ދައުލަތުގެ ހުރިހާ މިނިވަން މުވައްސަސާއެއް މިއަދު އޮތީ ޕެރެލައިޒް ވެފައިކަމަށް އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ކުރިއަށް އޮތް ކޮމަންޑޫ ދާއިރާގެ ބައި އިލެކްޝަނަށް ސަރުކާރުން ކުއްލިއަކަށް ހިންގަމުންދާ މަޝްރޫޢުތަކާއި، މަސައްކަތަކަށް އިޝާރާތް ކުރައްވައި ޗެނަލް-13ގައި ވާހަކަ ދައްކަވަމުން ރައީސް ޔާމީން ވިދާޅުވީ، ޤާނޫނު އަސާސީއާއި، އިންތިޚާބުތަކާއި ބެހޭ ޤާނޫނާއި ކަނޑައެޅިގެން ޚިލާފަށް އެތައްކަމެއް ސަރުކާރުން ކުރަމުންދާއިރު، ހުރިހާ މުވައްސަސާއެއް ނިދާފައި އޮތްކަމީ ފެންނަ މަންޒަރުކަމަށެވެ.
އިންތިޚާބުތަކުގައި ޤާނޫނާއި ޚިލާފް ކަންކަން ކުރާނަމަ އެކަން ހުއްޓުވުމަކީ އިލެކްޝަން ކޮމިޝަންގެވެސް ޒިންމާއެއްކަމަށް ރައީސް ޔާމީން ވިދާޅުވިއެވެ. ހަމައެކަނި ޤާނޫނާއި ޚިލާފްކަންކަން ނުކުރުމަށް އިލްތިމާސް ކުރުމަކުން ނުފެދޭކަމަށާއި، މިކަން ހުއްޓުވުމަށް އިލެކްޝަނުން ފިޔަވަޅު އަޅަންޖެހޭނެކަމަށް ރައީސް ޔާމީން ވިދާޅުވިއެވެ.
އެމަނިކުފާނު ވިދާޅުވީ މިއަދު ކޮރަޕްޝަންގެ މައްސަލަ ބެލުމަށް ޤާނޫނުން މަތިކޮށްފައިވާ ކޮމިޝަން އޮތީ ޤާނޫނީ ހުސްކަމެއްގައިކަން ހުރިހާ ރައްޔިތުންނަށްވެސް ސާފުވާނެކަމަށެވެ. އޭސީސީގެ އިތުރުން ދައުލަތުގެ އެހެން ހުރިހާ މިނިވަން ކޮމިޝަނެއްވެސް މިއަދުޔ އޮތީ ޕެރެލައިޒް ވެފައިކަމަށް ރައީސް ޔާމީން ވިދާޅުވިއެވެ.
ކޮރަޕްޝަންގެ ކަންކަން ހުއްޓުވުމަކީ އިލެކްޝަންގެވެސް ޒިންމާއެއް. އޭސީސީ ވަނީ ޕެރެލައިޒްކޮށްލާފަ. އަޅުގަނޑުމެން އޭސީސީއަށް މައްސަލަ ހުށަހެޅި ނަމަވެސް މެމްބަރެއް ނެތުމުން ކުރެވޭނެ ކަމެއްނެތް. އިލެކްޝަނަށް އިންތިޚާބާއި ބެހޭ ޤާނޫނާއި ޚިލާފްކަންކަން ކުރަމުންދާއިރު މިކަންކަން ހުއްޓުވެންޖެހޭނެ. އިލްތިމާސް ކުރުމަކުން އިލެކްޝަނަކަށް ނުފުދޭ. ކޮމިޝަނަށް މިކަން ހުއްޓުވެންވާނެ.
– ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މިދިޔަ ތިން އަހަރުގައި މިސަރުކާރުން ރާއްޖޭގައި ހިންގިހާވެސް ކަމަކީ ޤާނޫނާއި ޚިލާފަށް ކަންކަން ކުރުންކަމަށެވެ. އަދި މިތިން އަހަރަކީ ރާއްޖޭގެ ތާރީޚުގައިވެސް ނުހިންގާ ވަރުގެ ޤާނޫނާއި ޚިލާފްއެތައް ކަމެއް ހިންގި ތިންއަހަރުކަމަށް ރައީސް ޔާމީން ވިދާޅުވިއެވެ.
