ހިޔާ ފްލެޓްތަކުގައި މަސައްކަތްކުރައްވަމުންދާ އަންހެން ސެކިއުރިޓީ އޮފިސަރަކަށް ތޫނު އެއްޗަކުން ހަމަލާދީ ޒަހަމްކޮށްލައިފިއެވެ.
މިހާދިސާ ހިނގާފައިވަނީ މިއަދު މެންދުރު 1:15 ހާއިރުގައެވެ. މިހާދިސާއާއި ގުޅިގެން ހިޔާ ފްލެޓްގެ ސެކިއުރިޓީ ބަލަހައްޓަމުންދާ "ވެށި ކޮމްޕެނީ ޕްރައިވެޓް ލިމިޓެޑް" އިން ނެރުނު ބަޔާނުގައި ބުނެފައިވަނީ މިހާދިސާ ހިނގާފައިވަނީ އެވަގުތު މަސްތުވާތަކެތި ބޭނުންކުރަންމުންދިޔަ ފަރާތެއް ހުއްޓުވުމަށް މަސައްކަތް ކުރުމުން ކަމަށެވެ. އަދި، މިކަން ކޮށްފައިވަނީ ހިޔާގެ މިޓަވަރުން އާންމުކޮށް ނުފެންނަ ފަރާތެއް ކަމަށް ސެކިއުރިޓީ އޮފިސަރު ކަމާބެހޭ ފަރާތްތަކަށް މައުލޫމާތު ދީފައިވާކަމަށެވެ.
ހަމަލާގައި އަނިޔާވި މުވައްޒަފަށް ވަގުތުން ވަގުތަށް ހުޅުމާލެ ހޮސްޕިޓަލުގައި ފަރުވާދެވި، މުވައްޒަފުގެ ހާލު ރަނގަޅުކަމުގައި އެކުންފުނިން ވަނީ ބުނެފައެވެ. މިއަމަލު ހިންގާފައިވާ ފަރާތް ހޯދުމަށް ބޭނުންވާ މަޢުލޫމާތު ފުލުހުންނާއި ހިއްސާކުރެވި އަދި ފުލުހުންގެ އިދާރާއިން މިކަންދަނީ ބައްލަވަމުން ކަމަށާއި، މިފުރުސަތުގައި، އަނިޔާ ލިބިފައިވާ އަންހެން ސެކިއުރިޓީ އޮފިސަރުގެ ހިއްވަރުގަދަކަމާއި ކުޅަދާނަކަން ފާހަގަކޮށް އޭނާއަށްވަނީ ޝުކުރު އަދާކޮށްފައެވެ.
އަދި ހިޔާ ސަރަހައްދުގައި ހިނގަމުންދާ ގަވާއިދާ ހިލާފު އެންމެހާ ކަންކަން ހުއްޓުވައި، ވަގުތުން ވަގުތައް ފިޔަވަޅު އެޅުމަށް ވަނީ ކަމާބެހޭ ފަރާތްތަކާއެކު އިންތިޒާމުތައް ހަމަޖެހިފައިކަމަށް އެކުންފުނިން ބުނެފައިވެއެވެ، މިފަދަ އަމަލުތައް ހުއްޓުވުގައި މެދުކެނޑުމެއްނެތި އެކުންފުނީގެ ހީވާގި މުވައްޒަފުންދަނީ ރެއާއި ދުވާލު މަސައްކަތްކުރަމުން ކަމަށާއި، ހަމައެއާއެކު، ހިޔާސަރަހައްދުގައި ހިނގަމުންދާ މިފަދަ އަމަލުތައް ހުއްޓުވުމަށް މޯލްޑިވްސް ޕޮލިސް ސާރވިސް އާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) އަދި ކިޔާ ސަރަހައްދުގައި ދިރިއުޅުއްވާ ފަރާތްތަކުން ލިބެމުން އަންނަ އެއްބާރުލުމަށް ވަނީ ޝުކުރު އަދާކޮށްފައެވެ.
