ކޮމަންޑޫ ދާއިރާގެ ރައްޔިތުން މިއަދު ވަރަށް ސާފުކޮށް ސަރުކާރަށް ނޫނެކޭ ބުނެފައިވާކަމަށާއި، ދެން އިތުރަށް ކަޅު ފައިސާ އަޅައިގެން މާދަމާގެ ވޯޓު އަބުރަން މަސައްކަތް ނުކުރުމަށް އިދިކޮޅު ޕީއެންސީގެ ރައީސް އަބްދުއްރަހީމް ސަރުކާރަށް ގޮވާލައިފިއެވެ.

ކޮމަންޑޫ ދާއިރާގެ ފަތުޙީގެ ކެމްޕެއިން ނިންމުމަށް ކޮމަންޑޫގައި ބޭއްވި ޖަލްސާގައި އަދުރޭ ވިދާޅުވީ މިއިންތިޚާބުގައި ރައްޔިތުން ގޮތް ނިންމާފައިވާކަމަށެވެ. ކޮމަންޑޫ ދާއިރާގެ ރައްޔިތުން ތިބީ ދިވެހި ޤައުމުގެ ހައްގުގައި ރައްޔިތުންގެ ހައްގުގައި މިނިވަންކަން ހިމާޔަތް ކުރުމަށް ތައްޔާރަށްކަމަށެވެ. މުޅި ސަރުކާރުގެ ނުފޫޒާއި ބާރު ކޮމަންޑޫ ދާއިރާގެ ރައްޔިތުންނަށް ފޯރުވުމަށް މަސައްކަތް ކުރަމުންދާއިރު، އެކަމަށް ކޮމަންޑޫ ދާއިރާގެ ރައްޔިތުން ވަރަށް ސާފުކޮށް ނޫނެކޭ ބުނަމުންދާކަމީ ފެންނަމުންދާ މަންޒަރުކަމަށް ފަތުޙީ ވިދާޅުވިއެވެ.

އޭނާ ވިދާޅުވީ މިއިންތިޚާބުގައި ރައްޔިތުންގެ ނިންމުން ބަދަލު ކުރުމަށް މިރެއާއި، މާދަމާ ކަޅު ފައިސާ އަލައިގެން ވޯޓު ބަދަލު ކުރުމަށް ކުރާ މަސައްކަތަކީ ކާމިޔާބު ވާނެ މަސައްކަތެއް ނޫންކަމަށެވެ. އަދި މިކަން ވިޔަ ނުދިނުމަށް، ޕީޕީއެމްގެ ކެމްޕެއިން ޓީމުން ނުނިދާ ހޭލާތިބެގެންވެސް މިއިންތިޚާބު ކާމިޔާބް ކުރުމަށް ކުރަންޖެހޭ ހުރިހާ މަސައްކަތެއް ކުރާނެކަމަށް އަދުރޭ ވިދާޅުވިއެވެ.

ކަޅުފައިސާގައި އިންތިޚާބާއި ކުޅެން ނޫޅުއްވާ. މިއިންތިޚާބު އޮތީ ފަތުޙީއަށް ރައްޔިތުން ދެއްވާފަ. މިކަމާއި ދެން ނޫޅުއްވާ.

– އަދުރޭ ވިދާޅުވިއެވެ.

އަދުރޭ ވިދާޅުވީ މިހާރުވެސް މަޖިލީހުގެ 64 ގޮޑި އެމްޑީޕީއަށް އޮތްއިރު، ވީހަމަ އެއްވެސް ކަމެއް ނެތްކަމަށެވެ، އިތުރަށް ގޮޑިއެއް ދީގެން އެމްޑީޕީއަށް ވާނެހަމަ އެއްވެސް ކަމެއް ނެތްކަމަށް އަދުރޭ ވިދާޅުވިއެވެ. އޭނާ ވިދާޅުވީ މިގޮޑިއަށް ފަތުޙީ އިންތިޚާބު ވެއްޖެނަމަ، ސަރުކާރުން ކުރާ ޤާނޫނާއި ޚިލާފް ކަންކަމާއި ދެކޮޅަށް ސާބިތުވެ ތެދުވެ، ކުރަންޖެހުނު ކޮންމެ މަސައްކަތެއް ކުރައްވާނެކަމަށެވެ.

އަދި ހަމަ އެހެންމެ ކޮންމެ އަނިޔާއެއް ދިނަސް މިސަރުކާރުގެ ކުރިމަތީގައި ކުޑަކަކޫ ނުޖަހައި، ކޮމަންޑޫ ދާއިރާގެ ރައްޔިތުންގެ ހައްގުގައި ކުރަންޖެހުނު ކޮންމެ ކަމެއް ކުރުމަށް ފަތުޚީ ސާބިތުވެ ހުންނަވާނެކަމަށް އަދުރޭ ވިދާޅުވިއެވެ. އޭނާ ވަނީ މާދަމާ ވީހާވެސް ހެނދުނާ ވޯޓުލާން ނިކުމެ ވޯޓުން މިސަރުކާރަށް ބޮޑުތަނުން ނޫނެކޭ ބުނުމަށް ކޮމަންޑޫ ދާއިރާގެ ރައްޔިތުންނަށް ގޮވާލާފައެވެ.