ކޮމަންޑޫ ދާއިރާގެ ތިން ރަށުގައި އިދިކޮޅު ޕްރޮގްރެސިވް ކޯލިޝަންގެ ކެނޑިޑޭޓް މޫސާ ފަތުޙީއަށް އޮތް ތާއީދު ދައްކާލައި، ކެމްޕެއިން ނިންމާލައިފިއެވެ.
އިދިކޮޅު ކޯލިޝަނުން ފޯކައިދޫ، މަރޮށި، ކޮމަންޑޫގައި ކެމްޕެއިން ނިންމާލާފައިވަނީ ބޮޑު ހިނގާލުންތަކަކުންނެވެ. މިހިނގާލުންތަކުގައި އެރަށަކުން ފަތުޙީއަށް އޮތް ތާއީދު ވަނީ ދައްކާލާފައެވެ. ގިނަ އަދަދެއްގެ ބަޔަކާއިއެކު ކުރިއަށް ދިޔަ މިހިނގާލުންތަކުގައި ބައިވެރިވި މީހުން ތިބީ ފަތުޙީގެ ޓީޝާޓް ލައިގެންނެވެ.
އަދި ޕީޕީއެމްގެ ދިދައާއިއެކު ކުރިއަށްދިޔަ މިހިނގާލުންތަކުގައި ޕީޕީއެމްގެ ލީޑަރޝިޕްގެ އިސްބޭފުޅުން ވަނީ ބައިވެރިވެފައެވެ. ކޮމަންޑޫގައި ކުރިއަށްދިޔަ ހިނގާލުމުގައި މޫސާ ފަތުޙީއާއި، ޕީއެންސީގެ ރައީސް އަބްދުއްރަހީމް ވަނީ ބައިވެރިވެފައެވެ. ފޯކައިދޫގެ ހިނގާލުމުގައި އިސްކޮށް ހަރަކާތްތެރިވީ ޕީޕީއެމްގެ ނައިބް ރައީސް އަހުމަދު ޝިޔާމްއެވެ.
#HappeningNow
ކޮމަންޑޫ ދާއިރާގެ ބައި-އިލެކްޝަން ޕީޕީއެމް ކެނޑިޑޭޓް މޫސާ ފަތުހީގެ ކެމްޕެއިން ނިންމާލުމަށް ގިނަ އަދަދެއްގެ ރައްޔިތުންނާއިއެކު ފޯކައިދޫގައި ކުރިޔަށްދާ ފޯރިގަދަ ހިނގާލުމުގެ ތެރެއިން#tick2#VoteFathuhy#VoteRukah#MeeMageyRaajje#IndiaOut pic.twitter.com/SdMgroocYQ— Progressive Party of Maldives (@ProgressPartyMV) February 4, 2022
ކޮމަންޑޫ ދާއިރާގައި އެންމެ ގިނަ އަދަދަކަށް މީހުން ރަޖިސްޓްރީ ކޮށްފައިވާ ސަރަހައްދަކީ މާލެއެވެ. ކޮމަންޑޫ ދާއިރާގެ ވޯޓު ލިބުމުގެ ހައްގު ލިބިގެންވާ މީހުންގެ ފައިނަލް ލިސްޓާއެކު، ވޯޓު ލެވޭނެ ފޮށިތައް އެނގޭނެހެން އާންމުކުރި ލިސްޓުގައި މާލެ ސަރަހައްދުގައި އިތުރު ވޯޓު ފޮއްޓެއް ބެހެއްޓުމަށް އިލެކްޝަނުން ވަނީ ނިންމާފައެވެ. މާލެ ސަރަހައްދަށް ފޮއްޓެއް އިތުރުވެފައިވަނީ ރީ-ރަޖިސްޓްރީ ވުމަށް ހުޅުވާލި ފުރުސަތުގައި ރަޖިސްޓްރީ ކުރި މީހުންގެ ނިސްބަތަށް ބެލުމަށް ފަހުއެވެ. މިއިންތިޚާބުގައި ޖުމްލަ 7 ފޮށި ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފައެވެ. އޭގެ ތެރެއިން މާލޭގެ އިސްކަންދަރު ސްކޫލުގައި ދެ ފޮށި ބެހެއްޓުމަށް ވަނީ ހަމަޖެހިފައެވެ.
އިލެކްޝަން ކޮމިޝަނުން ވަނީ ވޯޓުލުން ކުރިއަށްދާއިރު، އިންތިޚާބާގުޅޭ ޝަކުވާ ނުވަތަ މައްސަލަ ހުށަހަޅަން ބޭނުންވެއްޖެ ހިނދެއްގައި، އިލެކްޝަންސް ކޮމިޝަނަށް މައްސަލަ ހުށަހެޅުމުގެ އިންތިޒާމް ހަމަޖައްސައިފައެވެ. މާދަމާ ބާއްވާ ތިން އިންތިޚާބުގައިވެސް ވޯޓުލުން ކުރިއަށްދާނީ ހެނދުނު 8 އިން ހަވީރު 4 ޖަހަންދެނެވެ. މެންދުރުފަހު 3 އިން ފެށިގެން ވޯޓުލުމަށް ޚާއްސަ ކޮށްފައިވަނީ ކޯވިޑަށް ޕޮޒިޓިވްވެފައިވާ މީހުންނާއި، ކަރަންޓީނުގައި ތިބޭ މީހުންނަށެވެ.
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓުލުމުގެ ހައްޤު ލިބިގެންވެއެވެ.
