މާދަމާ ބާއްވާ ކޮމަންޑޫ ދާއިރާގެ ބައި-އިލެކްޝަންގެ ކެމްޕެއިން މިއަދު ނިމިގެންދާއިރު، މިއިންތިޚާބުގައި އެމްޑީޕީގެ އެންމެ ފޯރީގައި ކެމްޕެއިން ހަރަކާތްތަކުގައި ފެންނަ އިސް މޫނުތައް މިކެމްޕެއިންގައި ގެއްލިއްޖެއެވެ.
ކޮމަންޑޫދާއިރާގެ ބައި-އިލެކްޝަނަކީ މިފަހުން ރާއްޖޭގައި ނުކުރާވަރުގެ ވަރުގަދަ ފޯރިގަދަ ކެމްޕެއިނެއް ފެނިގެންދިޔަ ދާއިރާއެކެވެ. އިންތިޚާބުގެ ކެމެޕެއިންގައި ވެރިކަންކުރާ މައި ޕާޓީ އެމްޑީޕީގެ ކެނޑިޑޭޓްގެ ކެމްޕެއިންގައި އެޕާޓީގެ އިސްބޭފުޅުން ދަނީ ބައިވެރިވަމުންނެވެ. އިންތިޚާބުގައި ރައީސް ނަޝީދާއި، ރައީސް ޞާލިހު އެކީގައިވެސް އެދާއިރާއަށް ވަނީ ކެމްޕެއިނަށް ވަޑައިގެންފައެވެ.
ނަމަވެސް އެމްޑީޕީއަކީ މިހާތަނަށް ކުރި ހުރިހާ ކެމްޕެއިނެއްގައިވެސް އެޕާޓީގެ މުޅި ލީޑަރޝިޕް އަބަދުވެސް ފެނިގެންދާގޮތަށް ވަރަށް ފޯރީގައި ކެމްޕެއިން ކުރާ ޕާޓީއެކެވެ. ނަމަވެސް މިފަހަރުގެ އިންތިޚާބުގެ އެންމެ ފަހުވަގުތާއި ހަމައަށްވެސް އެމްޑީޕީގެ ނަގާކިޔާ އަދި އެންމެ ފޯރީގައި ޕޯޑިޔަމްތަކާއި، މަޖިލިސް ތެރޭގައި ހަރަކާތްތެރިވާ އިސް މެމްބަރުން ނުފެނެއެވެ.
މިކެމްޕެއިންގައި ނުފެންނަ މޫނުތަކުގެ ތެރޭގައި އެމްޑީޕީގެ ޕީޖީ ލީޑަރު އަލީ އާޒިމްްއާއި، މަޖިލިސް ނައިބް ރައީސް އީވާއާއި، ގަލޮޅު ދެކުނު ދާއިރާގެ މެމްބަރު މީކާއިލް ނަސީމްއާއި، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއާއި، މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އާއި، ވިލިފުށި ދާއިރާގެ މެމްބަރު ހަސަން އަފީފްވެސް ހިމެނެއެވެ. މީގެ އިތުރުން މަޖިލިސް ތެރޭގައި އެންމެ ފޯރީގައި ވާހަކަ ދައްކަވާ އެމްޑީޕީގެ މެމްބަރުންގެ ތެރޭގައި ހިމެނޭ އިލްޔާސް ލަބީބާއި، އަހުމަދު ހަލީމް (ދޮންބިލޭ) ވެސް މި ކެމްޕެއިންގައި ނުފެއެވެ.
މިކެމްޕެއިންގެ މާކުރިންވެސް އެމްޑީޕީ ތެރެއިން އޮތީ ރައީސް ނަޝީދާއި، ރައީސް ޞާލިހަށް ތާއީދުކުރާ މެމްބަރުން ހިމެނޭގޮތަށް ބައިވެފައެވެ. އެކަން އެމްޑީޕީގެ ބައެއް މަޖިލިސް މެމްމަބަރުންވެސް އެކި ޕްލެޓްފޯމްތަކުގައި ދިޔައީ ވިދާޅުވަމުންނެވެ. މިފަހަރުގެ އިންތިޚާބުގައި އެމްޑީޕީގެ އިސް މެމްބަރުންގެ ތެރެއިން ނުފެނުނު މެމްބަރުންނަކީ އެމްޑީޕީގެ ދެބައިވެފައިވާ ފެކްޝަންގެ ތެރެއިން ރައީސް ނަޝީދަށް ތާއީދުކުރާ ފެކްޝަންގެ ބޭފުޅުންނެވެ.
މިއިންތިޚާބުގައި އިސްކޮށް ހަރަކާތްތެރިވާތަން ފެންނަނީ ރައީސް ޞާލިހަށް ތާއީދުކުރައްވާ، ރައީސް ޞާލިހުގެ މެމްބަރުންގެ ގޮތުގައި ފާހަގަކޮށްލެވޭ މެމްބަރުންނެވެ.
ކެމްޕެއިންގައި އިސްކޮށް ހަރަކާތްތެރިވަނީ ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރު މުޙައްމަދު ރަޝީދު ޙުސައިން (ބިގޭ) އެވެ. އޭނާއަކީ މީގެ ކުރިން އެކި މަރުހަލާތަކުގައި ރައީސް ނަޝީދުުގެ ފާޑުކިޔުން އަމާޒުވި ބޭފުޅެކެވެ. އިންތިޚާބުގައި މިމެމްބަރުން ނުފެނުނު ކަމުގައިވީނަމަވެސް، އެމްޑީޕީންވަނީ ވާދަވެރި ކެމްޕެއިނެއް ނިންމާފައެވެ. ދެން އޮތީ އިންތިޚާބުގެ ނަތީޖާއެވެ. ނަތީޖާއިން އެމްޑީޕީ ބަލިވެއްޖެ ކަމުގައިވާނަމަ، މިމެމްބަރުން ނުފެނުނު ސަބަބު ހާމަވުމަކީ ދުރުކަމެއް ނޫނެނެވެ.
