މާލޭގައި "ޑްރަގު ކެފޭ"ތައް ހިންގާ ގެތަކުން ބަރާބަރަށް ޚިދުމަތް ހޯދަމުންދާ 1118 ދިވެހިން އުޅޭކަމަށް ފުލުުން ބުނެފިއެވެ.
މަސްތުވާތަކެއްޗާ ދެކޮޅަށް ހިންގާފައިވާ އޮޕަރޭޝަންތަކުގެ މައުލޫމާތު ދިނުމަށް ޑްރަގް އެންފޯސް ޑިޕާޓްމަންޓުން އިސްކަންދަރުކޮށީގައި މިހާރު ކުރިއަށް ގެންދާ މީޑިއާ އިވެންޓްގައި އެ ޑިޕާޓްމަންޓްގެ ހެޑް، ސުޕްރިޓެންޑެންޓް އޮފް ޕޮލިސް އަހުމަދު ޝާކިރު ވިދާޅުވީ، "ޑްރަގް ކެފޭ" ނުވަތަ އައްޑާތަކުން އާއްމުކޮށް 1،118 ދިވެހިން ހިދުމަތް ހޯދާ ކަމަށެވެ.
އައްޑާތަކުގައި މަސްތުވާ އަންހެނުންނާއި އުމުރުން ދުވަސްވީ މީހުންގެ ލިސްޓެއް ފުލުހުން ގެންގުޅެއެވެ. މިއަދުގެ އިވެންޓުގައި ފުލުހުން ވަނީ އެ ލިސްޓު މީޑިއާތަކަށް ދައްކާލައިފައެވެ. ޝާކިރު ވިދާޅުވި ގޮތުގައި 2015-2021 ގެ ނިޔަލަށް ޑްރަގް ޓްރެފިކް ކުރުމުގެ ބޮޑެތި މައްސަލަތަކުގައި 146 ބިދޭސީއަކު ބައިވެރިވެފައިވެ އެވެ. އަދި ބަނގުރާ ވިއްކައި، ވިޔަފާރި ކުރުމުގައި 525 ބިދޭސީއަކު ހިމެނޭ ކަމަށް ވެސް އޭނާ ވިދާޅުވިއެވެ.
ފުލުހުން ވަނީ ޑްރަގް ޓްރެފިކިންގެ 67 މައްސަލައެއް މިދިޔަ އަހަރު ތަހުގީގު ކޮށްފަ އެވެ. އެއީ 2020 ވަނަ އަހަރު 54 އަދި 2019 ގައި ޑްރަގް ޓްރެފިކިންގެ 82 މައްސަލައެކެވެ.
އަދި ޑްރަގް ކެފޭތަކަށްދާ މީހުންގެ ތެރެއިން 217 މީހަކީ ރިހިބިލިޓޭޝަން ފަރުވާ ދިނުމަށް ކޯޓްތަކުން އަމުރު ކޮށްފައިވާ މީހުންނެވެ. މި މީސްމީހުން ނިސްބަތްވާ ރަށްރަށްވެސް ފުލުހުން ވަނީ ހާމަކޮށްފައެވެ. އެންމެ ގިނައީ މާލެއަށް ނިސްބަތްވާ މީހުންނެވެ. އަދި ޑްރަގް ކެފޭތަކަށްދާ އަންހެނުންގެ ނިސްބަތްވާއި ފިރިހެނުންގެ ނިސްބަތްވެސް ހާމަކޮށްފައިވެއެވެ.
2015 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް ބަނގުރާ ވިއްކާ ވިޔަފާރި ކުރުމުގައި 525 ބިދޭސީން ހިމެނޭ ކަމަށްވެސް ފުލުހުން ބުންޏެވެ.
މާލޭގައި ކެފޭ އުސޫލުން ވިޔަފާރި ކުރަމުންދާ މީހުން ހުއްޓުވުމަށް ޤާނޫނުގެ ތެރެއިން އެފަދަ ކެފޭ ހިންގާ ގޭގެ ވެރިންނަށް ދައުވާ ކުރުމުގެ މަސައްކަތްވެސް ފުލުހުން ވަނީ ފަށާފައެވެ. އަދި މިދިޔަ އަހަރު ވަނީ އެފަދަ ގެއެއްގެ ވެރިއެއްގެ މައްޗަށް ދައުވާވެސް އުފުލާފައެވެ.
