އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި)އަށް އެމްޑީޕީގެ ރައީސް މުހައްމަދު ނަޝީދުގެ ބައްޕައާއި، މަންމަ ތާއީދު ކުރައްވަން ނިންމަވައިފިއެވެ.
މިއިންތިޚާބަކީ އެމްޑީޕީގެ ތެރޭގައި ރައީސް ނަޝީދާއި، ރައީސް ޞާލިހުގެ އޮތް ވާދަވެރިކަން ވަރަށް ބޮޑަށް ފެނިގެންދާނެ އިންތިޚާބެއްކަމަށް ގިނަ ބަޔަކު ބުނަމުންދާއިރު، މިއިންތިޚާބުގައި އެމްޑީޕީގެ އިސްބޭފުޅުން ތިއްބެވި ގޮތްވެސް މަޑުމަޑުން ދަނީ ހާމަވަމުންނެވެ. އެގޮތުން ރައީސް ނަޝީދުގެ ތާއީދު އިންތިއަށް އޮތްކަން އެންމެ ބޮޑަށް ހާމަވެގެން ގޮސްފައިވަނީ އެމަނިކުފާނުގެ މަންމައާއި، ބައްޕަވެސް އިންތިގެ ފޯމްގައި ސޮއިކޮށް، ތާއީދު އޮތްކަން ހާމަކުރުމުންނެވެ.
އެމްޑީޕީގެ ޗެއަރޕާސަންގެ މަޤާމަށް އިންތި ވާދަކުރައްވަން ފޯމް ހުށައެޅުއްވިއިރު، އިންތިގެ ހެކިވެރިންގެ ގޮތުގައި ފޯމްގައި ސޮއިކުރައްވާފައިވަނީ ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ އާއި، އުނގޫފާރު ދާއިރާގެ މެންބަރު މުޙައްމަދު ވަޙީދު (ވައްޑެ)އެވެ.
Enmenge thaaeedha loebbaa eku, #InthiAaiEku pic.twitter.com/HYpaSaFGdc
— Shaah (@YoosufShaah) February 15, 2022
އެމްޑީޕީގެ ޗެއަރޕާސަންގެ އިންތިޚާބުވެ ވާދަވެރިކަން ބޮޑުވެފައިވަނީ މިއީ ރައީސް ނަޝީދު ފެކްޝަނުންނާއި ރައީސް ޞާލިޙްގެ ފެކްޝަނުން ވާދަކުރާ އިންތިޚާބަކަށް ވުމުންނެވެ. އިންތި މި އިންތިޚާބުގައި ވާދަކުރައްވަނީ ރައީސް ނަޝީދުގެ އެދިވަޑައިގަތުމަކަށްކަމަށް މަޢުލޫމާތު ލިބިފައިވެއެވެ.
އިންތިގެ އިތުރުން ދެން މި އިންތިޚާބުގައި ވާދަކުރައްވަނީ އިކޮނޮމިކް މިނިސްޓަރ ފައްޔާޟް އިސްމާޢީލެވެ. ފައްޔާޟްއަކީ ރައީސް ޞާލިޙްގެ އަރިސް ބޭފުޅެކެވެ.
ފައްޔާޟަކީ ރައީސް ޞާލިހު އެންމެ އިތުބާރު ކުރައްވާ އެއްވަޒީރެވެ. މިނިސްޓަރު ކަމުގެ މަޤާމުން ފައްޔާޟު ވަކިކުރުމަށް އެމްޑީޕީގެ ރައީސް ނަޝީދު މަސައްކަތް ކުރެއްވުމުންވެސް ސީދާ ރައީސް ޞާލިހު ވަނީ ފައްޔާޟުގެ ދިފާއުގައި ނުކުންނަވައި ފައްޔާޟަށް ފުރިހަމަ އިތުބާރު ކުރައްވާކަމަށް ވިދާޅުވެފައެވެ.
