އިދިކޮޅު ކޯލިޝަނުން ރާއްޖޭގައި ހިންގަމުންދާ "އިންޑިއާ އައުޓް" ހަރަކާތަކީ ސިޔާސީ ހަރަކާތެއް ނޫންކަމަށާއި، އެއީ ޤައުމީ ބޮޑު ހަރަކާތެއް ކަމުގައި އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
އިދިކޮޅު ކޯލިޝަނުން އިސްވެ ރައީސް ޔާމީންގެ ސީދާ ބެއްލެވުމުގެ ދަށުން ކުރިއަށް ގެންދާ އިންޑިއާ އައުޓް ހަރަކާތުގައި ޝަހީދު ހުސެއިން އާދަމްގެ ފޮޓޯ ބޭނުން ކުރުމުން އެކަމާއި، މެމްބަރު ޔާސިރު ކޯފާވެ، ޝަހީދު ހުސެއިން އާދަމްގެ ފޮޓޯއާއި، ނަން ސިޔާސީ ކަންކަމުގައި ބޭނުން ނުކުރުމަށް ރައީސް ޔާމީންގެ ކިބައިންވަނީ އެދިފައެވެ.
ޔާސިރުގެ ޓުވީޓާއި ގުޅިގެން "ޚަބަރު އޮންލައިން" އަށް މައުލޫމާތު ދެއްވަމުން އިދިކޮޅު ކޯލިޝަންގެ ތަރުޖަމާން ހީނާ ވަލީދު ވިދާޅުވީ، އިންޑިއާ އައުޓް ހަރަކާތަކީ އެއްވެސް އިރެއްގައި ސިޔާސީ ހަރަކާތެއް ނޫންކަމަށެވެ. އެއީ ޤައުމީ ހަރަކާތެއްކަމަށެވެ. "އިންޑިއާ އައުޓް" ހަރަކާތަކީ ދިވެހި ރާއްޖޭގެ މިނިވަންކަމާއި ސިޔާދަތާއި ގުޅިފައިވާ ހަރަކާތަކަށްވާއިރު މިހަރަކާތް ސިޔާސީ ކުރުމަށް ޕީޕީއެމުންވެސް އެއްވެސް ވަރަކަށް މަސައްކަތް ނުކުރާކަމަށެވެ.
ރާއްޖޭގައިތިވި ބޭރު ޤައުމުގެއްގެ އަސްކަރީ ސިފައިން ބޭލުމަށް ކުރެވޭ މަސައްކަތަކީ ހަމައެކަނި ޕީޕީއެމުން އެކަނި ކުރާ މަސައްކަތެއް ނޫންކަމަށާއި، މިކަމަކީ އެމްޑީޕީއާއި، ވެރިކަން ކުރާ ކޯލިޝަންގައި ހިމެނޭ އެހެން ޕާޓީތަކުގެ މެމްބަރުންނާއި، ގިނަ އަދަދެއްގެ އާންމު ރައްޔިތުންގެވެސް ބައިވެރިވުމާއިއެކު ހިންގޭ ސުލްހަވެރި ޤައުމީ ހަރަކާތެއްކަމަށެވެ.
ޝަހީދު ހުސެއިން އާދަމަކީ ފަހުގެ ތާރީހެއްގައި ދިވެހި ޤައުމުގެ ހައްގުގައި ޝަހީދުވި ޤައުމީ އަބުތާލަކަށްވާއިރު، މިފަދަ ޤައުމީ ކަމެއްގައި ޝަހީދު ހުސެއިން އާދަމްގެ ހިއްވަރުން ހިއްވަރުލިބި، ޤައުމުގެ ހައްގުގައި މަސައްކަތް ކުރުމަކީ މިއަދު ކޮންމެ ދިވެހި ދަރިއެއްގެވެސް ޤައުމީ ވާޖިބެއްކަމަށް ހީނާ ވިދާޅުވިއެވެ. އަދި މިމަސައްކަތަކީ ސިޔާސީ ގޮތުން ވަކިމަންފާއެއް ހާސިލް ކުރަން ކުރާ ކަމެއްނޫންކަމަށާއި، މިއީ ދިވެހި ފަސްގަނޑުގެ ހައްގުގައި، ރާއްޖޭގެ އަންނަން އޮތް ޖީލު ތަކަށްޓަކައި ކުރެވޭ ވަރަށް މަތިވެރި ޤައުމީ ހަރަކާތެއް ކަމަށް ހީނާ ވިދާޅުވިއެވެ.
ރާއްޖޭގައި ތިބި އިންޑިއާގެ އަސްކަރީ ސިފައިން ބޭރު ކުރުމަށް ހިންގާ ކެމްޕެއިންގައި ގޭގޭގެ ފާރުތަކުގައި އިންޑިއާއި އައުޓް ޖެހުމައި، ބެނާ ހަރުކުރުން ފަދަ ކަންކަންވެސް ދަނީ ގިނަ ރަށްތަކެއްގައި ކުރަމުންނެވެ. އިދިކޮޅު ލީޑަރު އަދި ކުރީގެ ރައީސް ޔާމީން ވިދާޅުވެފައިވަނީ، މިހަރަކާތަކީ މިއަދު ޤައުމީ ބޮޑު ހަރަކާތަކަށް ވެފައިވާއިރު، މިހަރަކަތް ހުއްޓުވުމަކީ ދެން ސަރުކާރަށްވެސް އެހާ ފަސޭހަވާނެ ކަމެއް ނޫންކަމަށެވެ.
ދިވެހިންނަކީ ދިވެހި ޤައުމުގެ ހައްގުގައި ކޮންމެ ފަދަ ޖިހާދެެއްވެސް ވާން ތައްޔާރަށް ތިބި ޤައުމަކަށްވާއިރު، މިފަސްގަނޑުން އެންމެ އިންޗިއެއްވެސް ބޭރުގެ ބާރުތަކަށް ދީގެން ތިބޭތަން ބެލުމަކީ ދިވެހި ރައްޔިތުންނަށް ފަސޭހަވާނެ ކަމެއްނޫންކަމަށެވެ.
