ހޮނިހިރު ދުވަހު ބާއްވާ ކޮމަންޑޫ ދާއިރާގެ ބައި-އިލެކްޝަނަށް ސަރުކާރުގެ މުދަލާއި، ފައިސާ ނަހަމަ ގޮތުގައި ބޭނުން ކުރަމުންދާތީ އެކަން ބަލައި ދިނުމަށް އިދިކޮޅު ޕްރޮގްރެސިވް ކޯލިޝަނުން އަނެއްކާވެސް ގޮވާލައިފިއެވެ.

އިދިކޮޅު ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް ވިދާޅުވީ ދައުލަތުގެ މުދަލާއި ފައިސާ ނަހަމަ ގޮތުގައި ބޭނުންކޮށް ރައީސުލްޖުމްހޫރިއްޔާއާއި މަޖިލިސް ރައީސް މިއަދު ކޮމަންޑޫ ދާއިރާއަށް ވަޑައިގެން ކެމްޕެއިން ހަރަކާތްތައް ކުރިއަށް ގެންގޮސްފައިވާކަމަށެވެ.

މިކަންކަމަކީ ކަމާއި ގުޅުންހުރި އިދާރާކުން ބަލަންޖެހޭ މައްސަލަތަކެއް ކަމަށާއި، ދައުލަތުގެ މުދަލާއި ފައިސާ ކެމްޕެއިން ހަރަކާތްތަކުގައި ބޭނުން ކުރުމަކީ ކަނޑައެޅިގެން ޤާނޫނާއި ޚިލާފް ކަމެއްކަމަށް އަދުރޭ ވިދާޅުވިއެވެ. އަދި މިކަން ބަލައި ދިނުމަށް އޭނާވަނީ މިވަގުތު ޤާނޫނީ ހުސްކަމެއްގައި އޮތް އޭސީސީއާއި، ފުލުހުންނާއި، އިލެކްޝަންސް ކޮމިޝަންގެ ކިބައިން ވަނީ އެދިފައެވެ.

ސަރުކާރުގެ މުދަލާއި ފައިސާ ނަހަމަ ގޮތުގައި ބޭނުން ކުރައްވައިގެން ކޮމަންޑޫ ދާއިރާގެ ބައި-އިލެކްޝަންގައި ރައިސް ސޯލިހާއި ރައީސް ނަޝީދު ގެންދަވަނީ ކެމްޕެއިން ކުރައްވަމުން.

– އޭސީސީ، ޕޮލިސް އަދި އިލެކްޝަން ޓެގް ކުރައްވައި އަދުރޭ ކުރެއްވި ޓުވީޓުގައި ވިދާޅުވިއެވެ.

އަދުރޭގެ އިތުރުން ޕީއެންސީގެ ނައިބް ރައީސް އިބްރާހިމް ޝުޖާވެސް ވަނީ ދައުލަތުގެ އިސްވެރިން، ޚާއްސަކޮށް ރައީސް ޞާލިހާއި، އެމްޑީޕީގެ އިސް ބޭފުޅުން ކޮމަންޑޫ ދާއިރާގެ އިންތިޚާބުގައި ދައުލަތުގެ މުދަލާއި ފައިސާ ބޭނުންކޮށްގެން ކެމްޕެއިން ކުރާތީ އެކަމުގެ ކަންބޮޑުވުން ފާޅުކުރައްވާފައެެވެ. ނަމަވެސް ހިތާމައަކީ މިއަދު މިއިންކަމެއް ބަލާނެ މުޒާރާއެއް ނެތުންކަމަށް ޝުޖާ ވިދާޅުވިއެވެ.

@FuwadThowfeek @IsmailHabeeb ????????‍♂️

— Ibrahim Shujau (@IbrahimShujaau) February 3, 2022

ކޮމަންޑޫ ދާއިރާގެ އިންތިޚާބާއި ދިމޮކޮށް، ސަރުކާރުން އިންތިޚާބަށް ނުފޫޒު ފޯރުވުމަށް ގިނަ މަސައްކަތްތަކެއް ކުރާކަމުގެ ތުހުމަތު އިދިކޮޅު ކޯލިޝަނުން ދަނީ އެކި ފަހަރުމަތީންކޮށްފައެވެ. ނަމަވެސް މިކަން ބެލޭނެ ގޮތެއްނެތި، ބަލަން އޮތް އޭސީސީވެސް އޮތީ ޤާނޫނީ ހުސްކަމެއްގެ ތެރޭގައެވެ.