ސެކިއުރޓީގެ ޔަގީންކަން ދީފައިވާ ގައުމަކަށް ވުމުގެ ނަތީޖާއެއްގެ ގޮތުން އިނގިރޭސިވިލާތާއި ފްރާންސުން ހިޓްލަރުގެ ޖަރުމަނާއި ދެކޮޅަށް ހަނގުރާމަ އިއުލާން ކުރިއެވެ. މިއީ ދުނިޔޭގެ ދެވަނަ ބޮޑު ހަގުރާމައިގެ ފެށުމެވެ. އެއަށްފަހު އޭރުގެ ޔޫއެސްއެސްއާރު (މިހާރުގެ ރަޝިއާ) އިންވެސް ޕޮލެންޑަށް އަރާ އެގައުމުގެ ބައެއް ޔޫއެސްއެސްއާރުގެ ބާރުގެ ދަށަށް ގެނައެވެ. ނަތީޖާއަކަށް ވެގެންދަޔައީ، 1941ވަނަ އަަހަރުގެ ޖޫންމަހުގެ 22 ވަނަ ދުވަހު ޖަރުމަނާއި ޔުއެސްއެސްއާރާ ދެމެދު ހަގުރާމަ ފެށިގެން ދިއުމެވެ.

އެހެންނަމަވެސް އެހާތަނުންވެސް ދޫ ދިނުމެއް ނެތި، 1940ވަނަ އަހަރު ހިޓްލަރ ނޯވޭއާއި ޑެންމާކުވެސް އޭނާގެ ބާރުގެ ދަށަށް ގެނައެވެ. އަދި ހަމަ އެއަހަރު ޖަރުމަނުގެ ފައުޖުތަކުން ޔޫރަޕްގެ ދެގައުމެއް ކަމުގައިވާ ބެލްޖިއަމްއާއި ނެދަރލޭންޑްވެސް އެމީހުންގެ ބާރުގެ ދަށަށް ގެނައެވެ. ދުނިޔޭގެ ދެވަނަ ބޮޑު ހަގުރާމަ، ވިދުވަރެއް ފަދައިން ފެތުރި، ގައުމުތައް ހަގުރާމައިގެ ތެރެއަށް ވަދެ، މުޅި ޔޫރަޕަށް ފެތުރިގެނދިޔަ ބޮޑުހަގުރާމައަކަށް މިހަގުރާމަވެގެން ގޮސްފައިވަނީ މިހާ ހިސާބުންނެވެ. ޔޫރަޕް ބައިބަޔަށް ބެހި، ޖަޕާނުން އެމެރިކާގެ ޕާރލް ހާބަރއަށް ދިން ހަމަލާއާއިއެކު އެމެރިކާވެސް ދުނިޔޭގެ ދެވަނަ ބޮޑު ހަނގުރާމައިގެ ތެރެއަށްވަންނަ މަޖޫބުރުވެ، ހަގުރާމަ ނިމިގެން ދިޔައީ ޖާޕާނާއި ދެކޮޅަށް އެންމެ ފަހުން އެމެރިކާއިން އެޓޮމިކް ހަތިޔާރުގެ ބޭނުން ކޮށްގެންނެވެ.

މިގޮތުން 1939ވަނަ އަހަރު ފެށިގެންދިޔަ ދުނިޔޭގެ ދަވަނަ ބޮޑު ހަގުރާމައަކީ އޭގެ ފަހުން އައި 6 އަހަރު ދުވަހުގެ ތެރޭގައި، ދުނިޔޭގެ އެގި ގައުމުތައް މި ހަމަނުޖެހުމުގެ ތެރެއަށް ވަދެ، އެތައް މިލިއަން ބައެއްގެ ފުރާނަ ގެއްލި، މީހުންގެ މުދަލަށާއި، ގައުމުތަކުގެ އިންފްރާ ސްޓްރަކްޗަރއަށާއި، އިގްތިސާދީ ގޮތުންނާއި އެނޫން ގޮތްގޮތުންވެސް ދުވަހަކުވެސް ދުނިޔެއަށް ކުރިމަތިވެގެން ގޮސްފައި ނުވާވަރުގެ ގެއްލުމާއި ކެކުޅުން މިހަނގުރާމާގައި ދުނިޔެ ތަޖުރިބާ ކޮށްފައިވާ ހަނގުރާމައެކެވެ.

77 އަހަރު ފަހުން، އަނެއްކާވެސް ޔޫރަޕް ބޮޑު ހަމަނުޖެހުމެއްގެ ތެރެއަށް!

ދުނިޔޭގެ ދެވަނަ ބޮޑު ހަނގުރާމައަށް 77 އަހަރު ފުރިގެން ގޮސްފައި ވާއިރު، ފާއިތުވެދިޔަ މުއްދަތުގައި، ޔޫރަޕްގެ ގައުމުތަކާއި އެމެރިކާ ހިމެނޭ ގޮތުން، ތަފާތު މުއާހަދާތައް އެކުލަވާލާ، ގިނަ ގައުމުތައް އޮތީ ވަރަށް ވަރުގަދަ އެއްބައިވަންތަ ކަމެއްގެ ތެރޭގައެވެ. މިގޮތުން 1993 ވަނަ އަހަރު، އެކުލެވިގެންވާ އެއް ބައްރެއްގެ ގޮތުގައި އޮތް ޔޫރަޕް، 27 ގައުމުގެ މައްޗަށް އެކުލެވޭ ސިޔާސީ ގޮތުންނާއި އިގްތިސާދީ ގޮތުން އެއްގައުމު އަނެއް ގައުމަށް އެއްބާރުލުންދޭ އެއް އިއްތިހާދެއްގެ ގޮތުގައި އުފެދިގެން އައިސްފައި ވެއެވެ.

އެހެންނަމަވެސް އޭގެ ކުރިން، އަސްކަރީގޮތުން އެއްގައުމު އަނެއް ގައުމަށް އެއްބާރުންދޭ އިއްތިހާދެއްގެ ގޮތުގައި ނޭޓޯ (ނޯތު އެޓްލާންޓިކް ޓްރީޓީ އޯގަނިޒޭޝަން)ގެ ނަމުގައި 12 ގައުމުގެ މައްޗަށް އެކުލެވޭ އިއްތިހާދު 1949 ވަނަ އަހަރު ވަނީ އުފަންވެގެން އައިސްފައެވެ. އަދި ފާއިތުވެދިޔަ 70 ވަރަކަށް އަހަރު ދުވަހުގެ ތެރޭގައި މިއިއްތިހާދު ވެގެން ގޮސްފައިވަނީ، އެމެރިކާވެސް ހިމެނޭގޮތުން އުފައްދާފައިވާ، އެޓްލާންޓިކް ސަރަހައްދު ހުރަސްކޮށް ދުނިޔޭގެ އިރުމައްޗަށް ފުޅާވަމުންދާ، ސަލާމަތާއި ގުޅުންހުރި ވަރުގަދަ އިއްތިހާދަކަށެވެ. މިގޮތުން މިއަދު މިޖަމާއަތަކީ ޔޫރަޕްގެ 28 ގައުމެއް ހިމެނިގެން، އަދި އޭގެ އިތުރުން ނޯތު އެމެރިކާއިން ކެނެޑާއާއި އެމެރިކާ ހިމެނޭ ގޮތަށް 30 ގައުމެއްގެ މައްޗަށް އެކުލެވިގެންވާ، މިގައުމުތަކަށް ސަލާމަތާއި ރައްކާތެރިކަން ފޯރުކޮށް ދިނުމުގެ ޒިންމާ މި ޖަމާއަތުގެ އަސާސީ ގަވާއިދުގައި ހިމެނިފައިވާ ޖަމާއަތެކެވެ.

1949 ވަނަ އަހަރު މިޖަމާއަތް އުފެދިގެންދިޔަ އިރު އެންމެ 12 ގައުމުގެ މައްޗަށް އުފެދިފައޮތް މި ޖަމާއަތް ނޯތު އެޓްލާންޓިކް ހުރަސްކޮށް ދުނިޔޭގެ އިރުމައްޗަށް ފުޅާކޮށް، މިއަދު ދުނިޔޭގެ 30 ގައުމު މިޖަމާއަތުގެ މެމްބަރުންގެ ގޮތުގައި އޮތްއިރު، މީގެތެރޭގައި، ކުރީގެ ސޯވިއެޓް ޔޫނިއަންގައި ހިމެނުނު ގިނަ ގައުމުތައްވެސް މިހާރު ވަނީ ހިމެނިގެން ގޮސްފައެވެ. އަދި އެންމެފަހުން، ރަޝިއާއި އިންވެގެން އޮތް ޔޫކުރެއިންވެސް ވަނީ މި ޖަމާއަތުގައި ހިމެނުމުގެ ޝައުގުވެރިކަން ފާޅުކޮށް، ނޭޓޯއިން މެމްބަރު ގައުމުތަކަށް ފޯރުކޮށް ދޭން ޖެހޭކަމަށް އެ ޖަމާޢަތުގެ ގާނޫނު އަސާސީގައި ލިޔެފައި އޮންނަ އަސްކަރީ ރައްކާތެރިކަން ހޯދުމުގެ މަސައްކަތް ފަށާފައެވެ.

ރަޝިއާގެ ހުރިހާވެސް ކަންބޮޑުވުމަކީ މިއީއެވެ. އެގައުމާއި އިންވެގެން، 30 ގައުމުގެ މައްޗަށް އެކުލެވޭ (ނިއުކުލިއަރ ބާރުތައްވެސް ހިމެނޭގޮތުން) ވަރުގަދަ އަސްކަރިޔާއެއް އޮންނާކަށް ރަޝިއާއިން ފުރުސަތު ދޭން ބޭނުމެއް ނުވެއެވެ. އަދި، ތާރީޚީ ގޮތުންވެސް ރަޝިއާއި އެތައް ގުޅުމެއް އޮތް، ކުރީގެ ސޯވިއެޓް ޔޫނިއަންގައި ހިމެނުނު ޔޫކުރެއިން ނޭޓޯގެ މެމްބަރު ގައުމެއްގެ ގޮތުގައި ހިމެނިގެން ދިއުމަކީ ރަޝިއާގެ ސަލާމަތަށް ސިދާގޮތުން އޮތް ބޮޑު ބިރެއްގެ ގޮތުގައި ޕުޓިން ގަބޫލުރައްވައެވެ. އަދި އެއީ ގުރުބާން ނުކުރެވޭނޭ މަސްލަހަތެއްގެ ކަމުގައި ޕުޓިން ވަނީ ވިދާޅުވެފައެވެ.

ނަތީޖާއެއްގެ ގޮތުން، ނޭޓޯ އިތުރަށް ފުޅާވެގެން ދިޔަ ނުދިނުމަށް ރަޝިއާއިން ކުރަމުންދާ މަސައްކަތުގައި، މޮސްކޯގެ ކަންބޮޑުވުންތަކަށް ޑިޕްލޮމެޓިކް ހައްލު ހޯދުމުގެ ގޮތުން ނޭޓޯގެ މެމްބަރެއްގެ ގޮތުގައި ޔޫކުރެއިން ނުހިމަނާނެ ކަމުގެ ޔަގީންކަން ރަޝިއާއިން ބޭނުންވި ނަމަވެސް، އެ ޖަމާއަތުންނާއި އެމެރިކާއިން ރަޝިއާއަށް މިޔަގީންކަން ދޭން ދެކޮޅު ހެދުމާއެކު، ބޮޑު ހަނގުރާމައެއްގެ ބިރުވެރިކަން މުޅި ޔޫރަޕް ބައްރަށް މިހާރުވަނީ ފެތުރިގެން ގޮސްފައެވެ.

މުޅި ދުނިޔެއަށް އިގްތިސާދީ ބޮޑުތި ގޮންޖެހުންތަކެއް!

ރަޝިއާއަކީ މުޅި ޔޫރަޕް ބައްރުގައި އޮތް އެންމެ ވަރުގަދަ އަސްކަރީ ބާރެވެ. އަދި އެގައުމަކީ މިވަގުތު ދުނިޔޭގައި އޮތް ނިއުކުލިއަރ އެންމެ ވަރުގަދަ ބާރުވެސް މެއެވެ. އޭގެ ނަތީޖާއެއްގެ ގޮތުން، ރަޝިއާ އާއި ހަގުރާމަ ކުރުމުގެ ގާބިލްކަމެއް ޔޫކްރެއިންގައި ނެތްކަން ޚުދު ޔޫކުރެއިންވެސް ގަބޫލުކުރެއެވެ. އަދި ރަޝިއާއިން އެގައުމަށް އަރާ އަސްކަރީ ހަމަލާ ދޭން ފަށައިފި ހާލަތެއްގައި، އަމިއްލަ ގައުމުގެ ސަލާމަތަށްޓަކާ އެންމެ ފަހު މީހާއަށް ޖެހެންދެން އެގައުމުގެ ސިފައިން ހަގުރާމަ ކުރާނޭކަމަށް ޔޫކުރެއިންގެ ރައީސް ޒެލެންސްކީ ވިދާޅުވި ނަމަވެސް، ރަޝިއާއިން ޔޫކުރެއިންއަށް އަރާ އެގައުމު ހިފުކަމީ ލޭ އޮހޮރުވުންތަކާއެކު ނަމަވެސް، ރަޝިއާގެ އަސްކަރީ ގާބިލްކަމާ އަޅާ ބަލާއިރު ހައިރާން ވާންޖެހޭ ވަރުގެ ކަމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ނުދެކެއެވެ.

އަދި އޭގެ ނަތީޖާއެއްގެ ގޮތުން، އަދި ޔޫކުރެއިންއަކީ ނޭޓޯގެ މެމްބަރު ގައުމަކަށް ނުވުމާއިވެސް އެކު، ހުޅަނގުގެ ބާރުތަކުން ބުނަމުން އައިސްފައިވަނީ ޔޫކުރެއިންގެ ދިފާޢުގައި އަސްކަރީ އެހީތެރިކަން ފޯރުކޮށްދިން ނަމަވެސް، އެގައުމަށް ސިފައިން ނުފޮނުވާނެ ކަމުގައެވެ.

އެހެންނަމަވެސް، އޭގެ ބަދަލުގައި ރަޝިއާގެ ރައީސް ޕުޓިން ހުއްޓުވުމަށް، ރަޝިއާއި ދެކޮޅަށް އިގްތިސާދީ ގޮތުން ދަތިކުރުމުގެ ހަރުކަށި ފިޔަވަޅު އާޅާނޭކަމުގެ އިންޒާރު ހުޅަގުގެ ގައުމުތަކުން ވަނީ ދެމުން އައިސްފައެވެ. އަދި މި އިންޒާރުތަކާ އެއްގޮތަށް، އިރުމަތީ ޔޫކުރެއިންގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ އެގައުމުގެ ދެސަރަހައްދު ކަމުގައިވާ ޑޮނެސްކްއާއި ލުހާންސްކައަކީ މިނިވަން ދައުލަތެއް ކަމުގައި ކަނޑައަޅާ، މި ދެ ސަރަހައްދުގެ މިނިވަންކަން ރަސްމީކޮށް ރަޝިއާގެ ރައީސް ލާޑިމިރު ޕުޓިންގެ ރިޔާސީ ގަރާރަކުން ބަލައގަތުމާއެކު، ރަޝިއާއި ދެކޮޅަށް ހަޅުގުގެ ގައުމުތަކުން މިހާރުވަނީ އިގްތިސާދީގޮތުން ދަތިކުރުމުގެ ވަރުގަދަ ފިޔަވަޅުތައް އަޅާފައެވެ.

މީގެ ތެރޭގައި، ރަޝިއާގެ އެތައް ކުންފުންޏަކުން އިންވެސްޓު ކޮށްފައިވާ، ރަޝިއާގެ ގުދުރަތީ ގޭސް ޖާރމަނީއަށް ސަޕްލައި ކުރުމަށްޓަކާ ރަޝިއާއިން އަޅާފައިވާ 11 ބިލއަިން ޑޮލަރުގެ ގޭސް ހޮޅީގެ އަގުބޮޑު "ނޯޑް ސްޓްރީމް 2″ ޕްރޮޖެކްޓަށް ހުއްދަ ދިނުން ޖާރމަނީން މިހާރުވަނީ ހުއްޓުމަކަށް ގެނެސްފައެވެ.

އަދި އޭގެ އިތުރުން، ޕުޓިންގެ ގާތް، ރަޝިއާގެ މުއްސަދި މަހުޖަނުންގެ އެސެޓްތައް ފްރީޒްކުރުމުގެ އިތުރުން ރަޝިއާގެ 5 ބޭންކަކާއި ދެކޮޅަށް އިނގިރޭސިވިލާތުންވަނީ ދަތިކުރުމުގެ ފިޔަވަޅު އަޅާފައެވެ. މީގެ އިތުރުން އެމެރިކާއިން ވަނީ ރަޝިއާގެ ސޯވެރިންގ ޑެޓަށާއި، އެގައުމުގެ އިގުތިސާދުގެ މުހިންމު ދެ މުވައްސަސާއަކަށް އަމާޒުކޮށް ދަތިކުރުުގެ ފިޔަވަޅުތައް އަޅާފައެވެ. މީގެ ތެރޭގައި ހިމެނޭ ދެ މުވައްސަސާއަކީ، ރަޝިއާގެ ކޯޕަރޭޝަން ބޭންކު ފޯރ ޑިވެލޮޕްމެންޓް އެންޑް ފޮރިންގ އިކޮނޮމިކް އެފެރާރސް ވެނެޝްއިކޮނޮމްބޭން (VEB) އާއި ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)އާއި، މި ދެ މުވައްސާގެ 42 ސަބްސިޑިއަރީ ކުންފުންޏެވެ.

VEB އަކީ ރަޝިއާއިން އެގައުމަށް ބޭނުންވާ މާލީ ފަންޑުތައް ހޯދުމުގައި މުހިންމު ދައުރެއް އަދާކުރާ މާލީ މުވައްސަސާއަކަށް ވާއިރު، PSB އަކީ ރަޝިއާގެ އަސްކަރިޔާއަށް އެހީތެރިކަން ފޯރުކޮށް ދިނުމުގައި މުހިންމު ދައުރެއް އަދާކުރާ މާލީ އިދާރާއެކެވެ.

ބައިޑްން އިއުލާން ކުރައްވާފައިވާ، އިގްތިސާދީ ދަތިކުރުމުގެ ވިޔަވަޅުތަކުގެ ނަތީޖާއެއްގެ ގޮތުން، ރަޝިއާގެ ކޯޕަރޭޝަން ބޭންކު ފޯރ ޑިވެލޮޕްމެންޓް އެންޑް ފޮރިންގ އިކޮނޮމިކް އެފެރާރސް ވެނެޝްއިކޮނޮމްބޭން (VEB) އާއި ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)އާއި މި ދެ މުވައްސާގެ 42 ސަބްސިޑިއަރީ ކުންފުނިތަކަށް ދެން އިތުރަށް އެމެރިކާގައި ވިޔަފާރިއެއް ނުކުރެވޭނެއެވެ. ނަތީޖާއެއްގެ ގޮތުން މި ދެމުވައްސާ އެމެރިކާގެ ފައިނޭންޝަލް ސިސްޓަމާއި އެކީ ގުޅުން ކެނޑިގެން ދާނެއެވެ.

އަދި އެމެރިކާގައިވާ މި މުވައްސަސާތަކުގެ ހުރިހާ އެސެޓެއް ވަގުތުން ފްރީޒް ކުރުމުގެ އިތުރުން، އެމެރިކާގެ އެއްވެސް ކުންފުންޏަކަށްވެސް އަދި އަމިއްލަ ފަރުދަކަށްވެސް މި މުވައްސަސާތަކާއެކު ވިޔަފާރި ކުރުންވަނީ މަނާ ކުރެވިފައެވެ.

ރަޝިއާގެ މުހިންމު މާލީ ދެ މުވައްސާއާއި ދެކޮޅަށް އެމެރިކާއިން އެޅި ދަތިކުރުމުގެ ފިޔަވަޅުތަކުގެ ނަތީޖާއެއްގެ ގޮތުން، މި މުވައްސާތަކަށް ބައިނަލްއަގުވާމީ ފައިނޭންޝަލް ސިސްޓަމްގައި އެންމެ އަސާސީ މުޢާމަލާތު ކުރުންވެސް ހުއްޓުމަކަށް އަންނާނެއެވެ. އަދި މިފިޔަވަޅުތަކުގެ ނަތީޖާއެއްގެ ގޮތުން، ދިފާއީ ކަންކަމާއި ގުޅުންކުރި ކޮންޓްރެކްޓްތައް ގާއިމްކޮށް ފައިސާ ހޯދުމުގައި އެގައުމަށް ދަތިތަކާއި ކުރިމަތިވެގެން ދިއުމުގެ އިތުރުން، މިހާރު ޔޫކުރެއިންއާއި ދެކޮޅަށް ކުރިޔަށް ގެންދާ ކެމްޕޭއިންތަކަށް ފައިސާ ހޯދުމަށްވެސް ހުރަސްތަކާއި ކުރިމަތި ލާންޖެހޭނެއެވެ.

މީގެއިތުރުން އެމެރިކާއިން އެޅި ދަތިކުރުމުގެ ފިޔަވޅުތަކުގެ ތެރޭގައި، ރަޝިއާގެ ނުފޫޒުގަދަ، ޕުޓިންގެ އަރިސް ބައެއް ފަރާތްތަކާއި އެފަރާތްތަކުގެ އާއިލީ ފަރާތްތައްވެސް ވަނީ ހިމަނާފައެވެ. މީގެތެރޭގައި، ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)ގެ ޗެއާރަމަންއާއި ސީއީއޯ ހިމަނާފައި ވެއެވެ.

އެމެރިކާއިން ދަތިކުރުމުގެ ފިޔަވަޅުތައް އަޅާފައިވާ ރަޝިއާގެ މާލީ ދެ އިދާރާއާއި އަދި އެތަންތަނާއި ގުޅުންހުރި 42 ސަބްސިޑީއަރީއަކީ ރަޝިއާގެ އިގުތިސާދުގައި މުހިންމު ދައުރެއް އަދާކުރަމުން އަންނަ މާލީ އިދާރާތަކެވެ. އަދި މި އިދާރާތަކުގެ އެތައް ބިލިއަން ޑޮލަރުގެ އެސެޓްތައް އެބަހުއްޓެވެ. އަދި ޚާއްސަކޮށް VEB އާއި PSB އަކީ ރަޝިއާގެ އިގްތިސާދުގެ އިތުރުން ރަޝިއާގެ ދިފާއީ ނިޒާމަށް މުހިންމު، ދައުލަތު ދެ ކުންފުންޏެއްވެ.

މިގޮތުން VEB އަކީ 53 ބިލިއަން ޑޮލަރުގެ އެސެޓްތައް ހުރި މާލީ އިދާރާއަކަށް ވާއިރު، މިއީ ރަޝިއާގެ އެންމެ ވަރުގަދަ 5 މާލީ އިދާރާގެ ތެރޭގައި ހިމެނޭ އެއް މުވައްސަސާއެވެ. އެމެރިކާއިން ދަތިކުރުމުގެ ފިޔަވަޅު އަޅާފައިވާ PSBއަކީ ރަޝިއާގެ 8 ވަނައަށް އެންމެ ބޮޑު ބޭންކެވެ. މި ބޭންކަކީ ރަޝިއާގެ ޑިފެންސް މިނިސްޓްރީ އަދި ރަޝިއާގެ ޑިފެންސް ސެކްޓަރއަށް ފައިނޭންސް ކުރާ ބޭންކެވެ.

ރަޝިއާއި ދެކޮޅަށް އަޅާފައިވާ ފިޔަވަލުތަކުގެ އަސަރު ރާއްޖެއަށާއި މުޅި ދުނިޔެއަށް!

ހުރިހާގޮތަކުން ބެލިކަމުގައިވި ނަމަވެސް، އިގްތިސާދީ މާހިރުން ވިދާޅުވާ ގޮތުގައި، ރަޝިއާގެ ބޮޑެތި މާލީ މުވައްސަސާތަކުން ހިންގާ ފައިސާގެ މުއާމަލާތަތައް ހުއްޓުމަކަށް އައިސް، އަދި އޭގެ އިތުރުން ރަޝިއާއިން ޔޫރަޕަށް ސަޕްލައިކޮށްދޭ ގޭހުގެ މިންވަރު ދަށްވެ، ނުވަތަ ހުއްޓުމަކަށް އަތުވެއްޖެ ނަމަ ހަކަތައިގެ އަގަށް ނޭދެވޭ ބޮޑެތި ބަދަލުތައް އައިސް، މިއީ އިގްތިސާދީ މި ދަތީގެ އަސަރު މުޅި ދުނިޔެއަށް ކުރާނޭ ބޮޑެތި ބަދަލުތަކެކެވެ.

އަދި ބަދަލުތަކުގެ އަސަރު ދުނިޔޭގެ ތެލާއި ހަކަތައިގެ ބާޒާރުން މިހާރުވެސް ވަނީ ފެންނާން ފަށާފައެވެ.

އަދި މި ފިޔަވަޅުތަކުގެ އަސަރު މުޅި ދުނިޔެއަށް ކުރަމުން ދާއިރު، ރަޝިއާއަކީ މިވަތު ރާއްޖެއަށް ދެވަނައަށް އެންމެ ގިނައިން ފަތުރުވެރިން އަންނަ މާރކެޓެވެ. އަދި މީގެ އިތުރުން ފާހަގަ ކޮށްލަންޖެހޭ އެންމެ މުހިންމު ކަމަކީ، ޔޫރަޕްގައި ހިގަމުންދާ މި ބޮޑު ހަމަނުޖެހުމުގައި ހިމެނޭ ގިނަ ގައުމުތަކަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމުގެ ތެރޭގައި ހިމެނޭ ގައުމުތައް ކަމުގައިވާތީއެވެ. މިގޮތުން އިނގިރޭސިވިލާތަކީ މި ލިސްޓުގެ 5 ވަނާގައި އޮތް ގައުމަށް ވާއިރު، ޖެހިގެން މި .ލިސްޓުގެ 6 ވަނާގައި ވަނީ އެމެރިކާއެވެ. މިލިސްޓުގެ 9 ވަނާގައިވަނީ ޔޫކުރެއިން އެވެ.

ރާއްޖޭގެ ފަތުރުވެރިކަމުގެ ސިނާއަތަކީ، ސީދާ ގޮތުން ދިވެހި އިގްތިސާދުގައި ޖީޑީޕީގެ ނިސްބަތުން 26.3 އިންސަތަ މިއަދު ހިއްސާ ކުރަމުންދާ ސިނާއަތެކެވެ. ނުސީދާގޮތުން ޖީޑީޕީގެ 70 އިންސައްތަ މި ސިނާއަތުގެ ހިއްސާ ދިވެހި އިގްތިސާދުގައި އެބަ އޮތެވެ. އަދި ފަތުރުވެރިކަމުގެ ސިނާއަތަކީ ދިވެހިރާއްޖެއަށް ވަންނަމުންދާ ބޭރު ފައިސާގެ 90 އިންސައްތަ ވަންނަމުންދާ މައި ދޮރާށިވެސް މެއެވެ.

އެހެންކަމުން، ރަޝިއާއި އާއި ޔޫކުރެއިންއާއި ދެމެދު ބޮޑު ހަގުރާމައެއް ފެށި، އަދި އޭގެ ނަތީޖާއެއްގެ ގޮތުން ޔޫރަޕާއި އެމެރިކާއިން ރަޝިއާއި ދެކޮޅަށް އިގްތސާދީ ދަތިކުރުމުގެ ވަރުގަދަ ފިޔަވަޅުތަކެއް އަޅާ، މި ފިޔަވަޅުތައް އިތުރަށް ވަރުގަދަ ގަދަކުރަމުން ދާއިރު މި ހާލަތުގައި އެގައުމުން ރާއްޖެއަށް ފަތުރުވެރިން ޒިޔާރަތް ކުރުމުގައި މުސްތަގުބަލުގައި ބޮޑެތި ގޮންޖެހުންތަކާ ކުރިމަތި ލާން ޖެހުމަކީ ވަރަށްވެސް އެކަށީގެންވާ ކަމެކެވެ. އޭގެ ނަތީޖާއެއްގެ ގޮތުން، ކޯވިޑު އަދި އަރައިގަނެވިފައި ނުވާ، ފަތުރުވެރިކަމުގެ ނާޒުކު ސިނާއަތު، މިފަދަ ގޮންޖެހުމަކުން ސަލާމަތް ކުރުމަށްޓަކާ ސަރުކާރުން މިވަނީ އަނެއްކާވެސް ޕްލޭންތަކެއް ރާވަންޖެހިފައިކަމީ ކަށަވަރުވެ ޔަގީންވާ ކަމެކެވެ.