ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެނޑިޑޭޓް ރާޝިދަށް ވޯޓު ނުދޭން މަޖުބޫރުކުރި ނަމަވެސް މިއިންތިޚާބުގައި ރާޑޯ އަށް ވޯޓު ނުދޭނެކަމަށް ފެނަކައިގެ މުވައްޒިފުން ބުނެފިއެވެ.
އިދިކޮޅު ޕީޕީއެމްގެ ނައިބު ރައީސް އަހްމަދު ޝިޔާމް ރޭ ދަންވަރު ކުރެއްވި ޓްވީޓެއްގައި ވަނީ ފެނައިކައިގެ މުވައްޒިފުންނަށް ބިރުދައްކައި އިންޒާރުދޭ އޯޑިއޯއެއް ލީކު ކޮށްލާފައެވެ. މިއޯޑިއޯގައި ވާހަކަ ދައްކަނީ ކުންފުނީގެ އޮޕަރޭޝަން ހެޑް ޒާހިރު އުސްމާން ކަމަށްވެއެވެ.
މިއޯޑިއޯގައި ޒާހިރުވަނީ ވޯޓު ދޭންވީ ރާޝީދުއަށް ނޫންކަމަށާއި، ވޯޓު ދޭންވީ ތިލަފަތަށް ނޫނީ، ފެނަކައިގެ އެމްޑީއަށް ކަމަށް ބުނެފައެވެ. އޭނާ މިހެން ބުނުމުން، މިބައްދަލުވުމުގައި އިން ފެނަކައިގެ މުވައްޒިފަކު ވަނީ، އެމްޑީއަށާއި، ކުންފުންޏަށް އިޚުލާސްތެރިވާނެކަމަށް ބުނެފައެވެ. ނަމަވެސް ރާޑޯއަށް ވޯޓު ނުދޭނެކަމަށާއި، އޭނާ ކަޓުވާލެވެން އޮތް ގޮތަކަށް މަސައްކަތް ކުރާނެކަމަށް ބުނެފައެވެ.
އެމްޑީއަށް، ދޭންޖެހޭ ފުރިހަމަ އެއްބާރުލުން އިރާދަކުރެއްވިޔާ ދޭނަން. އެކަމަކު ރާޑޯއަކަށް ވޯޓެއް ނުޖަހާނަން. ރާޑޯ ކަޓުވާލެވެން އިން ގޮތަކަށް މަސައްކަތް ކުރާނީ.
– ފެނަކައިގެ މުވައްޒިފަކު ބުނެފައިވެއެވެ.
ފެނަކައިގެ މުވައްޒިފުގެ މިވާހައާއިއެކު ޒާހިރު ވިދާޅުވީ ރާޑޯއަށް ވޯޓު ނުދޭނަމަ، އެމްޑީއަށް އެއްބާރުލުން ދިންކަމަށްވާނީ އައިޑީކާޑު ދީފައި ވޯޓުލާން ނުދިއުންކަމަށެވެ. އަދި އޭނާ ދެއްކި ވާހަކަތަކުގެ އޯޑިއޯ ލީކުވެއްޖެނަމަ އެމީހަކު ވަޒީފާއިން ވަކި ކުރާނެކަމުގެ އިންޒާރުވެސް ވަނީ ދީފައެވެ.
ދައްކާ ވާހަކަ ގަބޫލު ނުކުރަންޏާ އެމީހަކަށް އެއްބާރުލުން ނުލިބޭނެ. އަހަރެން މިދއްކާވާހަކަ ބޭރުތެރޭގައި ލީކުވެއްޖިއްޔާ އެމީހަކު ކަޑާވައްޓާލާނަން.
– ޒާހިރު ވިދާޅުވިއެވެ.
މި އޯޑިއޯއާއި އެކު، ޝިޔާމް ކުރެއްވި ޓްވީޓްގައި ވިދާޅުވީ، "ހުރިހާ ކަމެއް ހުއްޓާލާފައި" އިލެކްޝަންސް ކޮމިޝަން (އީސީ) އާއި، ފެނަކައާއި، ފުލުހުންނާއި، ހިއުމަން ރައިޓްސް ކޮމިޝަން (އެޗްއާރުސީއެމް) އިން މި މައްސަލަ ބަލަން ގޮވާލާ ކަމަށެވެ.
ކޮމަންޑޫ ދާއިރާގެ ގޮނޑި ހުސްވެ، ބައި އިލެކްޝަނެއް ބާއްވަނީ އެ ދާއިރާ ތަމްސީލުކުރެއްވި އެމްޑީޕީގެ މެމްބަރު ޙުސެއިން ވަހީދު އަވަހާރަވުމުންނެވެ.
ކޮމަންޑޫ ދާއިރާގެ 3 ރަށުގެ އިތުރުން މާލޭގައި ވޯޓުލުން ކުރިއަށްދެއެވެ. ޖުމްލަ 7 ފޮށްޓެއް ކޮމަންޑޫ ދާއިރާގެ އިންތިޚާބުގައި ވޯޓުލުމަށް ބަހައްޓާފައިވެއެވެ. މާލޭގައި 2 ފޮށި، ކޮމަންޑޫގައި 2 ފޮށި، ފޯކައިދޫގައި 2 ފޮށި އަދި މަރޮށީގައި ވަނީ ފޮއްޓެއް ބަހައްޓާފައެވެ. މިއިންތިޚާބުގައި ވޯޓު ދިނުމުގެ ހައްގު ލިބިގެންވަނީ 3،309 މީހުންނެވެ.
