ގދ.ތިނަދޫގައި މިވަގުތު ބައި އިލެކްޝަނެއް ނެތްކަމުގައި ވީނަމަވެސް، ގދ.ކާޑެއްދޫ އެއަރޕޯޓް ޖެޓީ ވެއްޓި ލިބިފައިވާ ގެއްލުންތަކަށް ވީހާވެސް އަވަހަކަށް ހައްލު ހޯދައި ދެއްވުމަށް ގދ.އަތޮޅު ކައުންސިލް ރައީސް ހަސަން ފައިހަތު ވިދާޅުވެއްޖެއެވެ.
ގދ.ކާޑެއްދޫ އެއަރޕޯޓް ޖެޓީ ވެއްޓުމާއި ގުޅިގެން އެކަމުގެ ކަންބޮޑުވުން އެދާއިރާގެ ގިނަ ރައްޔިތުން ދަނީ ފާޅު ކުރަމުންނެވެ. އެއަރޕޯޓް ބޭނުންކުރާ ފަރާތްތަކުން އެރަށަށް އަރާ ފޭބުމަށް ބޭނުންކުރަމުން އައި ޖެޓީގެ ބޮޑު ބައެއް މިއަދު ވަނީ ކަނޑައިގެން ވެއްޓިފައެވެ.
މިކަމުގެ ކަންބޮޑުވުން ފާޅު ކުރައްވައި ގދ.އަތޮޅު ކައުންސިލް ރައީސް ކުރެއްވި ޓުވީޓުގައި ވިދާޅުވީ މިވަގުތު އެދާއިރާގައި ބައި-އިލެކްޝަނެއް ނެތްކަމުގައި ވީނަމަވެސް ޖެޓީގެ މައްސަލައަސް އަވަސް ހައްލެއް ހޯދައި ދިނުމަށް އެދޭކަމަށެވެ. މިފަދަ ކަންކަމުގައި އެއްވެސް ރަށެއް އެއްވެސް ރައްޔިތެއް ތަފާތު ނުކޮށް، އަމަލު ކުރުމަކީ ސަރުކާރަށް ލާޒިމް ކަމަކަށްވާއިރު، މިމައްސަލަ ހައްލުކޮށް ދިނުމަށް އިޚުލާސްތެރި ކަމާއިއެކު އަވަސް މަސައްކަތްތަކެއް ކޮށްދެއްވުމަށް ފައިހަތު ވަނީ ސަރުކާރަށް ގޮވާލާފައެވެ.
ގދ.ކާޑެއްދޫ ޖެޓީ ވެއްޓި ބަޔަކަށް ފިޒިކަލް ގެއްލުމެއް ނުލިބުނު ކަމީ ނަސީބެއް. މިފަދަ ބޮޑެތި ކަންކަން ހައްލު ކުރުމުގައި ރައްޔިތުންނާއި، މެދު ފަރުވާކުޑަ ނުކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އަރިހުން އެދެން. ބައި-އިލެކްޝަނެއް ނެތަސް ކާޑެއްދޫގެ މަސައްކަތް އަވަސްކޮށް ދެއްވުމަށް އެދެން.
– ފައިހަތު ވިދާޅުވިއެވެ.
G. Dh. Kaadehdhoo Jetty vehtti bayakah physical gellumeh nulibubu kamee naseebeh. Mifadha bodethi kankan hallu kurumugai rayyithunnaa medhu faruvaakuda nukurumah RJ @ibusolih ge arihun edhen. By-election eh nethas kaadehdhoo ge masakai avas kohdhehvumah edhen. pic.twitter.com/ubrba8Q1h9
— Faihath (@faihath) January 21, 2022
ފައިހަތު މިފަދައިން ވިދާޅުވީ، އަންނަ މަހުގެ ފަސް ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަނާއި ދިމާކޮށް، އެދާއިރާގައި ބަޖެޓްވެސް ނުކުރެވޭ އަދި ފައިސާވެސް ހަމަނުޖެހިވާ ޕްރޮޖެކްޓްތައް ކުއްލިއަކަށް ފެށިގެން ކުރިއަށްދާތީ އެކަމަށް އަމާޒުކޮށް ކަމަށް ބެލެވެއެވެ. ފައިހަތުގެ އިތުރުން ޖެޓީ ވެއްޓުމުގެ ކަންބޮޑުވުން މަޑަވެލި ދާއިރާގެ މެންބަރު ޙުސައިން ފިރުޝާންވެސް ވަނީ ފާޅުކުރައްވާފައެވެ.
ފިރުޝާން ވިދާޅުވީ، ހުވަދު އަތޮޅުގެ ރިސޯޓްތަކުން ގިނަ ޢަދަދެއްގެ ފަތުރުވެރިން ބޭނުންކުރަންޖެހޭ އެ ބަނދަރު އެ ހާލަތުގައި އޮތުމަކީ ދެރަކަމެއްކަމަށެވެ. މިކަމުގެ ސަބަބުން ބޯޑެތި ދަތި އުނދަގޫތަކާއި ކުރިމަތިވާނެކަމަށާއި އަވަސް ހައްލެއް ބޭނުންކަމަށް، ރައީސް ޞާލިޙާއި ޓްރާންސްޕޯޓް މިނިސްޓަރ އާއިޝަތު ނަހުލާ ޓެގް ކުރައްވާ ފިރުޝާން ވިދާޅުވިއެވެ.
ކޮމެންޓު ފޮނުވާ