ކުރީގެ ރައީސް ޔާމީންގެ ވެރިކަމުގައި އަޅާފައިވާ ހިޔާ ފްލެޓްތައް ފިނިޝިންގެ މަސައްކަތް ނިންމުމަށްފަހު ބައެއް ފަރާތްތަކުން ފްލެޓްތައް ދުވަހު ކުއްޔަށް ދޫކުރަން ފަށައިފިއެވެ.

ހިޔާ ފްލެޓް ކުއްޔަށް ހިފާފައިވާ ފަރާތުން އެހެން ފަރާތަކަށް ތަން ކުއްޔަށް ދޫކުރުމަކީ އެއްބަސްވުމާއި ޚިލާފް ކަމެކެވެ. ހިޔާފްލެޓްގެ ފިނިޝިން ނިންމައި ފްލެޓްގެ ފޮޓޯއަކާއިއެކު އާންމުކޮށްފައިވާ ޕޯސްޓްގައި ފްލެޓް ދުވަހު ކުއްޔަށް ދޭކަން ވަނީ ހާމަކޮށްފައެވެ. އަދި އަގުތައްވެސް އެޕޯޓްސްޓައި ހިމަނާފައެވެ.

ޕޯސްޓުގައިވާ ގޮތުން އޭސީ ކޮޓަރިއެއް ދޫކުރަނީ ދުވާލަކު، 650 ރުފިޔާ އަށެވެ. އަދި އޭސީ ނުކޮށް ހުރި ކޮޓަރި ދޫކުރަނީ ދުވާލަކު 450 ރުފިޔާއަށެވެ. މިކަމާ ގުޅިގެން ޕްލޭނިން މިނިސްޓްރީން ބުނީ ކަމާ ބެހޭ އިދާރާތަކާއި ގުޅިގެން އެއީ ސައްހަ ޕޯސްޓެއްތޯ ބަލަމުންދާ ކަމަށެވެ.

ފްލެޓްތައް ކުއްޔަށް ދޫކުރަން ޖަހާފައިވާ ނަންބަރަށް ގިނަ ބަޔަކު ދަނީ ގުޅައި، ފްލެޓް ބުކް ކުރަމުންނެވެ. އަދި މިހާރުވެސް އެތަން ވަނީ ބުކް ކޮށްފައިވަކަމަށާއި، ތަން ހުސްވާނެ ތާރީހެއް ނޭގޭކަމަށް އެނަންބަރަށް ގުޅާލުމުން ވަނީ ބުނެފައެވެ.

ހިޔާ ފްލެޓަށް، 25 އަހަރަށް ބަހާލައިގެން މަހަކު 7،500ރ. އަދި ސާވިސް ފީގެ ގޮތުގައި 1،000ރ. ދެއްކުމަށް ސަރުކާރުން ކަނޑައަޅާފައިވާއިރު އެ ކުލި ބޮޑުވެގެން ޝަކުވާކުރުމަށް ފަހު ދެ ކޮޓަރީގެ އެ ތަންތަން ކުއްޔަށް ދޫކުރަން ފާޅުގައި އިސްތިހާރުކޮށްފައި ހުރީ އެންމެ ކުޑަކޮށް ވެސް 10،000ރ. އަށެވެ.

ހިޔާ ފްލެޓްގެ އެގްރީމެންޓުގައިވާ ގޮތުން ފްލެޓްގެ އަގު ދައްކާ ނިމުމުގެ ކުރިން ފްލެޓް ކުއްޔަށް ދެވޭނީ ނުވަތަ ވިއްކޭނީ ކަމާގުޅޭ އިދާރާތަކުން ހުއްދަ ހޯދައިގެންނެވެ. ނޫނީ އެފަރާތްތަކުގެ އަތުން ފްލެޓް އަތުލުމުގެ ހައްގު ޕްލޭނިން މިނިސްޓްރީއަށް ލިބޭނެ އެވެ.