ބޮލީވުޑްގެ ބައެއް ތަރިންނަށް، ހާއްސަކޮށް އަންހެން ތަރިންނަށް ކުރިމަތިވާ އެއް މައްސަލަ އަކީ ކެރިއަރގެ ވަކި ހިސާބަކުން ސްކްރީނުން ގެއްލޭ މައްސަލައެވެ. ކާމިޔާބު ފިލްމުތަކެއް ގެނެސްދިނުމަށްފަހު ބެލުންތެރިންގެ ލޯބި އުތުރިއަރާ ވަގުތު ގެއްލޭ ތަރިންވެސް މީގެތެރޭގައި ހިމެނެއެވެ. މީގެތެރޭ ބެލުންތެރިން ބަލައިގަންނަ ފެންވަރުގެ އެއް މަސައްކަތް ސްކްރީނަށް ދޫކޮށްލުމަށްފަހު ގެއްލޭ ތަރިންވެސް ހިމެނެއެވެ.
ފިރިހެން ބައެއްތަރިން އުމުރުން 50ހުން މައްޗަށް ދާއިރުވެސް އަލަށް އަންނަ ޒުވާން ތަރިންނާއެކު ކާމިޔާބު ފިލްމުތަކެއް ގެނެސްދެމުން އާދެއެވެ. މީގެ ބަދަލުގައި އަންހެން ގިނަ ތަރިން ސްކްރީނުން ގެއްލެނީއެވެ. މި ފަހަރު މި ބަލާލަނީ އެގޮތަށް ބެލުންތެރިންގެ ލޯބި ހޯދުމަށްފަހު ގެއްލުނު 3 އަންހެން ތަރިން އަލުން އަނބުރާ ބޮޑު ސްކްރީނަށް އަންނަ ޚަބަރަށެވެ. ސުވާލަކީ މި ތަރިން އަނބުރާ ބޮޑުސްކްރީނަށް އައުން ބެލުންތެރިން ކިހާވަރަކަށް ބަލައިގަންނާނެ ބާއެވެ؟
ދިވްޔާ ކޯޝަލް ކުމާރް
މިއީ އެންމެ ފިލްމަކުން މަޤްބޫލުކަން ހޯދާ ބޮޑު ސްކްރީނުން ގެއްލުނު ތަރިއެކެވެ. 2004ވަނަ އަހަރު އަކްޝޭ ކުމާރާއިއެކު "އަބް ތުމާރޭ ހަވާލޭ ވަތަން ސާތިއޯ" އިން ފެނުމަށްފަހު އޭނާ ބޭނުންވީ ކެމެރާގެ ފުރަގަހުގައި މަސައްކަތް ކުރާށެވެ. އެގޮތުން ގިނަ މިއުޒިކް ވީޑިއޯތަކާއި "ޔާރިޔާން" އާއި "ސަނަމްރޭ" ފަދަ ފިލްމުތައް، ޑައިރެކްޓަރެއްގެ ހައިސިއްޔަތުން އާންމުންނާއި ހަމައަށް ގެނެސްދީފައި ވެއެވެ. 16 އަހަރަށްފަހު ދިވްޔާ ބޮޑު ސްކްރީނަށް މި އަންނަނީ ޖޯން އަބްރަހަމާ އެކު "ސަތުޔަމޭ ވަޖަޔަތޭ 2″ އިން ނެވެ. 32 އަހަރުގެ ދިވްޔާ އަކީ ޓީސީރީޒްގެ ވެރިޔާ ބޫޝަން ކުމާރުގެ އަންހެނުން ނެވެ. އޭނާ ދާދިފަހުން ފެނިގެންދިޔަ ޓީސީރީޒްގެ މިއުޒިކް ވީޑިއޯ، "ތެރީ އާކޯންމޭ" އަށް އާންމުންގެ ފަރާތުން ލިބުނުވަރުގެ ތަރުހީބެއް އޭނާ އެނބުރި އަންނަ މި ފިލްމަށް ލިބިދާނެތޯ މިއީ ކުރެވޭ ސުވާލެކެވެ.
ބާގްޔަޝްރީ
"މޭނޭ ޕިޔާރްކިޔާ" އިން ބެލުންތެރިންގެ ހިތްތައް އަތުލި ބާގްޔަޝްރީ ވަނީ އެ ފިލްމުން ފިލްމު ފެއަރ އެވޯޑުވެސް ހޯދާފައެވެ. ނަމަވެސް ކާމިޔާބު އެއް ފިލްމަށްފަހު ބެލުންތެރިން ހިތްހަމަ ޖެހޭވަރުގެ އެކްޓިންގ އެއް ނުދެއްކުނު ބާގްޔަޝްރީ ފަހުން ވަނީ ފިލްމުތަކުގެ ސަޕޯޓިންގ ރޯލުތައްވެސް ކުޅެފައެވެ. މީގެ އިތުރުން ސައުތު އިންޑިއަން ފިލްމުތަކާއި ބޯޖްޕުރީ އަދި މަރާޓީ ފިލްމުތައް އޭނާ ވަނީ ކުޅެފައެވެ. ނަމަވެސް ހިންދީ ފިލްމަކުން އޭނާ އެންމެ ފަހުން ފެނުނީ ސުނިލްޝެޓީ އާއެކު 2010 ވަނަ އަހަރު "ރެޑް އެލާޓް" އިން ނެވެ.
10 އަހަރުގެ މެދުކެނޑުމަކަށް ފަހު، އުމުރުން 50 އަހަރުގެ ބާގްޔަޝްރީގެ 2 ފިލްމެއް މި އަހަރު އޮތީ ތައްޔާރަށެވެ. "ތަލައިވީ" އާއި "ރާދޭ ޝިޔަމް" މި ދެ ފިލްމަކީ ވެސް ހިންދީ ބަހުގެ އިތުރުން އިންޑިއާގެ އެހެން ބައެއް ބަސް ބަހުންވެސް ނެރެން ހަމަޖެހިފައި ވާ 2 ފިލްމެވެ. ޓެމިލްނާޑޫގެ ވަރުގަދަ ސިޔާސީ ސަހްޝިއްޔަތެއްކަމަށްވާ ޖަޔާލަލީތާގެ ހަޔާތުގެ މައްޗަށް ގެނެސްދޭ "ތަލައިވީ" ގައި ބާގްޔަޝްރީ ފެނިގެންދާނީ ޖަޔާލަލީތާގެ މަންމަގެ ރޯލުންނެވެ.
ޝިލްޕާ ޝެއްޓީ
މި ލިސްޓުގައި ހިމެނޭ ތަރިންގެ ތެރެއިން، ކެރިއަރގެ ރަންޒަމާނުގައި އެންމެ ކާމިޔާބު ތަރިޔަކީ މިއީއެވެ. 90ގެ ކުރީކޮޅުން ފެށިގެން ގިނަ ފިލްމުތަކެއްގައި ލީޑު ރޯލުން ފެނި ގިނަ އެވޯޑުތަކެއް ވެސް ހޯދާފައިވާ ޝިލްޕާ ޝެއްޓީ އެންމެ ފަހުން ބޮޑު ސްކްރީނުން ފެނުނީ 2007 ވަނަ އަހަރު ސްކްރީނަށް އައި "އަޕްނޭ" އިންނެވެ. ނަމަވެސް އޭގެފަހުންވެސް އެކި އެކި ރިއަލިޓީ ޝޯވް ތަކާއި ލަވަތަކުން ޝިލްޕާ ވަނީ ސަޕޯޓަރުންގެ ހިތްތައް ކުދިކޮށްފައެވެ.
13 އަހަރުގެ މެދު ކެނޑުމަކަށް ފަހު އުމުރުން 45 އަހަރުގެ ޝިލްޕާ ބޮޑު ސްކްރީނަށް އަންނަ 2 ފިލްމެ އޮތީ ތައްޔާރަށެވެ. " ނިކަންމާ" އާއި "ހަނގާމާ2″ ގައި ޝިލްޕާ ދައްކުވައިދޭ އެކްޓިންގ ބެލުމުގެ އިނތިޒާރުގައި ތިބި ސަޕޯޓަރުންނަށް އަދި ޖެހޭނީ ކުޑަ އިންތިޒާރެއް ކޮށްލާށެވެ. ކޯވިޑް-19ގެ ސަބަބުން މި ދެފިލްމުވެސް ވަނީ އަންނަ އަހަރަށް ރިލީޒްކުރުން ފަސްކޮށްލާފައެވެ.
