ވ.އަތޮޅު އާރަށް ކުއްޔައްދިނުމުގެ މުޢާމަލާތުގައި ކުރީގެ ރައީސް ޔާމީނަށް ރިޝްވަތުގެ ގޮތުގައި އެއްމިލިޔަން ޑޮލަރު ދިންކަމަށް ބުނެ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ކުރާ ދައުވާއަށް އޭނާ މިއަދު އިންކާރުކޮށްފިއެވެ.
އާރަށުގެ މައްސަލާގައި ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށްކުރީ މަނީ ލޯންޑަރިންގއާއި ރިޝްވަތު ޤަބޫލުކުރުމުގެ ކުށުގެ ދަޢުވާއެވެ. ރައީސް ޔާމީންގެ އިތުރުން، މިމައްސަލާގައި ވ.ފެލިދޫ ހަނދުވަރީގެ ޔޫސުފް ނަޢީމްގެ މައްޗަށްވެސް ވަނީ ދަޢުވާ އުފުލާފައެވެ. އޭނާގެ މައްޗަށްކުރީ ރިޝްވަތު ދިނުމުގެ ކުށުގެ ދަޢުވާއެވެ.
ދައުލަތުން އުފުލި ދަޢުވާގައިވަނީ ޓުއަރިޒަމް މިނިސްޓްރީއާއި، އެމްއެމްޕީއާރްސީ މެދުވެރިކޮށް، ރިސޯޓް ހެދުމަށް ވ.އާރަށް ކުއްޔަށް ނެގުމުގެ މުޢާމަލާތުގައި އޭރުގެ ރައީސުލްޖުމްހޫރިއްޔާގެ ހައިސްޔަތުން، ރައީސް ޔާމީން މަޤާމުގެ ނުފޫޒު ބޭނުންކުރައްވައިގެން ރިޝްވަތުގެ ގޮތުގައި އެއް މިލިއަން ޔޫއެސް ޑޮލަރު ނަންގަވައި ލޯންޑާ ކުރައްވާފައިވާ ކަމަށެވެ.
މިއަދުގެ އަޑު އެހުމުގައި ދައުވާއަށް އިންކާރުކޮށް، ޔޫސުފް ނައީމްގެ ވަކީލުން ބުނީ އޭނާ ޔާމީނަށް ރިޝްވަތު ދިން ކަމަށް ބުނެ ދައުލަތުން ދައްކާ ދެ މުއާމަލާތުގައި އެއްވެސް ގުޅުމެއް ނެތް ކަަމަށެވެ. އަދި އެކަން އެ މައްސަލާގެ ތެރެއިން ސާބިތުކޮށް ދޭނެ ކަމަށް އެ ވަކީލުން ބުންޏެވެ. ދިފާއުގައި ހެކި ހުށަހަޅަން ޔޫސުފް ނައީމްގެ ފަރާތުން އެދުނީ 30 ދުވަހުގެ މުއްދަތެއް ދިނުމަށެވެ. އެ މައްސަލަ ބައްލަވާ އިސް ގާޒީ އަހުމަދު ޝަކީލް ނިންމެވީ ހަތް ދުވަހުގެ ފުރުސަތެއް އެކަމަށް ދެއްވުމަށެވެ.
މިއަދުގެ އަޑު އެހުމުގައި ރައީސް ޔާމީން ވަނީ އަނެއްކާވެސް މިޝަރީއަތް ލައިވް ކޮށް ދިނުމަށް އެދިފައެވެ. ޝަރީއަތް ލައިވް ކުރުމުގައި އިސް ގާޒީގެ ނިންމެވުމަށް ބަދަލެއް ނުގެންނަވައެވެ. ކުރިން ވެސް ވިދާޅުވި ގޮތަށް ލައިވް ކުރާނީ ވަސީލަތްތައް ހަމަވުމުން ކަމަށް ވިދާޅުވިއެވެ.
އިސް ގާޒީ ދެން ވިދާޅުވީ ޔާމީންގެ ފަރާތްޕުޅުން ތަކުރާރުކޮށް އެ ކަމަށް އެދިވަޑައިގަންނަވާތީ އެ މަސައްކަތް ވީހާވެސް އަވަހަށް ހަމަޖައްސަން މަސައްކަތް ކުރައްވާ ކަމަށާއި ދެން އޮންނަ އަޑުއެހުމެއް ލައިވް ކުރަން މަސައްކަތް ކުރައްވަމުން ގެންދަވާ ކަމަށެވެ. ދެން އަޑުއެހުމެއް އޮންނާނީ އަންނަ މަހު ހަވަނަ ދުވަހު ކަމަށް ގާޒީ ވިދާޅުވިއެވެ. އެ އަޑުއެހުމުގައި ކުރިއަށް ގެންދަން ތާވަލުކޮށްފައި ވަނީ ދައުލަތާއި ދައުވާ ރައްދުވާ ދެ ފަރާތުން ހުށަހަޅާ ހެކިތައް ހާމަކުރުމެވެ.
ރިޝްވަތުގެ ދައުވާ ސާބިތުވެއްޖެ ނަމަ މަދުވެގެން ތިން އަހަރުގެ ޖަލު ހުކުމެއް އަންނާނެއެވެ. އަދި ޔާމީނަށް ކުރާ މަނީ ލޯންޑްރިންގެ ދައުވާ ސާބިތުވެއްޖެ ނަމަ މަދުވެގެން ފަސް އަހަރުގެ ޖަލު ހުކުމެއް އަންނާނެއެވެ.
