ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީއަށް ގުންޑާއިން ފޮނުވައިގެން މަރުގެ އިންޒާރު ދެމުންދާކަމުގައި އޭނާ ވިދާޅުވެއްޖެއެވެ.
މެމްބަރު ރާއީ ގެންދަވަނީ ފަހަކަށް އައިސް އޭނާގެ ދާއިރާގައި ހިމެނޭ ރަށްތަކަށް ސަރުކާރުން ވެފައިވާ ވައުދުތައް ފުއްދުމަށް ހަވާލުކޮށްފައިވާ ކުންފުނިތަކުން އެކަންކަން އެންމެ އެކަށީގންވާ ގޮތަށް ނުކުރާތީ އެކަމުގެ ކަންބޮޑުވުން ފާޅުކޮށް ކުންފުނިތަކުގެ ވެރިންނަށް ވަރަށް ބޮޑަށް ފާޑު ވިދާޅުވަމުންނެވެ.
މެމްބަރު ރާޢީގެ މިފާޑުކިޔުންތަކާއި ގުޅިގެން އޭނާއަށް މަރުގެ އިންޒާރު ލިބެމުންދާކަމަށް މިރޭ ވަނީ ވިދާޅުވެފައެވެ. ރާއީ ވިދާޅުވީ ކިތަންމެ އިންޒާރެއް ގުންޑާއިން ފޮނުވައިގެން ދިނަސް ފަހަތަށް ނުޖެހޭނެ ކަމަށެވެ. މަރު ހިއްޕަވާނީ ކުންފުނިތަކުގެ އެމްޑީން ނޫންކަމަށް ރާއީ ވަނީ ވިދާޅުވެފައެވެ.
ގުންޑާއިން ފޮނުވައިގެން އިންޒާރުދީ މަރާލަން ބުންޏަސް ބިރެއް ނުގަނޭ، ފުރާނަ ހިއްޕަނީ މާތް ރަސްކަލާންގެ. އެމްޑީންނެއް ނޫން.
– ރާއީ ވިދާޅުވިއެވެ.
ޕްރޮޖެކްޓްތަށް ދަނީ ފިނިހަކަ ސްޕީޑްގައި، ސައީދަށް މަންމަނަކަށްވެ ނުހުރެވޭނެ: ރާޢީ
ރާއީ އެންމެ ބޮޑަށް ފާޑު ވިދާޅުވި ކުންފުނިތަކުގެ ވެރިންގެ ތެރޭގައި ފެނަކައިގެ އެމްޑީ ސައީދާއި، އެމްޑަބްލިއުއެސްސީގެ އެމްޑީ ޝާހު ހިމެނެއެވެ. ޚާއްސަކޮށް ފެނަކައިގެ އެމްޑީ މަކުނުދޫ ދާއިރާގައި ވެފައިވާ ވައުދުތައް ފުއްދުމުގައި ފިނިހަކަ ސްޕީޑުގައި އުޅުއްވާތީ ރާއީގެ ފާޑުކިޔުންވަނީ ވަރަށް ބޮޑަށް އަމާޒުވެފައެވެ.
ރައީ ވިދާޅުވީ ބައެއް ރަށްރަށުގައި ފެނަކައިން ހިންގަމުންދާ މަޝްރޫޢުތައް ކުރިއަށްދަނީ ފިނިހަކަ ސްޕީޑުގައިކަމަށެވެ. ކޮންޓްރކްޓު ކުރެވިފައިވާ މުއްދަތު ހަމަވެ، މަސައްކަތް ނުފެށި އެތައް ދުވަހެއް ވެގެންދާއިރުވެސް މިއިންކަމަށާއި މާބޮޑު އަޅާލުމަށް ބަހައްޓަވާ ތަނެއް ނުފެންނަ ކަމަށް ރާއީ ވިދާޅުވިއެވެ. އޭނާ ވިދާޅުވީ މިއީ ތާއަބަދު ބަލަންތިބެވޭނެ ކަމެއް ނޫންކަމަށާއި، ފެނަކަ އެމްޑީ ސައީދަށް ތާއަބަދު މަންމަނަކަށްވެ ނުހުރެވޭނެކަމަށެވެ.
މެމްބަރު ރާއީ ގެންދަވަނީ އޭނާގެ ދާއިރާއަށް ސަރުކާރުން ވެފައިވާ ވައުދުތައް ފުއްދުމުގައި އެކި އިދާރާތަކުން އެންމެ ބޭނުންވާ ސްޕީޑުގައި ކަންކަން ކޮށް ނުދެވޭތީ އެކަމުގެ ކަންބޮޑުވުން ފާޅު ކުރައްވަމުންނެވެ. މިގޮތުން ރާއީގެ އެންމެ ބޮޑު ފާޑުކިޔުން އަބަދުވެސް އަމާޒުވާ އެއްބޭފުޅަކީ ހޯމް މިނިސްޓަރ އިމްރާނެވެ. ރާއީ ވިދާޅުވެފައިވަނީ އިމްރާނަކީ މަޤާމަށް ދަހިވެތި ވެފައިވާ އަމިއްލަ އެދުމުން ފުރިގެންވާ ބޭފުޅެއް ކަމުގައެވެ.
