ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެނޑިޑޭޓް ރާޝިދަށް ވޯޓު ނުދީފިނަމަ ވަޒީފާއިން ވަކިކުރާނެކަމުގެ އިންޒާރު ދީ ނުފޫޒް ފޯރުވިކަމަށް ބުނޭ މައްސަލަ މަޖިލީހުގެ ރައީސް މުޙައްމަދު ނަޝީދު ދިފާޢު ކުރައްވައިފިއެވެ.
ނިމުނު ކޮމަންޑޫ ދާއިރާގެ އިންތިޚާބުގައި އެމްޑީޕީގެ ކެނޑިޑޭޓް ރާޑޯއަށް ވޯޓު ނުދީފިނަމަ ވަޒީފާއިން ވަކިކުރާނެކަމުގެ އިންޒާރު ފެނަކަ މުވައްޒިފުންނަށް ދިން އެ ކުންފުނީގެ ލޮޖިސްޓިކްސް ޑިޕާޓްމަންޓުގެ އިސްވެރިއެއްގެ ގޮތުގައި ހުންނެވި ޒާހިރު އުސްމާން (ސުކުނާ)، ފެނަކަ ކުންފުނީގެ ބައެއް މުވައްޒަފުންނަށް ބިރު ދައްކާފައިވާކަމަށް ބުނާ އޮޑިއޯއެއް ވަނީ ލީކްވެފައެވެ.
މި އޯޑިއޯ މަޖިލީހުގައި އިއްވުމަށް ނައިފަރު ދާއިރާގެ މެންބަރު އަޙްމަދު ޝިޔާމް އެދިވަޑައިގަތެވެ. މިއާއެކު މަޖިލީހުގެ އެއްވެސް މެމްބަރަކު އިއުތިރާޒު ނުކުރައްވާ ނަމަ އޯޑިއޯ މަޖިލީހުގައި އިއްވުމުގެ ހުއްދަ ދެވިދާނެ ކަމަށް ނަޝިދު ވިދާޅުވެ އެ ހުއްދަ ދެއްވިއެވެ. އަދި ޝިޔާމްގެ މައިކްގައި ފޯނު ޖައްސަވައިގެން މުޅި މަޖިލީހަށް އޯޑިއޯ އިއްވެވިއެވެ. އެ އޯޑިއޯ އެއްވަވާ ޝިޔާމް ވަނީ އެއީ އިންސާނުން އިންސާނުންނާ މުއާމަލާތުކޮށް ވާހަކަ ދައްކަން ޖެހޭ ގޮތެއް ނޫން ކަމަށާއި އެ މައްސަލަ ބަލަން މަޖިލީހުގެ ކޮމިޓީތަކަށް ހުށަހަޅުއްވާނެ ކަމަށް ވިދާޅުވެފައެވެ.
ޝިޔާމް އެ އޯޑިއޯގެ ވަކި ހިސާބަކަށް ދިއުމުން، ޝިޔާމްގެ މައިކްގެ އަޑު ކަނޑާލެއްވުމަށް ފަހު، ނަޝީދު ވިދާޅުވީ ވަޒީފާ އިން ވަކިނުކުރާނެ ކަމާއި ނުފޫޒު ނުފޯރުވާ ކަމަށް އޯޑިއޯގެ ކުރީކޮޅު ސާފުކޮށް ބުނާކަމަށެވެ.
ނަޝީދު ވިދާޅުވީ، ޒާހިރަކީ ކޮމަންޑޫ ވޯޓު ހައްގުވާ މީހެއްކަމަށާއި، އޭނާއަކީ ކެމްޕެއިން ކުރުމުގެ ހައްގު ވެސް އޮތް މީހެއްކަމަށެވެ. އޭނާ އެންމެ ފުރަތަމަ ވެސް ފާހަގަ ކުރެއްވީ ނުފޫޒު ނުފޯރުވާނެ ކަމަށްކަމަށް ނަޝީދު ވިދާޅުވިއެވެ.
ނަޝީދު އެހެން ވިދާޅުވިނަމަވެސް، ވަޒީފާއިން ވަކިކުރާނެ ކަމުގެ އިންޒާރު އެ އޯޑިއޯގެ އެންމެ ފަހަތުގައި ޒާހިރު ދެއްވައެވެ. ނަމަވެސް އެބައި މަޖިލީހަށް ނުއިއްވެވުނެވެ.
ފާއިތުވި ކޮމަންޑޫ ދާއިރާގެ ބައި އިލެކްޝަންގެ ކެމްޕޭންގެ ތެރޭގައި، ޒާހިރު ފެނަކައިގެ ބައެއް މުވައްޒިފުންނަށް ވަކި ގޮތަކަށް ވޯޓުދިނުމަށް އިންޒާރުދީ، އަދި ވަޒިފާއިން ވަކި ކުރާނެކަމުގެ އިންޒާރުދޭ އޯޑިއޯއެއް ވަނީ ލީކު ކޮށްލާފައެވެ.
"އެކަމަކު މިކަމަކު އަހަރެމެންގެ ބަސް ނާހަ މީހުންނަކަށް އަހަރެމެންގެވެސް ނޯންނާނެ އެހީތެރިކަމެއް. ރާޑޯއަކަށް ނޫން މިވޯޓު ހޯދަނީ. މިވޯޓު ހޯދަނީ ތިލަފަތަށް. އެއްގޮތަކީ ރާޑޯއަށް ލާން ބޭނުން ނުވާނަމަ ވޯޓު ނުލާވެސް ހެދޭނެ ގޮތްގޮތް އޮންނާނެ. އެމީހަކު ވޯޓުލާން ނުދާނީ. މިބުނީ އޮޕްޝަންތަކެކޭ މިދިނީ.
ލީކުވި އޯޑިއޯގައި ޒާހިރު ބުނެފައި ވެއެވެ.
މި އޯޑީއޯ ލީކުވެގެން ދިއުމާއެކު، އެމްޑީޕީގެ ބައެއް އެކްޓިވިސްޓުންނާއި އަދި މަޖިލިސް ބައެއް މެމްބަރުންވެސް ވަނީ މިއީ އެމްޑީޕީގެ ސިޔާސަތެއް ނޫންކަމަށް ބުނެ އަޑު އުފުލާފައެވެ. އަދި މުވައްޒަފުންނަށް އިންޒާރު ދިންކަމަށް ބުނާ ފެނަކަ ކުންފުނީގެ އިސްމުވައްޒަފު ވަޒިފާއިން ވަކި ކުރުމަށްވެސް ވަނީ ގޮވާލާފައެވެ.
އަދި ހަމައެއާއެކު، ޒާހިރު ޕީޕީއެމްގެ ވެރިކަމުގައި ޕޯޑިއަމްތަކުގައި ވަހަކަ ދައްކާ، ކެމްޕޭން ހަރަކާތްތަކުގައި އުޅުނު މަންޒަރުތައް ދައްކުވައިދޭ ފޮޓޯތައްވެސް ވަނީ ސޯޝަލް މީޑިއާގައި ދައުރުވެފައެވެ.
ޒާހިރު ވަޒީފާއިން ވަކިކުރުމަށް އެމްޑީޕީގެ މަޖިލިސް ބައެއް މެމްބަރުންނާއި އެކްޓިވިސްޓުން ކުރި ޑިމާންޑަތަކަށް ރައްދު ދެއްވާ ފެނަކަ ކުންފުނީގެ އެމްޑީ ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، އޯޑިއޯގެ ސައްޙަކަމާމެދުވެސް އޭނާއަށް ސުވާލު އުފެދޭ ކަމަށާއި، މީސްމީހުން ވަޒީފާއިން ވަކިކުރުމުގެ ވިސްނުން އޭނާ ނުގެންގުޅުއްވާނެ ކަމުގަައެވެ.
ބައެއް ފަރާތްތަކުން ތުހުމަތު ކޮށްފައިވާ ގޮތުގައި، މުވައްޒަފުންނަށް ފެނަކައިގެ އިސް މުވައްޒަފު ބިރުދައްކާ އިންޒާރު ދީފައިވަނީ، ފެނަކައިގެ އެމްޑީ އެގޮތަށް އަންގައިގެންނެވެ. އަދި ފެނަކައިގެ ލޮޖިސްޓިކްސް ޑިޕާޓްމަންޓުގެ އިސް ވެރިއެއްގެ ގޮތުގައި ހުންނެވި ޒާހިރު އުސްމާނަކީ ފެނަކައިގެ އެމްޑީ ސައީދުއާއި ގާތް ގުޅުމެއް އޮންނަ ފަރާތެއްކަމަށްވެސް ފެނަކައިގެ ބައެއް މުވައްޒިފުން ނަން ހާމަ ނުކުރުމަށް އެދި މައުލޫމާތު ދީފައި ވެއެވެ.
މައުލޫމާތު ލިބިފައިވާ ގޮތުގައި ޒާހިރު އުސްމާނަކީ ފާއިތުވެދިޔަ ޕީޕީއެމްގެ ވެރިކަމުގައި އެޕާޓީގެ ހަރަކާތްތަކުގައިވެސް އިސް ދައުރެއް އަދާ ކުރައްވާފައިވާ ފަރާތެކެވެ.
