ރާއްޖޭގައި މިއަދު ވެރިކަން ކުރަމުންދާ ސަރުކާރުން ރައްޔިތުންނަށް ވަމުންދާ އިހުމާލުތަކަށް ނޫނެކޭ ބުނުމަށްޓަކައި، ވޯޓުލާން ލިބޭ ފުރުސަތުގައި ދޭ ވޯޓު ސަރުކާރާއި ދެކޮޅަށް ދިނުމަކީ ބޭކާރު ވޯޓަކަށް ނުވާނެ ކަމުގައި ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.
އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ އިންތިޚާބުގެ ކެމްޕެއިން ފޯރިއާއިއެކު ކުރިއަށްދާއިރު، އިންތިޚާބުގެ ވާދަވެރިކަން ވަނީ ވަރަށް ބޮޑުވެފައެވެ. ސަރުކާރުން އާރާއި ބާރާއި، ނުފޫޒު އިންތިހާއަށް ކޮމަންޑޫ ދާއިރާގެ ތިން ރަށުގައި އޮތްއިރު، މިއިންތިޚާބުގައި ސަރުކާރަށް އޮތް އެންމެ ބޮޑު ގޮންޖެހުމަކީ އިދިކޮޅު ޕީޕީއެމްގެ ކެނޑިޑޭޓް މޫސާ ފަތުޙީއެވެ.
މިއީ ސަރުކާރުން އެއްދާއިރާކަށް މިހާބޮޑެތި ހޭދަތަކެއް ކުއްލިއަކަށް ކޮށް، އިންތިޚާބެއް ކާމިޔާބު ކުރުމަށް މިފަހުން މިހާބޮޑެތި ހޭދަކުރި ފުރަތަމަ އިންތިޚާބެވެ. މިއިންތިޚާބާއި ކުރިމަތިލީއިރު، ރާއްޖޭގެ ގިނަ ރައްޔިތުންވަނީ ސަރުކާރާއިމެދު ވަރަށް ބޮޑަށް ހިތްހަމަނުޖެހި، ގިނަ ކަންބޮޑުވުންތަކެއް ފާޅު ކުރަމުންނެވެ. އަދި ކޮމަންޑޫ ދާއިރާގައި ސަރުކާރުގެ މިވީ ތިންއަހަރު ވައުދުވެފައިވާ އެއްވެސްކަމެއް ނުވެ، އިންތިޚާބާއި ދިމާކޮށް ހުރިހާކަމެއް އެއްފަހަރާ ކުރުމަށް ސަރުކާރުންވަނީ ދިމާކޮށްފައެވެ.
މިހުރިހާ ގޮންޖެހުމެއް އޮތްނަމަވެސް އިންތިޚާބު ކާމިޔާބު ކުރުމަށް އިދިކޮޅު ޕީޕީއެމުން ދަނީ ވަރުގަދަ ކެމްޕެއިނެއް ކުރަމުންނެވެ. އިންތިޚާބުގެ ކެމްޕެއިންގައި އެންމެ ބުރަކަށް ކޮމަންޑޫ ދާއިރާގައި މަސައްކަތް ކުރަމުންދާ އިދިކޮޅު ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ވިދާޅުވީ ފަތުޙީ އަަށް ދޭ ކޮންމެ ވޯޓަކީ އެއީ ދިވެހިންގެ އިސްލާމީ ވަހުދަތާއި، ސަރުކާރުން ރައްޔިތުންނަށް ވަމުންދާ އިހުމާލަށް ނޫނެކޭ ބުނުމަށް ދެވޭ ވޯޓެއްކަމަށެވެ. އަދި މިއީ ރައްޔިތުންގެ ލާބަޔާއި، މަންފާ ހޯދުމަށް ލެވޭ އަގުހުރި ވޯޓަކަށް ވެގެންދާނެކަމަށެވެ.
ވޯޓަކީ ރައްޔިތުންގެ ބާރު! ހައްޤެއް! އަދުގެ ސަރުކާރުން ރައްޔިތުންނަށް ވާ އިހުމާލަށް، ކުރާ މިނިވަންކަން ގެއްލޭފަދަ އަމަލުތަކަށް، އިސްލާމްދީން ހިމާޔަތް ކުރަން ފަސްޖެހޭ ޖެހުމަށް ނޫނެކޭ ބުނުމަށް ކެނޑިޑޭޓް ނަންބަރު 2 މޫސާ ފަތުޚީއަށް ވޯޓު ދެއްވާ! ޝައްކެއްވެސް ނެތް، އެއީ ބޭކާރު ވޯޓަކަށް ނުވާނެ.
– ޣައްސާން ވިދާޅުވިއެވެ.
Vote aky rayyithunge bāru! haggeh! Adhuge sarukārun rayyithunnah va ihumaalah, kurā minivankan gelley fadha amaluthakah, Islam dheen himāyaih kuran fas jehey jehumah noonekey bunumah candidate 2, @M_Fathuhy ah vote dhevva! Shakkeh neiy, eii beykaaru vote akah nuvāne, In Sha Allah pic.twitter.com/gpdElgzZTf
— Mohamed Ghassan Maumoon (@mgmaumoon) February 1, 2022
ކޮމަންޑޫ ދާއިރާގެ އިންތިޚާބުގެ ވޯޓުލުން ހޮނިހިރު ދުވަހު ބާއްވާއިރު، ސރުކާރުންވަނީ ގިނަ ޕްރޮޖެކްޓްތަކެއް އެދާއިރާގައި ފަށާފައެވެ. މީގެ ތެރެއިން ގިނަ ކަންކަމަކީ ބަޖެޓްވެސް ނުކޮށް، ދުރާލައި ރާވާފައިނުވާ ކުއްލި ޕްރޮޖެކްޓުތަކެވެ. އިންތިޚާބާއި ގުޅޭ ކޮރަޕްޝަނާއި، ނުފޫޒުގެ މައްސަލަ ބެލުމަށް އޮތް އޭސީސީ އޮތީ ޤާނޫނީ ހުސްކަމެއްގެ ތެރޭގައެވެ.
