ރާއްޖޭގެ ޖަލުތަކުގައި ހުރި މައްސަލަތައް ހައްލު ކުރުން ބިލާހަކަށްވެ ނިމިއްޖެ ކަމުގައި ކުރީގެ ޕްރޮސެކިއުޓަރ ޖެނެރަލް މުހުތާޒު މުހުސިން ވިދާޅުވެއްޖެއެވެ.
ފްރޮންޓްލައިންގައި ހަރަކާތްތެރިވާ ޕްރިޒަން އޮފިސަރުން ބޮޑީ ވޯން ކެމެރާ ޓްރަޔަލްއެއްގެ ގޮތުގައި ބޭނުންކުރަން ފެށުމަށް ވަމުންދާ ތައްޔާރީތަކާއި ގުޅިގެން މުހުތާޒު ވިދާޅުވީ މިފަދަ ކަންކަން އީޖާދު ކުރުމަށްވުރެ ޖަލުތަކުގައި ހުރި އެންމެ އަސާސީ ކަންކަން އިސްލާހު ކުރަން މަސައްކަތް ކުރުން މާ ރަނގަޅުވާނެކަމަށެވެ.
ޖަލުތަކުގެ ކަންކަން އިސްލާހު ކުރުމަށް މިސަރުކާރުން ވެފައިވާ ގިނަ ވައުދުތަކާއި، ޕްލޭންތަކުގެ މަތީން ހަނދާންނެތި އެކަންކަން ބިލާހަކަށް ވެފައިވާއިރު، ފެނިގެންދަނީ ޒިންމާ އުފުލައި ޖަލުތަކުގެ ކަންކަން އިސްލާހު ކުރުމަށް ތިއްބެވި ފަރާތްތައް ފެއިލްވެފައިވަ މަންޒަރުކަމުގައި މުހުތާޒު ވިދާޅުވިއެވެ. ދެންވެސް ޖަލުތަކުގެ ހާލަތާއި ގުޅިގެން ވާހަކަ ދައްކާ އަޑު އިވިގެންދާނީ 2023 ގައިކަމަށް މުހުތާޒު ވިދާޅުވިއެވެ.
ތިކަމަށް ކުރާޚަރަދު އިދާރީ އިންތިޒާމްތަކާއި ޖަލު ކޮމިޝަނުގެ އިސްލާހީ ހުށަހެޅުންތައް ތަންފީޒުކުރުމަށް ޚަރަދުކުރުން ކީއްތޯ؟ ޖަލުގެ ކަންކަން އިސްލާހުކުރުން ބިލާހަކަަށްވެ ނިމިއްޖެ. ޒިންމާގައި ތިބި ފަރާތްތައް ޖަލު އިސްލާހު ކުރުމުގައި ފެއިލްވެއްޖެ. ދެން ޖަލުގެ ވާހަކަ ދެކެވޭނީ 2023 ގައި.
– މުހުތާޒު ވިދާޅުވިއެވެ.
މުހުތާޒު މިހެން ވިދާޅުވީ ކޮންމެ ކޮންމެ ރިޔާސީ އިންތިޚާބަކާއި ދިމާކޮށް، ޖަލުތަކުގެ ހާލަތު ރަނގަޅު ކުރުމަށް އެތައް ވައުދެއް ސިޔާސީ އިސް ފަރާތްތަކުން ވަމުންދާތީ އެކަމަށް އިޝާރާތް ކުރައްވައެވެ.
ރާއްޖޭގެ ޖަލުތަކުގައި ޝަރީއަތެއްނެތި ތިބި މީހުންގެ މައްސަލަތައް އަވަސް ކުރުމަކީ ވަރަށް މުހިންމު ކަމެއްކަމަށާއި، ޖަލުތަކުގެ ހާލަތު ރަނގަޅު ކުރަން ގިނަ މަސައްކަތްތަކެއް ކުރަންޖެހޭ ކަމުގައި އދ.ގެ ވޯކިން ގްރޫޕް އޮން އާބިޓްރަރީ ޑިޓެންޝަނުންވެސް ވަނީ ޖަލުތަކުގެ ހާލަތު ބެލުމަށްފަހު މިދިޔަ އަހަރު އެކުލަވާލި ރިޕޯޓުގައި ބުނެފައެވެ. ޖަލުތަކުގައި ޝަރީޢަތެއް ނެތި 4 އަހަރު ވަންދެންވެސް ބައެއް މީހުން ތިބިކަމަށާ، މިމީހުންގެ ހައްގުތައް ކަށަވަރު ކުރުމަށް، ޝަރީއަތް އަވަސް ކުރުމަކީ މުހިންމު ކަމެއްކަމުގައި އދގެ ވޯކިން ގްރޫޕުން ވަނީ ބުނެފައެވެ.
ހަމަ މިއާއެކު ޖަލުތަކުގައި ތިބި ޤައިދީންނަށް ފޯރުކޮށްދޭންޖެހޭ ހައްގުތަކުގެ ތެރޭގައި ހިމެނޭ ވަކީލުންގެ ހައްގާއި، ބޭސް ފަރުވާގެ ޚިދުމަތް ދިނުމުގައި މައްސަލަތަކާއި، ޖަލުތައް ފުރިބާރުވެ އެކަށީގެންނުވާވަރަށް ޖަލުގޮޅިތަކުގައި މީހުންތިބި ކަންވެސް އދ.ގެ ވޯކިން ގްރޫޕުން ވަނީ ފާހަގަކޮށްފައެވެ.
