އިރާގުގެ ވެރިރަށް ބައުދާދުގެ އެއަރާޕޯޓު 6 މިސައިލް ހަމަލާއެއް ފޮނުވާލާ، މީގެ ތެރެއިން ތިން ހަމަލާއެއް، އެއަރޕޯޓު ކައިރީގައި އޮންނަ އެމެރިކާގެ އެއަރބޭސްއަކާއި ޖެހިގެން ހުންނަ އިމާރާތަކަށް އަމާޒު ވެފައިވާ ކަމަށް އިރާގުގެ ފުލުހުން ހާމަ ކޮށްފިއެވެ. ފުލުހުން ހާމަ ކޮށްފައި ވާގޮތުގައި މި ހަމަލާތަކުގައި އެއަރޕޯޓުގައި އޮތް، ބޭނުން ނުކުރާ މަތިންދާ ބޯޓަކަށް ވަނީ ގެއްލުން ލިބިފައެވެ.
މިހަމަލާތަކުގައި، އިތުރު މީހަކަށް ނުވަތަ އިތުރު ތަނަކަށް ގެއްލުން ލިބިފައި ވާކަމެއް އިރާގުގެ ފުލުހުން ހާމަ ކޮށްފައެއް ނުވެއެވެ. ފުލުހުން ހާމަކޮށްފައި ވާގޮތުގައި، ގެއްލުން ލިބިފައިވާ މަތިންދާ ބޯޓަކީ އިރާޤީ އެއަރވޭސްގެ ބޭނުން ނުކުރާ މަތިންދާ ބޯޓެއް ކަމުގައެވެ.
އޭވިއޭޝަން އޮތޯރިޓީއާއި ހަވާލާދީ އިރާގުގެ ދައުލަތުގެ ޓީވީން ރިޕޯޓު ކޮށްފައިވާ ގޮތުގައި މި ހަމަލާގެ ސަބަބުން އުދުހުންތަކަށް އެއްވެސް އަަސަރެއް ކޮށްފައެއް ނުވެއެވެ.
އެމެރިކާގެ އެއަރބޭސް، ކޭމްޕް ވިކްޓަރީ ގާއިމް ކޮށްފައި ހުންނަނީ، ބައުދާދުގެ އެއަރޕޯޓު ހިމެނޭ ސަރަހައްދުގައެވެ. އެމެރިކާއާއި އިރާގުގެ އޮފޮޝަލުން، އިރާނުން އެހީތެރިވެދޭ ކަމަށް ތުހުމަތު ކުރާ ހަގުރާމަވެރި ޖަމާއަތްތަކުން ވަނީ ފާއިތުވެދިޔަ އަހަރުތަކުގައި މި ބޭސްއަށް ގިނަ ހަމަލާތަކެއް ދީފައެވެ. މި ޖަމާއަތްތަކަކީ، އެމެރިކާ ސިފައިން އިރާގުގައި ތިބުމާއި ދެކޮޅުހަދާ ފަރާތްތަކެވެ.
