މާލެއިން 1،000 ޕާކިން ޖާގަ ވިއްކަން މާލެ ސިޓީ ކައުންސިލުން ނިންމައިފިއެވެ.
މާލެ ސިޓީކައުންސިލުން މިގޮތަށް ނިންމާފައިވަނީ މާލޭގެ ޕާކިންއަށް ދިމާވެފައިވާ މައްސަލަ ހައްލު ކުރުމަށާއި، ގަރާޖު ސިޓީގެ ނަމުގައި ބޮޑުއަގުގައި ގަރާޖު ސިޓީ ގަންނަން މަޖުބޫރުވެފައިވާ މައްސަލައަށް ހައްލެއް ހޯދުމަށެވެ. މިޖާގަތައް މިހާރު ތައްޔާރުކުރެވި ދޫކުރުމަށް މާލެ ސިޓީ ކައުންސިލުން ދަނީ ތައްޔާރުވަމުންނެވެ.
މާލެ ސިޓީ ކައުންސިލުން ބުނެފައިވަނީ ހުޅުވާލާ ޕާކިން ސްލޮޓްތަކުގެ 25 ޕަސެންޓް ހާއްސަ ކުރާނީ ޓެކްސީތަކަށް ކަމަށެވެ. ހުޅުވާލަނީ 1000 ފުރުސަތު ނަމަ އޭގެ ތެރެއިން 250 ސްލޮޓް ޓެކްސީތަކަށް ހާއްސަ ކުރާނެ ކަމަށެވެ.
ޕާކިން ސްލޮޓް ދޫކުރާނީ މާލޭގައި 20 ފޫޓަށް ވުރެ ފުޅާ މަގުތަކުގެ ތެރެއިން މިހާރު ސައިކަލަށް ހާއްސަކޮށްފައިވާ ޒޯންތަކަށް ނާރާ ގޮތަށް ކަމަށާއި، އަދި ސްލޮޓްތައް ދޫކުރާނީ ޓްރެފިކަށް ބާރު ބޮޑުނުވާނެ ގޮތަށް ބަލައިގެން ކަމަށް މާލެ ސިޓީ ކައުންސިލުން ވަނީ ބުނެފައެވެ.
ޕާކިން ސްލޮޓްތަކަށް އެކަމަށް އެދެވޭނީ އޮންލައިން ޕޯޓަލް އެއް މެދުވެރިކޮށެވެ. އަދި ހުށައަޅާ ޑޮކިއުމަންޓްތައް ވެރިފައި ކުރުމަށް ފަހު ބަޑޭރި ޕޭ މެދުވެރިކޮށް ފައިސާ ދައްކާ އެގްރީމަންޓް ކުރެވޭ ގޮތަށެވެ. އަދި މާލޭގެ އެކި ސަރަހައްދުތަކުން ސްލޮޓްތައް ހުރި ތަންތަނާއި ބޭނުންވާ ސްލޮޓްތައް ސެލެކްޓް ކުރެވި އެކަމަށް އެދެވޭ ގޮތަށް ޕޯޓަލް ޑިޒައިން ކުރެވިފައި ހުންނާނެކަމަށް މާލެ ސިޓީ ކައުންސިލުން ވަނީ ބުނެފައެވެ.
ޕާކު ކުރުމަށް ހާއްސަ ޒޯނުތަކެއް ކަނޑައަޅައި، އެތަންތަނުން ފީ ނެގުމުގެ އިހްތިޔާރު އެއްގަމު އުޅަނދު ޕާކު ކުރުމުގެ ގަވާއިދުގެ ދަށުން ސިޓީ ކައުންސިލަށް ލިބެއެވެ.
ކޮމެންޓު ފޮނުވާ