މާލީ ބަޔާން ހުށަހަޅަން ޖެހޭ ފަރާތްތަކުން ދޮގު މައުލޫމާތެއް ދީފި ނަމަ މަގާމުން ވަކިކޮށް ދެ އަހަރަށް ޖަލަށް ލެވޭ ގާނޫނެއް އެކުލަވައިލަން ރައްޔިތުންގެ މަޖިލީހަށް ހުށަހަޅައިފިއެވެ.
"މާލީ އަދި އެހެނިހެން މަސްލަހަތު ހާމަ ކުރުމުގެ ބިލު" ގެ ނަމުގައި މި ބިލް ހުށައެޅުއްވީ ރައްޔިތުން މަޖިލީހުގެ ނާއިބު ރައީސް އަދި ގަލޮޅު އުތުރު ދާއިރާގެ މެމްބަރު އިވާ އަބްދުﷲ އެވެ.
މާލީ ބަޔާން ހުށަހަޅަން ޖެހޭ ފަރާތްތަކާއި ހުށަހަޅަން ޖެހޭ މައުލޫމާތާއި އަދި އެ މައުލޫމާތުތަކުގެ ސައްހަކަން ކަށަވަރު ކުރުމަށް އަމަލު ކުރަން ޖެހޭނެ ގޮތް ބަޔާން ކުރާ އެ ބިލުގައިވާ ގޮތުން އެއްވެސް ފަރާތަކުން މާލީ ބަޔާނުގައި ދޮގު މައުލޫމާތެއް ހިމެނުމަކީ ކުށެކެވެ. އެ ކުށުގެ އަދަބަކީ އެ މީހަކު މަގާމުން ވަކި ކުރުމާއި ދެ އަހަރަށް ޖަލަށް ލުން އަދި މައްސަލައިގެ ކުޑަބޮޑު މިނަށް ބަލައި 500،000ރ. އިން ޖޫރިމަނާ ކުރުން ކަމަށް އެ ބިލުގައި ބުނެފައިވެއެވެ.
އެ ބިލުގައި ބުނީ ދޮގު މައުލޫމާތު ދޭ ފަރާތެއްގެ މައްސަލަ ތަހުގީގު ކުރުމަށް ކަމާބެހޭ މުއައްސަސާއަކަށް ފޮނުވަން ޖެހޭނެ ކަމަށާއި އެ މައްސަލަ 30 ދުވަހުގެ ތެރޭގައި ތަހުގީގުކޮށް ޝަރީއަތަށް ހުށަހަޅަން ޖެހޭނެ ކަމަށެވެ. އަދި ކޯޓުތަކުން ވެސް 60 ދުވަސް ތެރޭގައި އެ މައްސަލާގައި ހުކުމް ކުރަން ޖެހޭނެ ކަމަށް ވެސް އެ ބިލުގައި ބުނެފައިވެއެވެ.
މާލީ ބަޔާން އޮޅުވާލައި މަކަރު ހަދައިފިނިމަ ކަނޑައަޅާފައިވާ އަދަބުތަކާއި ޖޫރިމަނާތައް:
– ބަޔާނެއްގެ ސައްހަކަން ކަށަވަރުކުރުމާއި އަންގާ އެންގުމަކާއި ހިލާފުވެއްޖެނަމަ 100،000ރ ( އެއްލައްކަ ) ރުފިޔާ ޖޫރިމަނާކުރެވޭނެ. ތަކުރާރުކުރާ ކޮންމެ ފަހަރަކު ގިނަވެގެން 500،000ރ ( ފަސްލައްކަ ) ރުފިޔާއިން ޖޫރިމަނާކުރެވޭނެއެވެ.
– ސުންގަޑި ހަމަވާފަހުން މަހެއްގެ ތެރޭގައި ބަޔާން ހުށައަޅައިފިނަމަ 100،000ރ ( އެއްލައްކަ ) ރުފިޔާއިން ޖޫރިމަނާކުރެވޭނެ. ތަކުރާރުކުރާ ކޮންމެ ފަހަރަކު ގިނަވެގެން 500،000ރ ( ފަސްލައްކަ ) ޖޫރިމަނާކުރެވޭނެއެވެ.
– ސުންގަޑި ހަމަވާތާ އެއްމަސްދުވަހުގެ ތެރޭގައި ބަޔާން ހުށަނާޅައިފިނަމަ ގިނަވެގެން 500،000ރ ( ފަސްލައްކަ ) ރުފިޔާއިން ޖޫރިމަނާ ކުރެވޭނެ.
މާލީ ބަޔާންތަކުގެ ސައްހަކަން ކަށަވަރު ކުރުމުގެ ގޮތުން މުދަލާއި ފައިސާ ލިބޭ ގޮތާއި އެކި މުއްދަތުގައި ހުށަހަޅާފައިވާ ބަޔާންތަކުގައި ހިމެނޭ މައުލޫމާތު އަޅާ ކިޔަން ޖެހޭނެ ކަމަށް ބިލުގައި ބުނެފައިވެއެވެ. އަދި ތިން ވަނަ ފަރާތަކުން ހުށަހަޅާ ޝަކުވާއަކާ ގުޅިގެން ސައްހަކަން ކަށަވަރު ކުރާ މުއައްސަސާ އިން އިސްނެގުމުގެ މަތިން އިތުރަށް ކަންކަން ބަލަން ޖެހޭނެ ކަމަށް ވެސް އެ ބިލުގައި ބުނެފައި ވެއެވެ.
މިގޮތުން ރާއްޖެއާއި ރާއްޖެއިން ބޭރުގައި މިލްކުވާ ނުވަތަ ކުއްޔަށް ހިފާފައިވާ ގޯތި ގެދޮރުގެ ތަފްސީލާއި، ނަގާފައިވާ އަދި ދޫކޮށްފައިވާ ލޯނާއި ރަހުނުކޮށްފައިވާ މުދަލުގެ ތަފްސީލާއި ބޭރުގެ އެއްވެސް ބޭންކެއްގައި ނުވަތަ މާލީ އިދާރާއެއްގެ އެކައުންޓެއްގައި އެއްވެސް ފައިސާއެއް ވާނަމަ އެ ފައިސާގެ ތަފްސީލުތައްވެސް ބަޔާނުގައި ހިމަނަންޖެހެއެވެ.
