އަތޮޅުތެރޭގެ ތިން ރަށެއްގައި ހޮސްޕިޓަލް ކޮންޓްރެކްޓާ ފައިނޭންސް އުސޫލުން އަޅައިދޭނެ ބަޔަކު ހޯދުމަށް އިއުލާންކޮށްފިއެވެ. ހޮސްޕިޓަލް އެޅުމަށް އިއުލާންކޮށްފައިވަނީ ހއ. އިހަވަންދޫ، ނ. ކެނދިކުޅުދޫ އަދި ޅ. ހިންނަވަރުގައެވެ. އެ ރަށްރަށުގައި ހޮސްޕިޓަލް ޤާއިމްކުރުމަކީ މިސަރުކާރުގެ ވަޢުދެކެވެ.

ފިނޭންސް މިނިސްޓްރީން ކޮށްފައިވާ އިއުލާންގައި ވަނީ އެ ތިން ޕްރޮޖެކްޓްގެ ބީލަން ހުޅުވުން އޮންނާނީ އަންނަ މަހުގެ 28 ވާ ހޯމަ ދުވަހުގެ 13:00 ގައި އެ މިނިސްޓްރީގައިކަމަށެވެ. އެ ހޮސްޕިޓަލްތައް އެޅުމަށް ޝަޢުގުވެރިވާ ދިވެހި ކުންފުނިތަކަށް މި މަޝްރޫއުތަކުގެ ބީލަމުގައި ބައިވެރިވެވެނީ ޕްލޭނިން މިނިސްޓްރީން އެކުލަވާލާފައިވާ "އިމާރާތްކުރުމުގެ އަމަލީ މަސައްކަތް ކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ރަޖިސްޓަރީވެ އަދި ވަކި ގުރޭޑްތަކަކަށް ޝަރުތު ހަމަވާ ކުންފުނިތަކަކަށެވެ. ނަމަވެސް ބޭރުގެ ކުންފުންޏަކުން މި މަޝްރޫއުތަކުގެ ބީލަމުގައި ބައިވެރިވާނަމަ ޢިމާރާތްކުރުމުގެ އަމަލީ މަސައްކަތް ކުރާ ފަރާތްތަކުގެ ޤަވާއިދުގައި ރަޖިސްޓްރީ ވާކަށް ނުޖެހެއެވެ.

ތިން ރަށުގައި ހޮސްޕިޓަލް އެޅުމަށް ބިޑް ސެކިއުރިޓީގެ ގޮތުގައި 690،000 ރުފިޔާ ދައްކަންޖެހެއެވެ. ބޮޑް ސެކިއުރިޓީ ފައިސާ ދިވެހި ރުފިޔާއިން ނުވަތަ ޔޫއެސް ޑޮލަރުން ދެއްކޭނެ ކަމަށާއި، އޭގެ މުއްދަތަކީ ބިޑު ހުޅުވާ ތާރީހުން ފެށިގެން 148 ދުވަސްކަމަށް އެ އިޢުލާންގައިވެއެވެ.

ހއ. އިހަވަންދޫގައި އަޅާ ހޮސްޕިޓަލަށް ތިން އަހަރުގެ ތެރޭގައި 71.11 މިލިއަން ރުފިޔާ ކުޚަރަދުވާނެކަމަށް ސަރުކާރުން ލަފާކުރެއެވެ. އަދި ކެނދިކުޅުދޫއާއި ހިންނަވަރުގައި ޤާއިމްކުރާ ހޮސްޕިޓަލްތަކުގެ ތެރެއިން ކޮންމެ ހޮސްޕިޓަލަކަށް 52.11 މިލިއަން ރުފިޔާ 3 އަހަރު ތެރޭ ޚަރަދުވާނެކަމަށް ސަރުކާރުން ވަނީ ލަފާކޮށްފައެވެ.

ތިން ހޮސްޕިޓަލެއް ޤާއިމްކުރުމަށް ބަޔަކު ހޯދުމަށް އިއުލާންކޮށްފައިވާއިރު، ސަރުކާރުން މިމަހު ވަނީ ހދ.ކުޅުދުއްފުށި ސިޓީއާއި ގދ.ތިނަދޫގައި ތަރައްޤީކުރުމަށް ހަމަޖެހިފައިވާ ޓަރޝަރީ ހޮސްޕިޓަލްތައް ޑިޒައިންކޮށް ކުރަހާއިދޭނެ ބަޔަކު ހޯދުމަށްވެސް އިއުލާންކޮށްފައެވެ.

ރަށްރަށުގެ ހޮސްޕިޓަލް އަދި ހެލްތު ސެންޓަރުތައް އެޅުމަށާއި ޖާގަ އިތުރުކުރުމަށް 448 މިލިއަން ރުފިޔާ ބަޖެޓްގައި މިއަހަރު ހިމަނާފައިވެއެވެ.