5،000 އަށްވުރެ ބޮޑު އާބާދީއެއް އޮންނަ ހއ. ދިއްދޫ ބަނދަރު ބޮޑުކުރުމުގެ މަސައްކަތް ބާރަށް ކުރިއަށްދާކަމަށް މިމަސައްކަތް ކުރާ އެމްޓީސީސީން ބުނެފިއެވެ.
އެމްޓީސީން މިއަދު ބުނެފައިވަނީ ހއ. ދިއްދޫ ބަނދަރު ބޮޑުކޮށް ފުޅާ ކުރުމުގެ މަޝްރޫޢުގެ ދަށުން ބަނދަރުގެ ޖެޓީ ހެދުމުގެ މަސައްކަތް ވަނީ ފެށިފައިކަމަށެވެ. އަދި އައު ހާބަރ ބޭސިން ފުންކުރުމުގެ މަސައްކަތުގެ 62 ޕަސަންޓް ވަނީ ނިމިފައިކަމަށް އެކުންފުނިން މައުލޫމާތު ދީފައިވެއެވެ.
ހއ. ދިއްދޫ ބަނދަރު ބޮޑުކޮށް ފުޅާ ކުރުމުގެ މަޝްރޫޢުގެ ދަށުން ބަނދަރުގެ ޖެޓީ ހެދުމުގެ މަސައްކަތް ވަނީ ފެށިފައި. އަދި އައު ހާބަރ ބޭސިން ފުންކުރުމުގެ މަސައްކަތުގެ 62 ޕަސަންޓް ވަނީ ނިމިފައި.#MTCCProjects #RayyithungeKunfuni pic.twitter.com/JXhvxnzqf6
— MTCC Plc (@MTCCPlc) February 22, 2022
ދިއްދޫ ބަނދަރުގެ މަސައްކަތް އެމްޓީސީއާ ޙަވާލުކޮށްގެން ފަށާފައިވަނީ 2021ވަނަ އަހަރުގެ ފެބްރުއަރީ މަހުގެ 11ވަނަ ދުވަހުއެވެ. މިހާރު ދިއްދޫގައި ބޭނުން ކުރާ ބަނދަރަކީ ފުޅާމިނުގައި 250 ފޫޓުގެ ބަނދަރެކެވެ. ބަނދަރު ބޮޑުކޮށް ނިމޭއިރު ފުޅާމިނުގައި 350 ފޫޓު ހުންނާނެއެވެ. އަދި ދިގުމިން 600 ފޫޓަށް އިތުރު ވެގެން ދާނެއެވެ.
މި މަޝްރޫޢުގެ ދަށުން 78،000 އަކަމީޓަރުގެ ސަރަހައްދެއް ފުން ކުރުމާއި 616 މީޓަރު ސަރަހައްދެއްގައި ބޭރުތޮށި ލުމާއި 185 މީޓަރު ސަރަހައްދެއްގައި ރިވެޓްމަންޓް ޖެހުމާއި 326 މީޓަރު ސަރަހައްދެއްގައި އެއްގަމު ތޮށި ލުމާއި 4320 އަކަމީޓަރު ސަރަހައްދެއްގައި ޕޭވްމަންޓް ހެދުމާއި ބަނދަރު ބައްތި ހަރުކުރުމަށްވަނީ ހަމަޖެހިފައެވެ. މި މަޝްރޫއަކީ 69.87 މިލިޔަން ރުފިޔާގެ މަޝްރޫޢެކެވެ.
