ވެރިކަން ކުރާ މައި ޕާޓީ އެމްޑީޕީގެ އަންހެނުންގެ ރޫހުގެ ރައީސް ކަމުގެ މަޤާމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް އަދި، ޒުވާނުންގެ ގޮފީގެ ރައީސާގެ މަޤާމަށް ޒާޔާ ފޯމް ހުށަހަޅައިފިއެވެ.

އެމްޑީޕީގެ ހުސްވެފައިވާ އެކި މަޤާމުތަކަށް މެމްބަރުން އިންތިޚާބު ކުރުމަށް، އިންތިޚާބު ބާއްވާނެ ތާރީހުތައް ވަނީ އިއުލާންކޮށްފައެވެ. އެގޮތުން ޗެއަރޕާސަންގެ އިންތިޚާބާއި، އަންހެނުންގެ ރޫހާއި ޒުވާނުންގެ ހިތްވަރުގެ އިންތިޚާބު އަންނަ އޭޕްރީލް މަހުގެ 16ގައި ބޭއްވުމަށް ފާސްކުރިއެވެ. އަދި އިންތިޚާބަށް ހުޅުވާލާފައިވަނީ މިމަހުގެ 15 ވަނަ ދުވަހުއެވެ.

އެމްޑީޕީގެ އަންހެނުންގެ ރޫހުގެ ރައީސާގެ މަޤާމަށް ވާދަކުރައްވާ ރޮޒޭނާއި، ވާދަ ކުރައްވަނީ ސަފާއަތެވެ. މިއިންތިޚާބުގެ ކެމްޕެއިން ފޯރީގައި ކެމްޕެއިން ކުރަމުންދާއިރު، ސަފާއަތުގެ ކެމްޕެއިންގައި އިސްކޮށް ފެންނަނީ ރައީސް ނަޝީދަށް ތާއީދު ކުރާ މީހުންނެވެ. އަދި ރޮޒޭނާގެ ކެމްޕެއިންގައި އިސްކޮށް ހަރަކާތްތެރިވަނީ ރައީސް ޞާލިހަށް ތާއީދު ކުރައްވާ ބޭފުޅުންނެވެ.

އެމްޑީޕީގެ އެތެރޭގެ އިންތިޚާބުތަކުގެ ތެރެއިން އެންމެ ބޮޑަށް ފޯރި ގަދަވެފައިވަނީ، ޕާޓީގެ ޗެއާޕާސަންގެ އިންތިޚާބުގައެވެ. މިއިންތިޚާބުގައި އަންނަ އޭޕްރީމް މަހުގެ 16ގައި ބާއްވާ އެމްޑީޕީގެ ޗެއަރޕާސަންގެ އިންތިޚާބުގައި މިހާތަނަށް ވާދަކުރައްވާނެކަން އިއުލާންކުރައްވާފައި ވަނީ މިދެބޭފުޅުންނެވެ. މިއާއެކު އެމްޑީޕީގައި އިސްކޮށް އުޅުއްވާ ފަރާތްތަކުން ވަނީ ތާޢީދުކުރައްވާ ކެނޑިޑޭޓުންނަށް ކެމްޕެއިން ފަށްޓަވާފައެވެ.

އެމްޑީޕީގެ ޗެއަރޕާސަންގެ މަޤާމަށް ވާދަކުރައްވާނެކަން އިމްތިޔާޒް ހާމަކުރެއްވިނަމަވެސް އިތުރު އެއްޗެއް ވިދާޅެއް ނުވެއެވެ. ރައްޔިތުންގެ މަޖިލީހުގެ މެންބަރުކަން އިމްތިޔާޒް ކުރައްވާތާ މިއީ 3ވަނަ ދައުރެވެ. ޗެއަރޕާސަންގެ މަޤާމަށް ވާދަކުރައްވަން ނިންމެވިކަން ހާމަކުރައްވާ މިނިސްޓަރ ފައްޔާޟް އިސްމާޢީލް ވިދާޅުވީ، އެ މަޤާމަށް ކުރިމަތިލެއްވީ އެމްޑީޕީ އިތުރަށް ހަރުދަނާ ކުރުމަށްކަމަށެވެ. އަމާޒަކީ ޕާޓީ އިތުރަށް ހަރުދަނާކުރެއްވުމާއި އެމްޑީޕީގެ ހެޔޮ ވެރިކަން ދެމެހެއްޓުންކަމަށް މިނިސްޓަރ ފައްޔާޟްް ވިދާޅުވިއެވެ.