އިރާގުގެ ގާނޫނުހަދާ މަޖިލިހުގައި ހިމެނޭ މުހިންމު ބައެއް ފެކްޝަންތަކުން ހޯމަދުވަހުގެ މަޖިލިސް ޖަލްސާ ބޮއިކޮޓްކޮށް، އެގައުމުގެ އާ ރައީސް ގާނޫނުހަދާ މަޖިލިހުން އައްޔަން ވިޔަ ނުދީ ހިފަހައްޓައިފިއެވެ.
އިރާގުގެ އާ ރައީސް އިންތިޚާބު ކުރުމަށްޓަކާއި، މިކަމަށްޓަކާ ބާއްވާ ޖަލްސާއެއްގެ ތިންބައި ކޮށްފަ ދެބައިގެ އަޢުލަބިއްޔަތު ބޭނުން ވެއެވެ.
އެހެންނަމަވެސް، ރައީސް އިންތިޚާބު ކުރުމަށް ބޭއްވި ޖަލްސާ، މައިގަޑު ގޮތެއްގައި، އިރާގުގެ ޝީޢީންގެ ބާރުގަދަ ލީޑަރެއް ކަމުގައިވާ މުއްޠަގާ އަލް ސަދަރަށް ތާޢީދުކުރާ ފަރާތްތަކުން ބޮއިކޮޓް ކުރުމާއި ގުޅިގެން ވަނީ ބޭއްވޭ ގޮތް ނުވެފައެވެ.
329 މެމްބަރުންގެ މައްޗަށް އެކުލެވޭ ގާނޫނުހަދާ މަޖިލިހުގެ މި ޖަލްސާއަށް ހަޒިރު ވެފައިވަނީ އެންމެ 58 މެމްބަރުންނެވެ.
އިރާގުގެ އާ ރައީސް އިންތިޚާބު ކުރުމަށް ބޭއްވުމަށް ޖެހިގެންދިޔަ ޖަލްސާ ބޮއިކޮޓް ކުރާނެކަން، މިހަފްތާގެ އާދީއްތަ ދުވަހު އިއުލާން ކުރައްވާފައިވަނީ، ޕާލަމެންޓްރީ އެންމެ ބޮޑު ބްލޮކްގެ ވެރިޔާ އަލް ސަދުރެވެ. މި ބްލޮކްގައި 73 މެމްބަރުން ތިއްބަވައެވެ. އަދި އަލް ސަދުރަށްފަހު، ގާނޫނުހަދާ މަޖިލިހުގެ ރައީސް މުހައްމަދު އަލް ހަލްބައުސީގެ ބްލޮކުންވެސް ވަނީ މި ޖަލްސާ ބޮއިކޮޓް ކޮށްފައެވެ. މި ބްލޮކްގައި 51 މެމްބަރުން ތިއްބަވައެވެ.
އަދި އެއަށްފަހު، އިރާގުގެ ގާނޫނުހަދާ މަޖިލިހުގައި 31 މެމްބަރުން ހިމެނޭ ކުރުދިސްތާން ޑިމޮކްރަޓިކެ ޕާޓީ (KDP)އިންވެސް ވަނީ މިޖަލްސާ ބޮއިކޮޓް ކުރާނެކަން އިއުލާން ކޮށްފައެވެ.
އިރާގުގެ ގާނޫނުހަދާ މަޖިލިހުގެ އެންމެ ބޮޑު ބްލޮކް ކަމުގައިވާ، މުއްޠަގާ އަލް ސަދަރުގެ ބްލޮކުން ގާނޫނުހަދާ މަޖިލިހުގެ މިޖަލްސާ ބޮއިކޮޓް ކޮށްފައިވަނީ، އިރާގުގެ ސުޕްރީމް ކޯޓުން، އިންތިޚާބުގައި އެންމެ ކުރީގަ އުޅޭކަމަށް ބެލެވޭ ކެނޑިޑޭޓް ހޮޝްޔާރު ޒެބާރީއަށް ކުރިމަތި ނުލެވޭގޮތަށް ނިންމި ވަގުތީ ނިންމުމަށް ފަހުއެވެ.
ހޮޝްޔާރު ޒެބާރީއަކީ މިއިންތިޚާބުގައި އަލް ސަދަރު ތާއީދު ކުރައްވާ ފަރާތެވެ.
