އިނގިރޭސި ލީގު ކާމިޔާބުކުރަން އެއީ މެރެތަން ރޭހެއް ފަދަކަމެއް ކަމަށް މެންޗެސްޓަރ ސިޓީގެ ކޯޗު ޕެޕް ގާޑިޔޯލާ ބުނެފިއެވެ.
ލީގު ކާމިޔާބުކުރަން ބޭނުންނަމަ މެޗުތަކުން މޮޅުވާން ޖެހޭކަމަށް މެންޗެސްޓަރ ސިޓީ ކޯޗު ޕެޕް ގާޑިޔޯލާ ވަނީ ބުނެފައެވެ. ލީގުގެ އެންމެފަހުން ލީޑްސް ޔުނައިޓެޑާއި ވާދަކޮށް އެއްވަރުވި މެޗަށްފަހު ވާހަދައްކަމުން ގާޑިޔޯލާ ބުނީ ލީގުގެ ފުރަތަމަ ކޮޅުގައި ޕޮއިންޓުތައް ގެއްލޭކަމަށް ވާނަމަ ލީގު ހޯދުމުގައި ފަހުން ހުރަސްތަކާ ކުރިމަތިލާން ޖެހިދާނެކަމަށެވެ.
އޭނާ ބުނީ ޗެމްޕިއަންސް ލީގު ފެށުމާއެކު މުބާރާތުގައި ވާދަކުރާ ޓީމުތަކަށް މިހާލަތު ކުރިމަތިވާނެކަމަށާއި މިއީ ދުވުމުގެ މެރެތަން ރޭހެއްފަދަ ކަމެއްކަމަށެވެ. ކުރިން ދެފަހަރެއްގެ މަތިން ސީޓީއަށް ލީގު ހޯދައިދިން ކޯޗު ބުނީ ފެނިގެންދިޔައީ ބަލާހިތްވާ ކަހަލަ ބޯޅައެއް ކުޅެވުނު މެޗެއް ކަމަށެވެ.
ގާޑިޔޯލާ ބުނީ އޭނާއަށް ލީޑްސް ފަރާތުން ފެނުނު އެންމެ ގަޔާވާކަމަކީ މޮޅުވާން ކުޅުންތެރިން ކުރި މަސައްކަތް ކަމަށާއި ލީޑްސް ފަރާތުން މޮޅުކުޅުމެއް ފެނުނުކަމަށެވެ. މި ނަތީޖާ އެކު ސިޓީ އޮތީ ހަތަރު ޕޮއިންޓާއެކު ތާވަލުގެ 13 ވަނައިގައެވެ.
