އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގައި 7 ވޯޓު ފޮށި ބެހެއްޓުމަށް ނިންމައި، ވޯޓުލުމަށް ރަޖިސްޓަރީ ކޮށްފައިވާ ފޮށީގެ މަޢުލޫމާތު ހިމެނޭ ރަޖިސްޓަރީ ޢާންމުކުކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.
އިލެކްޝަންސް ކޮމިޝަނުން މީގެ ކުރިން ނިންމާފައިވަނީ ކޮމަންޑޫ ދާއިރާގެ އިންތިޚާބުގައި 6 ފޮށި ބެހެއްޓުމަށެވެ. ނަމަވެސް ކޮމަންޑޫ ދާއިރާގެ ވޯޓު ލިބުމުގެ ހައްގު ލިބިގެންވާ މީހުންގެ ފައިނަލް ލިސްޓާއިއެކު، ވޯޓު ލެވޭނެ ފޮށިތައް އެނގޭނެހެން އާންމުކުރި ލިސްޓުގައި ވޯޓު ފޮއްޓެއް އިތުރުވެފައިވަނީ މާލެ ސަރަހައްދުގައެވެ. މާލެ ސަރަހައްދަށް ފޮއްޓެއް އިތުރުވެފައިވަނީ ރީ-ރަޖިސްޓްރީ ވުމަށް ހުޅުވާލި ފުރުސަތުގައި ރަޖިސްޓްރީ ކުރި މީހުންގެ ނިސްބަތަށް ބެލުމަށް ފަހުއެވެ.
ކޮމަންޑޫ ދާއިރާގެ އިންތިޚާބުގައި ބެހެއްޓުމަށް ހަމަޖެހިފައިވާ ވޯޓު ފޮށިތަކުގެ ތަފްސީލު:
– ށ. ފޯކައިދޫ ސްކޫލް – 2 ފޮށި
– ށ. މަރޮށި އިޖުތިމާއީ މަރުކަޒު – 1 ފޮށި
– ށ. އަތޮޅު ތައުލީމީ މަރުކަޒު (ކޮމަންޑޫ) – 1 ފޮށި
-ށ. ކޮމަންޑޫ ޕްރީސްކޫލް – 1 ފޮށި
-އިސްކަންދަރު ސްކޫލް – 2 ފޮށި
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓްލުމުގެ ހައްޤު ލިބިގެންވެއެވެ. އެ ރަޖިސްޓްރީއާ މެދު ޝަކުވާ ހުށަހެޅުމުގެ ފުރުސަތު މާދަމާ ހެނދުނު 9 ޖަހާއިރު ހުޅުވާލާނެ އެވެ. އަދި އެ ފުރުސަތު ހަމަވާނީ އަންނަ ބުރާސްފަތި ދުވަހުގެ މެންދުރު ފަހު 3 ޖެހުމާ ހަމަ އަށެވެ. ޝަކުވާ ހުށަހެޅޭނީ ހަމައެކަނި ވޯޓުލުމަށް ރަޖިސްޓްރީ ވެފައިވާ ތަނުގެ މައުލޫމާތާ ގުޅޭ ގޮތުންނެވެ.
ކޮމަންޑޫ ދާއިރާގެ އިތުރުން އެދުވަހު ބޭއްވުމަށް ހަމަޖެހިފައިވާ އަންހެނުންގެ ކޮމެޓީތަކުގެ އިންތިޚާބުތަކުގައި ވޯޓުލާ މީހުންގެ ފޮށި އެގޭނެހެން ވަނީ މިލިސްޓާއިއެކު ޝަކުވާއަށް ހުޅުވާލާފައެވެ.
މި ރަޖިސްޓަރީއަށް އެއްވެސް ފަރާތަކުން ޝަކުވާ ހުށަހަޅަން ބޭނުންވާނަމަ ޝަކުވާ ހުށަހަޅާނީ "ވޯޓު ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީއާ ބެހޭ ޝަކުވާ ހުށަހަޅާ ފޯމު" އިން ކަމަށް އިލެކްޝަނުން ވަނީ ބުނެފައެވެ. ޝަކުވާ ހުށަހަޅާ ފޯމު ކޮމިޝަނުގެ ވެބްސައިޓް (www.elections.gov.mv) އިން ލިބެން ހުންނާނެއެވެ. ފޯމު ބަލައިގަތުމުގެ އިންތިޒާމު ހަމަޖެހިފައިވަނީ މި ކޮމިޝަނުގެ އީމެއިލް އެޑްރެސް ކަމަށްވާ، [email protected] އަށް ފޮނުވައިގެންނެވެ.
