އޮލިމްޕިކް ސުލްހައިގެ އެއްބަސްވުމަށް އަހައްމިއްޔަތުކަން ޤައުމުތަކުން ދައްކާދިނުމަށް އދގެ އާއްމު މަޖިލީހުގެ ރައީސް އެދިވަޑައިގެންފިއެވެ.
އޮލިމްޕިކް ޓްރޫސް ނުވަތަ އޮލިމްޕިކް ސުލްހައިގެ އެއްބަސްވުމަކީ އޮލިމްޕިކް ގޭމްސްއާއި ގުޅިގެން 18 ވަނަ ބީސީގައި ގަދީމީ ގްރީކްގައި ތަޢާރަފު ކުރެވުނު އޮލިމްޕިކް ގޭމްސްގެ މުހިންމު އަސާސެކެވެ. 1992 ގައި ބައިނަލްއަގުވާމީ އޮލިމްޕިކް ކޮމިޓީއިން މި އާދަ އަލުން ދިރުވުމަށްޓަކައި، ގަދީމީ ދުވަސްވަރުހެން، މިހާރުގެ އޮލިމްޕިކްގެ ދުވަސްވަރުގައިވެސް އޮލިމްޕިކް ސުލްހައިގެ އެއްބަސްވުން ޤާއިމުކުރުމަށް ގޮވާލަން ނިންމިއެވެ.
މި އެއްބަސްވުމުގައި ގޮވާލަނީ އޮލިމްޕިކް ގޭމްސް ނިމެންދެން ހަނގުރާމަ އަދި ހަމަނުޖެހުންތަކުން ބަރީއަވެ ތިބުމަށެވެ. މިގޮތުން އޮލިމްޕިކް ގޭމްސް ފެށުމަށް 7 ދުވަހަށް ވުމުން، އަދި ކުޅިވަރުތައް ނިމިގެން 7 ދުވަސް ވަންދެން އެއްވެސް ހަނގުރާމައެއް ނުކުރުމަށް އދގެ ގަރާރަކުން 1993 ގައި ފާސްވިއެވެ.
2005 ވަނަ އަހަރުގެ ވާރލްޑް ސަމިޓް އައުޓްކަމްގައި، ކުޅިވަރުގެ ޒަރިއްޔާއިން ހަމަޖެހުމާއި ތަރައްޤީ ގެނެވޭނޭ ކަމަށް ދުނިޔޭގެ ޤައުމުތަކުގެ ލީޑަރުން ފާހަގަކުރިއެވެ. އަދި އެކްޝަން ޕްލޭނެއް ހަދައި އާންމު މަޖިލީހުގައި މިކަމާއި ގުޅޭ އިތުރު މަސައްކަތް ކުރުމަށްވެސް ނިންމިއެވެ. މިގޮތުން 3 ނޮވެމްބަރ 2005ގައި އޮލިމްޕިކް ކުޅިވަރުތައް މެދުވެރިކޮށް ރައްކާތެރި އަމާން ދުނިޔެއެއް ބިނާކުރުމުގެ ނަމުގައި ޤަރާރެއް ފާސްކުރެވުނެވެ. އަދި ކޮންމެ ދެއަހަރަކުން އެއް އަހަރު ކޮންމެ އޮލިމްޕިކް ގޭމްސްއެއް ފެށުމުގެ ކުރިން މި ޤަރާރު އާކުރުމަށް ހަމަޖެހުނެވެ.
އދގެ އާއްމު މަޖިލީހުގެ ރައީސް އަބްދުﷲ ޝާހިދު ވިދާޅުވީ ކުޅިވަރަކީ ދެމެހެއްޓެނެވި ތަރައްޤީ އަށް މަގުފަހިކޮށްދޭ ކަމެއްކަމަށް، ދެމެހެއްޓެނެވި ތަރައްޤީގެ އެޖެންޑާ 2030 އިން ވަނީ ފާހަގަ ކޮށްފައިކަމަށެވެ. އަދި އަމާންކަމާއި ތަރައްޤީ ހާސިލް ކުރުމުގައި ކުޅިވަރުގެ ދައުރު އިތުވެފައިވާ މިންވަރު ހާމަކުރަމުން ކުޅިވަރުން ޒުވާނުންނާއި އަންހެނުންގެ ކުރިއެރުމަށާއި، އަދި ވަކިވަކި ފަރުދުންނަށާއި، މުޖުތަމާއަށާއި، ސިއްޙަތާއި ތައުލީމަށް، އަދި އިޖްތިމާއީ ބައިވެރިވުން ފުޅާވުމުގައި ކުޅިވަރުގެ ދައުރު އިތުރުވެފައިވާ މިންވަރު ވަނީ ފާހަގަކޮށްފައިކަމަށްވެސް ޝާހިދު ވިދާޅުވިއެވެ.
ޝާހިދު ވިދާޅުވީ 2 ޑިސެމްބަރ 2021 ގައި އދ އާންމު މަޖިލީހުން ގަރާރެއް ފާސްކޮށް، އދ މެމްބަރު ހުރިހާ ޤައުމުތަކުން އޮލިމްޕިކް ސުލްހައިގެ އެއްބަސްވުގައި ހިފެހެއްޓުމަށް ނިންމާފައިވާކަމަށެވެ. މިގޮތުން މިފަހަރު ބެއިޖީންގައި ބާއްވާ އޮލިމްޕިކް ގޭމްސް ފެށެން 7 ދުވަހުގެ ކުރިން ހުރިހާ ހަނގުރާމައެއް ހުއްޓާލައި، އަދި ކުޅިވަރުތައް ނިމި ހަފްތާއެއް ވަންދެން ދުނިޔޭގެ އެއްވެސް ޤައުމަކުން ހަނގުރާމައެއް ނުކުރުމަށް އެދި ވަނީ މެމްބަރު ޤައުމުތަކުން ގަރާރު ފާސްކޮށްފައިކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އޮލިމްޕިކް ހަރަކާތުން ކުޅިވަރުގެ ރަނގަޅު ސިފަތައް އިންސާނިއްޔަތަށް ފޯރުކޮށްދެވޭކަމަށާއި ދުނިޔޭގެ އެކި ކަންކޮޅުތަކުން ކުޅިވަރުކުޅޭ އެކި ފަރާތްތައް އެއްތަނަކަށް އެއްވެ، ޤައުމުތަކުގެ މެދުގައި ގުޅުން ބަދަހިވެ، އަމާން ދުނިޔެއެއް ޤާއިމު ކުރުމަށް އެހީވެދޭކަމަށެވެ. އަދި މިފަދަ ކަންކަމަކީ އދ. އުފެދުމުގެ މަޤްސަދުތަކުގެ ތެރޭގައިވެސް ހިމެނޭ ކަންކަންކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ކުޅިވަރާއި އޮލިމްޕިކްގެ ޒަރީޢާއިން ޞުލްޙައާއި އިންސާނުންގެ ވިސްނުމާއި ފިކުރު ކުރިއެރުވުމަށް އޮލިމްޕިކް އަދި ޕެރަލިމްޕިކް އެތުލީޓުން ގެ ލީޑަރޝިޕުން ކުރާ މަސައްކަތަށް މަރުޙަބާ ކިޔާކަމަށެވެ. އަދި ޞުލްޙައާއި ހަމަނުޖެހުން ޙައްލުކުރުމަށާއި، ކުޅިވަރުގެ ޒަރީޢާއިން އޮލިމްޕިކް އަދި ޕެރަލިމްޕިކް ވެލިއުސް ކުރިއެރުވުމަށް ޤައުމީ އަދި ބައިނަލްއަޤްވާމީ ޕްރޮގްރާމްތައް އެކުލަވާލުމަށް އ.ދ.ގެ އެކި ޤައުމުތަކުން ދެއްވާ އަހަންމިއްޔަތަށްވެސް މަރުހަބާ ކިޔާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އާންމު މަޖިލީހުގެ 76 ވަނަ ސެޝަންގެ ރައީސްގެ ހައިސިއްޔަތުން، އެމަނިކުފާނު މެމްބަރު ޤައުމުތަކަށް އެދި އިލްތިމާސް ކުރަނީ، އޮލިމްޕިކް ސުލްހައިގެ އެއްބަސްވުމަށް ދޭ އަހައްމިއްޔަތުކަން ދައްކާދިނުމަށާއި، މި ޓްރޫސްގެ މައްޗަށް ބިނާކޮށް ޞުލްޙައާއި އަމާންކަމުގެ ޘަޤާފަތެއް ކުރިއެރުވުމަށާއި، އަދި އެ ޘަޤާފަތް އިތުރަށް ހަރުދަނާ ކުރުމަށް، ޤައުމީ، ސަރަޙައްދީ އަދި ދުނިޔޭގެ ފެންވަރުގައި ހަރުދަނާ ފިޔަވަޅުތަކެއް އެޅުމަށްކަމަށެވެ. އަދި ގަދީމީ ޒަމާނުގައި އަސްލު އޮލިމްޕިކް އެއްބަސްވުމުގައި ހިމެނިފައިވާ ކަންކަމަށް ރިޢާޔަތްކޮށް ފާސްކޮށްފައިވާ ސުލްހައިގެ ޤަރާރުގައި ބަޔާންކޮށްފައިވާ ފަދައިން، ދުނިޔޭގެ އެކި ކަންކޮޅުތަކުގައި ހަތިޔާރާއި އެކު މިހާރު ހިނގަމުންދާ ހަނގުރާމަތަކުގައި ބައިވެރިވާ ހުރިހާ ފަރާތްތަކަކުންވެސް އޮލިމްޕިކް ޓްރޫސްގައި ވާ މުއްދަތަށް ހަނގުރާމަ ހުއްޓާލުމަށް އެއްބަސްވުމަށާއި، ޞުލްޙަވެރިކަމާއެކު މައްސަލަ ޙައްލުކުރުމުގެ ފުރުޞަތު ފަހިކޮށްދެއްވުމަށް އދގެ އާއްމު މަޖިލީހުގެ ރައީސް އަދި ރާއްޖޭގެ ހާރިޖީ ވަޒީރު އަބްދުﷲ ޝާހިދު ގޮވާލެއްވިއެވެ.
