ރައްޔިތުންގެ މަޖިލީހުގެ ކޮމަންޑޫ ދާއިރާގެ އިންތިޚާބުގައި ވާދަކުރާ އެމްޑީޕީގެ ކެނޑިޑޭޓް މުޙައްމަދު ރާޝިދުގެ ކެމްޕެއިނަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މާދަމާ ކޮމަންޑޫއަށް ވަޑައިގަތުމަށް ނިންމަވައިފިއެވެ.
އެމްޑީޕީން ބުނީ މާދަމާރޭ ރާޝީދުގެ ކެމްޕެއިންގައި ފޯކައިދޫގައި ޖަލްސާއެއް އޮންނާނެކަމަށާއި، ދެ ރައީސުން އެ ޖަލްސާގައި ވާހަކަފުޅު ދައްކަވާނެކަމަށެވެ. މިއީ މިދިޔަ އަހަރުގެ މެއި މަހު ރައީސް ނަޝީދު އަވަހާރަކޮށްލުމަށް ދިންހަމަލާއަށްފަހު ދެ ރައީސުން އެއްތަނަކުން މިފަދަ ސިޔާސީ ހަރަކާތެއްގައި ބައިވެރިވެވަޑައިގަންނަވާ ފުރަތަމަފަހަރެވެ.
ރާޝިދުގެ ކެމްޕެއިންގައި ފޯކައިދޫގައި ބާއްވާ ޖަލްސާގައި ބައެއް ވަޒީރުންވެސް ބައިވެރިވެވަޑައިގަންނަވަނެކަމަށް އެމްޑީޕީން ބުންޏެވެ.
ރާޝިދުގެ ކެމްޕއިން ހަރަކާތުގައި ބައިވެރިވެވަށައިގަތުމަށް ރައީސް ޞާލިޙް މީގެ ކުރިންވެސް އެ ދާއިރާއަށް ވަޑައިގެން ކެމްޕެއިން ކޮށްދެއްވާފައިވެއެވެ. ރައީސުލްޖުމްހޫރިއްޔާގެ ނާއިބާއި، ބައެއް ވަޒީރުންނާއި، އދ.ގެ އާންމު މަޖިލީހުގެ ރައީސް އަދި ޚާރިޖީ ވަޒީރު ޢަބްދުﷲ ޝާހިދުވެސް އެދާއިރާއަށް ވަޑައިގެން ރާޝިދަށް ކެމްޕެއިން ކޮށްދެއްވާފައިވެއެވެ.
ކޮމަންޑޫ ދާއިރާގެ ބައި އިލެކްޝަން ވެފައިވްނީ ވަރަށް ޥާދަވެރި އަދި ފޯރިގަދަ އިންތިޚާބަކަށެވެ. އެ ދާއިރާއަށް ވާދަކުރައްވާ ތިން ކެނޑިޑޭޓުންވެސް ގެންދަވަނީ ވަރަށް ވާދަވެރި ކެމްޕެއިނެއް ކުރައްވަމުންނެވެ.
އިންތިޚާބާއި ދިމާކޮށް ސަރުކާރުން ވަނީ އެ ދާއިރާގައި ގިނަ މަޝްރޫޢުތަކެއްް ފަށްޓަވާފައެވެ. މިއާއެކު ބައެއް ފަރާތްތަކުން ވަނީ މިއީ އިންތިޚާބަށް ނުފޫޒްފޯރުވުންކަމަށް ސިފަކުރައްވާ ސަރުކާރަށް ފާޑުވިދާޅުވެފައެވެ.
