ރާއްޖޭގެ މިނިވަންކަމަށް ބުރޫއަރައި، މިނިވަންކަމާއި ކުޅެލަން ޖާގަދޭތަން ބަލަން ހުރުމަކީ މާހުތުރު ކަމެއްކަމަށް ވިދާޅުވެ ނޮޅިވަރަމަށް ދާއިރާގެ މެމްބަރު މުހައްމަދު ނަޝީދު (މޮސްޓަރ) ގެ ރައްދެއް ކުޅުދުއްފުށި އުތުރު ދާއިރާގެ އެމްޑީޕީގެ މެންބަރު ޔާސިރު އަބްދުލް ލަތީފަށް ދެއްވައިފިއެވެ.

ހުސެއިން އާދަމްގެ ފޮޓޯއާއިއެކު އިދިކޮޅު ކޯލިޝަނުން އިއްޔެ ކުޅުދުއްފުށީ ބައެއް ގޭގޭގެ ވަނީ "އިންޑިއާ އައުޓް" ބެނާތައް ހަރުކޮށްފައެވެ. މިކަމުގެ ނުރުހުން ފާޅުކޮށް މެމްބަރު ޔާސިރު ކުރި ޓުވީޓުގައި ވިދާޅުވީ ސިޔާސީ ބޭނުމަށް އެ ޤައުމީ ބަތޮލުގެ ފޯޓޯ ބޭނުން ނުކުރެއްވުމަށް ރައީސް ޔާމިންގެ އަރިހުން އެދޭކަމަށެވެ. ވަކި ކަމަކަށް ދަހިވެތިގެން އުޅުނަސް ކުރަންޖެހޭ ކަންކަމާއި ނުކުރަންޖެހޭ ކަންކަން ހުއްނާނެކަމަށް ޔާސިރު ވިދާޅުވިއެވެ.

ޔާސިރުގެ މިވާހަތަކަށް ރައްދު ދެއްވައި މޮސްޓަރ ވިދާޅުވީ ރާއްޖޭގެ އެންމެން ފަޚުރުވެރިވާ ޤައުމީ ބަތަލު ދިވެހި ފަސްގަނޑުގެ ހައްގުގައި ޖިހާދުވި ޖިހާދުވުން ޖޯކަކަށް ހަދައި އެވާހަކަ ދެއްކެވިއިރު، ހިމޭނުންހުރި މިއަދު ޤައުމުގެ ސިފާއުގައި ހުސެއިން އާދަމް ކުރި ޖިހާދުފަދަ ޖިހާދަކަށް ތެދުވާން ޖެހިފައިވާ ވަގުތު ކުރާ މަސައްކަތަށް ފާޑުކިޔައި ހަޖޫޖެހުމަކީ މާ ލަދުހުތުރު ކަމެއްކަމަށެވެ.

ޤައުމުގެ މިނިވަންކަމާއި، އިސްތިޤުލާލަށް ބުރޫއަރާ ފަދަ ކަންކަން ހިނގަމުންދާއިރު، އެކަންކަމަށް އެއްޗެއްނުބުނެ، ޤައުމުގެ ހައްގުގައި ކުރެވޭ މަސައްކަތަށް ފާޑުކިޔުމަކީ ޒިންމާދާރު ކަމެއްނޫންކަމަށް މޮސްޓަރ ވިދާޅުވިއެވެ. އަދި މިއީ އެއްވެސް ގޮތަކަށް ބަލައި ގަނެވޭނެ ވާހަކަތަކެއް ނޫންކަމަށް މޮސްޓަރ ވިދާޅުވިއެވެ.

ކުޅުދުއްފުށި ބޮޑުމުހައްމަދު ފަދަ މިނިވަންކަމާއި އަޅުވެތި ކަމުން ރާއްޖެ ސަލާމަތް ކުރެއްވުމަށް ވަކާލާތުކޮށް ހައްގު ޖިހާދެއްވި ވަރުގަދަ ހީރޯ އެއްގެ ދަރިފަސްކޮޅުން އައި މީހަކު ތިހާ ފިނޑިވެ ގައުމު އަޅުވެތި ކަމެއްގެ ދަށަށް ދާއިރު ތިވިސްނުމުގައި ހުރުން މާހުތުރު އަދި ކުޅުދުއްފުށްޓާއި ތިލަދުންމަތީ ކިއްކުރަން. ދިވެހިރާއްޖޭގެ ފަހުރެއް ކަމުގައިވާ ހުސައިން އާދަމް އެކުރި މަތިވެރި ޖިހާދަށް ޖޯކު ޖަހާ ފިނދަނައޭ ގޮވިވަގުތު އެއްޗެއް ބުނަންނުކެރި އެފަދަ ބައެއްގެ ފަސްބައިގައި އެލި ތިކުރަނީ މާހުތުރު އަދި ކުޅުދުއްފުށްޓާއި ތިލަދުންމަތީ ކިއްކުރަން ގައުމީ އަބުތޯލުންނާއި ގައުމުވެސް ލަދުވެތިވާ ހުތުރު ކަންތައްތައް ނޫންބާ.

– މޮސްޓަރ ވިދާޅުވިއެވެ.

ރާއްޖޭގައި ތިބި އިންޑިއާގެ ސިފައިންނާއި ދެކޮޅަށް އިދިކޮޅުން ހިންގަމުންދާ "އިންޑިއާ އައުޓް" ކެމްޕެއިން ހުއްޓުވުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. ރާއްޖޭގެ އެކި ކަންކޮޅުތަކުގައި އިންޑިއާ އައުޓްގެ ގިނަ އެއްވުންތަކާއި، މުޒާހަރާތައްވެސް ކުރަމުންދާއިރު، އިދިކޮޅުން ބުނެފައިވަނީ މިހަރަކާތް ހުއްޓާލާނީ ރާއްޖޭގައި ތިބި އިންޑިއާގެ އަސްކަރީ ސިފައިން ފޭބުމުންކަމަށެވެ.

އިންޑިއާ ސިފައިން ރާއްޖެއިން ފޮނުވާލުމަށް ހިންގަމުންދާ ހަރަކާތް އިތުރަށް ފުޅާވެފައިވަނީ ރައީސް ޔާމީން ޖަލުން މިނިވަން ވުމަށްފަހުގައެވެ. މިހަރަކާތުގައި އިސްކޮށް މިހާރު ބައިވެރިވަމުންދަނީވެސް ރައީސް ޔާމީނެވެ.