ކުރިޔަށް އޮތް ކޮމަންޑޫ ދާއިރާގެ ބައި އިލެކްޝްންގައި ވާދަ ކުރާ ކެނޑިޑޭޓުންގެ ތެރެއިން ރައްޔިތުންގެ މަޖިލިހުގައި މިނިވަން ކަމާއެކު ވާހަކަ ދެއްކޭނެ، މިނިވަންކަމާއެކު ބަހުސް ކުރެވޭނެ ހަމަ އެކަނި ކެނޑިޑޭޓެއްގެ ގޮތުގައި ހުންނެވީ އަބުދުލް ހަންނާނު އިދުރީސް ކަމުގައި އެމްއެންޕީގެ ނާއިބުރައީސް ހުސައިން އިސްމާއިލް ވިދާޅު ވެއްޖެއެވެ.
ރައްޔިތުންގެ މަޖްލިސްގެ ކޮމަންޑޫ ދާއިރާގެ ބައި އިލެކްޝަންގައި މޯލްޑިވްސް ނެޝަނަލް ޕާޓީގެ ފަރާތުން ވާދަކުރައްވާ ކެންޑިޑޭޓް އަބްދުލް ޙަންނާން އިދުރީސްގެ މާލެ ކެމްޕޭން ޖަލްސާގައި ބޭއްވި ފޯރިގަދަ ޖަލްސާގައި ރޭ ވާހަކަ ދައްކަވަމުން އެމްއެންޕީގެ އެއް ނައިބު ރައީސް ހުސެއިން އިސްމާއިލް ވިދާޅުވީ މަޖިލިހުގައި މިނިވަންކަމާއެކު ބަހުސް ކުރެއްވޭނެ ހަމައެކަނި ކެނޑިޓޭޓެގެ ގޮތުގައި ހުންނެވީ އަބުދުލް ހަންނާނު އިދުރީސް ކަމުގައި ދަންނަވަންޖެހޭ ގިނަގުނަ ސަބަބުތަކެއް ހުރި ކަމުގައެވެ.
އަޅުގަޑު ހަމަ އެކަނި މިހެން ބުނެލާފަ ނިންމާލާނީކީއެއް ނޫން. ސަބަބަކީ ކޮބައިތޯ؟ އަޅުގަޑުމެންގެ ކެނޑިޑޭޓް ދިފާޢު ކުރާނެ އެއްވެސް ކަމެއް ނޯންނާނެ.. އަޅުގަޑުމެންގެ ކެނޑިޑޭޓު ފޮރުވަން ޖެހޭ އެއްވެސް ކަމެއް ނޯންނާނެ.. އެހެންތޯ އެހެން ކެނޑިޑޭޓުން؟..
ހުސެއިން ވިދާޅުވި އެވެ.
މިޖަލްސާގައި ވާހަކަ ދައްކަވަމުން ހުސެއިން ވިދާޅުވީ، ރާއްޖޭގައި މިހާތަނަށް ހިނގި ކަރަޕްޝަންގެ އެންމެ ބޮޑު މައްސަލަ، ނުވަތަ އެންމެ ބޮޑު މަނީ ލޯންޑަރިންގެ ކަންތައް ހިގައިގެން ދިޔައިރުގަ ވެރިޔަކަށް ހުންނެވި ބޭފުޅާ ދިފާއު ކުރުމަށް ޕީޕީއެމްގެ ކެނޑިޑޭޓަށް މަޖިލިހުގައި ވާހަކަ ދައްކަން ޖެހޭނެ ކަމަށެވެ. ހަމަ އެއާއެކު، ދެން ތިއްބެވި ބޭފުޅުންގެ ހާލަތަކީ، މަޖިލިސް ތެރޭގައި ދެ ފެކްޝަން އުފެދި، ވެރިކަން ދޭނީ ކާކަށް ކަން ނޭގި 3 އަހަރުވެގެން ގޮސްފައިވާ ކަމަށެވެ. އަދި އެމްޑީޕީ އޮތީ މި ތަޅާފޮޅުމުގައި ކަމަށާއި، ރައްޔިތުންނަށް ފައިދާހުރި ކަމެއް ކުރާކަށް އެމްޑިޕީއަށް މަޖިލިސްތެރޭގައި ފުރުސަތެއް ނެތްކަމަށްވެސް ހުސެއިން ވިދާޅުވިއެވެ.
ހަމަ އެއާއެކު ޕީޕީއެމްގެ މީހުން.. ރައްޔިތުންނާއި ގުޅުންހުރި ބިލެއް އައުމުން ކިހިނެއްތޯ މިވަނީ؟ ބޮއިކޮޓް.. ބޮއިކޮޓް.. ބައްލަވާ އަޅުގަޑުމެން ރައްޔިތުން ތިބޭފުޅުން މަޖިލިހަށް ހޮވީ ބޮއިކޮޓް ކުރާކަށް ނޫނޭ އިނގޭތޯ! ރައްޔިތުން ތިބޭފުޅުން މަޖިލިހަށް ހޮވާފަ ތިތިބީ އަޅުގަޑުމެންގެ އަޑު އިއްވަން… ދައުލަތުގެ ބައިލަތުލް މާލުން ތިބޭފުޅުންނަށް މުސާރަދެނީ ބޮއިކޮޓް ގޮވާކަށެއް ނޫނޭ އިނގޭތޯ!
މިޖަލްސާގައި ވަރަށް ފޯރިއާއެކީ ވާހަކަ ދައްކަވަމުން ހުސެއިން ވިދާޅުވެފައި ވެއެވެ.
ހުސެއިން ވިދާޅުވީ، ރައްޔިތުންގެ މަޖިލިހުގައި ރައްޔިތުންގެ ހައްގުގައި އަޑު އިއްވާނީ އެމްއެންޕީގެ ކެނޑިޑޭޓު ހަންނާނު ކަމަށާއި އެބޭފުޅާއަށް އެއްވެސް މަޖުބޫރުކަމެއް ނެތްކަމަށާއި، ރައްޔިތުން ފިޔަވާ ހަންނާން ހިމާޔާތް ކުރާނެ ބައެއް، އަދި ރައްޔިތުންގެ އިހުސާސް ފިޔަވާ ހިމާޔަތް ކުރަންޖެހޭ އެހެން އެއްވެސް އިހުސާސެއް ނެތްކަމުގައެވެ.
އެމްއެންޕީގެ ނައިބު ރައީސް ހުސެއިން އިސްމާއިލްގެ ވާހަކަފުޅުގައި އޭނާ ވަނީ އެމްޑީޕީގެ ކެންޑިޑޭޓަށް ވަރަށް ވަރުގަދަ ބަހުގެ ހަމަލާތަކެއް އަމާޒު ކުރައްވާފައެވެ. އެގޮތުން ހުސެއިން އިސްމާއިލް އެމްޑީޕީގެ ކެންޑިޑޭޓް ސިފަކުރައްވާފައިވަނީ އިހްލާސްތެރިކަމެއްނެތް ކެންޑިޑޭޓެއްގެ ގޮތުގައެވެ. ފަސްބައިގެ އެއްވެސް ކިލަނބުކަމެއް ނެތް ތައުލީމީ ގާބިލް ޒުވާނުން ބަލައިގަންނަ ހަމައެކަނި ކެންޑިޑޭޓަކީ ޙަންނާންގެ ގޮތުގައި ހުސެއިން އިސްމާއިލް ވަނީ ސިފަކުރައްވާފައެވެ.
