ކޯވިޑް-19ގެ ވައިރަހުގެ އައު ވޭރިއަންޓެއްކަމަށްވާ އޮމިކްރޯންއަށް ރާއްޖެއިން ނެގުނު ސާމްޕަލްތަކުގެ ތެރެއިން 74 ސާޕްޕަލް ކޯވިޑަށް ޕޮޒިޓިވްވެފައިވާއިވާކަމަށް އެޗްޕީއޭއިން ވިދާޅުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބޭއްވި ނޫސްވެރިންގެ ބައްދަލުވުމެއްގައި އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ ރާއްޖެއިން މިހާތަނަށް އޮމިކްރޯންއަށް ހެދުނު 1،196 ސާމްޕަލްގެ ތެރެއިން 74 ސާމްޕަލް ކޯވިޑަށް ޕޮޒިިވް ވެފައިވާކަމަށެވެ. މީގެ ތެރެއިން މިމަހުގެ 11 ވަނަ ދުވަހު ފޮނުވުނު 100 ސާމްޕުގެ ތެރެއިން 51 ސާމްޕަލް ކޯވިޑަށް ޕޮޒިޓިވް ވެފައިވާކަމަށެވެ.
ރާއްޖެއިން އޮމިކްރޯންއަށް ޓެސްޓު ކުރެވޭނެ ގޮތެއް އަދި ނެތެވެ. އެހެންކަމަށްވުމުން މިޓެސްޓުތަކުގެ ސާމްޕަލްގެ ނަތީޖާ ހޯދަނީ ބޭރަށް ފޮނުވައިގެންނެވެ. ޑރ.އަފްޒަލް ވިދާޅުވީ، މީގެކުރިން ފެތުރުނު ޑެލްޓާ ވޭރިއަންޓަށްވުރެ އޮމިކްރޯން ކޭސްތައް ފެތުރޭ މިންވަރު ހަލުވިކަމަށާއި، އެގޮތުން ކޭސްތައް ވަރަށްއަވަހަށް ޑަބަލްވަމުން އަންނާނެކަމަށެވެ. މިގޮތުން 1 ދުވަހާއި 3 ދުވަސްތެރޭ ކޭސްތައް ޑަބަލް ވާކަން އޮމިކްރޯން އުޅޭ ޤައުމުތަކުން ފާހަގަވާކަމަށެވެ.
ކޯވިޑް ކޭސްތަކުގެ އަދަދު މަދުނުވެ ކޮންމެ ދުވަހަކު އަދަދުތައް އިތުރުވަމުން އަންނަތީ އުފެދޭ ސުވާލަށްވެސް ޑރ. އަފްޒަލްވަނީ ޖަވާބުދެއްވާފައެވެ. ޑރ. އަފްޒަލް ވިދާޅުވީ ކޮންމެ ގޮތަކުން ނަމަވެސް މިބަލި ޖެހޭނީ މި ބަލި ޖެހިފައިވާ މީހެއްގެ ކައިރިން އެ ބައްޔަށް ހުށައެޅިގެންކަމަށެވެ. އަދި މިބަލީގެ ޖަރާސީމަށް ހުށައެޅޭނީ ވަކި ކަންކަމެއް ދޫކޮށްލެވެމުންކަންވެސް ޑރ. އަފްޒަލް ވިދާޅުވިއެވެ. އަފްޒަލް ވިދާޅުވީ ބަލީގެ ކިތަންމެ ވަރުގަދަ ވައްތަރެއް އުޅުނު ނަމަވެސް އެބަލި ޖެހިފައިވާ މީހަކާއި ދިމާނުވާ ހިނދަކު ބަލި ފެތުރިގެން ނުދާނެކަމަށެވެ.
ރާއްޖެއިން ޕޮޒިޓިވްވާ މީހުންގެ އަދަދު މައްޗަށް ގޮސްފައިވާއިރު، ބަލީގައި އެދުމަތި ކޮށްގެން ފަރުވާދޭ މީހުންގެ އަދަދުވެސް ވަނީ މައްޗަށް ގޮސްފައެވެ. މިހާރު ހޮސްޕިޓަލުގައި ފަރުވާ ދެމުންދާ މީހުންގެ އަދަދުވަނީ 48 އަށް އަރާފައެވެ. މިވަގުތުވެސް 13،035 މީހަކު ވަނީ ބައްޔަށް ޕޮޒިޓިވްވެ ފަރުވާ ހޯދަމުންނެވެ.
