ރާއްޖޭގެ އެކި ކަންކޮޅުތަކުން އަބަދުވެސް އެންމެ ބޮޑަށް ކުރާ ޝަކުވާއަކީ، ތަރައްޤީ ނުލިބި އެންމެ އަސާސީ ހައްގުތަކުންވެސް ރައްޔިތުން މަޚްރޫމުވެފައިވާ ކަމުގެ ޝަކުވާއެވެ. ފެނާއާއި، ނަރުދަމާ، ބަނދަރު، ތައުލީމް، ޞިއްޚީ ފަރުވާ އެކަށީގެންވަ މިންވަރާއި ގާތަށްވެސް ލިބެން ނެތްކަމުގެ ޝަކުވާއެވެ.
ރާއްޖެއަށް ތަޢާރަފްވި ޒަމާނީ ޑިމޮކްރަސީއާއިއެކު ވެރިކަމަށް ވަޑައިގަތުމަށް މަސައްކަތް ކުރާ ކޮންމެ ޕާޓީއަކުންވެސް އަންނަނީ ބޮޑެތި ވަޢުދުތަކާއި އަހުދުތައް ވެގެންނެވެ. ނަމަވެސް ވެރިކަން ލިބި ބާރުވެރިކަން ލިބުމުން ވެފައިވާ ވައުޢުދުތަކާއި އަހުދުތަކަށްވުރެ ބޮޑަށް ފެނިގެންދަނީ އަމިއްލަ މަންފާއާއި ޕާޓީގެ މަސްލަހަތު އިސްވެގެންދާ ތަނެވެ.
މިހާރު އޮތް ސަރުކާރަކީވެސް ރައްޔިތުންނަށް ގިނަ ވައުދުތަކެއް އެއާއިއެކު ވެރިކަމަށް އައި ސަރުކާރެކެވެ. ސަރުކާރަށް ދައުރުގެ ބާކީ 2 އަހަރެއްހާ ދުވަސް އޮތްއިރު، ވަޢުދުތަކުގެ ބޮޑު އިންސައްތައެއް ފުއްދިފައިވާކަމަށް ދަނީ ބުނަމުންނެވެ. ނަމަވެސް ރާއްޖޭގެ ޞިއްޚީ ނިޒާމަށާއި، ތައުލީމީ ނިޒާމަށާއި، މަސްވެރިކަމާއި ދަނޑުވެރިކަމަށް ގެނެވުނު އެދެވޭ ބަދަލެއް ފެންނަނަމުން ނުދާކަމަށް ގިނަ ބަޔަކު ދަނީ ބުނަމުންނެވެ.
ގޭދޮށު މަސްފެކްޓްރީތަކާއި، އޮފްޝޯ ޕްލެޓްފޯމްތަކާއި، މަސްވެރިންނަށް ހަމައަގާއި ހަމައަށް އަދާއިހަމައަށްވެސް އުޅެނީ ނާދެވިގެންނެވެ. އެތަކެއް މުޒާހަރާއަކާއި، އަޑު އުފުލުމެއް މަސްވެރިން މިކަމަށްވެސް ވަނީ ހޭދަކޮށްފައެވެ. އެތައް ދޯންޏަކުން މިމުޒާހަރާތަކަށްވެސް އެތައް ތެލެއް ވަނީ އަންދާފައެވެ.
ސަރުކާރެއް އޮތުމުގެ އެންމެ ބޮޑު ބޭނުމަކީ ރައްޔިތުންގެ އަސާސީ، އުމްރާނީ، އިޤްތިޞާދީ، އަދި އިޖުތިމާއީ ދުޅަހެޔޮކަން ދެމެހެއްޓުމެވެ. އެކަން ސަރުކާރުން ބޭނުން ވެއްޖެނަމަ ކުޑަރަށެއް، ބޮޑު ރަށެއް، ކުޑަ އާބާދީއެއް، ބޮޑު އާބާދީއެއް ނެތި ކުރެވޭނެކަން ކޮމަންޑޫ ދާއިރާއަށް މިވީ 15 ވަރަކަށް ދުވަހަށް ބަލައިލުމުން ސާފުވެގެން ގޮސްފިއެވެ. ކޮންމެ ނިޔަތެއްގައި ކުރި ކަމުގައިވިޔަސް ސަރުކާރުން ކޮށްދޭން ބޭނުންވާނަމަ، ތަރައްޤީއަކީ އިސާހިތަކު ރައްޔިތުންނާއި ހަމައިގައި އޮތް އެއްޗެއްކަން މިވަނީ ހާމަވެފައެވެ.
އަންނަ މަހުގެ 5 ވަނަ ދުވަހު ކޮމަންޑޫ ދާއިރާގައި އޮތް ބައި އިލެކްޝަނަކީ އެދާއިރާއަށް ލިބިގެންދިޔަ ތަރައްޤީގެ އީދަކަށް ވަނީ ވެފައެވެ. ދައުލަތުގެ ވެރިންގެ އެންމެ މަގުބޫލު މަންޒިލަކަށްވެސް މިއަދު ވެފައިވަނީ ކޮމަންޑޫ ދާއިރާއެވެ. ވަޒީރުންނާއި، ކުންފުނިތަކުގެ ވެރިންނާއި، ބައެއް މަޖިލިސް ވެރިންގެވެސް އެންމެ އިސްވާޖިބަކަށް ވެފައިވަނީ އެދާއިރާއަކުން ކޮމަންޑޫ ދާއިރާއަށް ކޮންމެވެސް ކަމެއް ކޮށްދިނުމެވެ.
ކޮމަންޑޫ-މަތިކޮމަންޑޫގެ މަސައްކަތް ފެށި، މަހާޖައްރާފާއިއެކު މަސައްކަތް ދަނީ ބާރަށް ކުރެވެމުންނެވެ. ކޮމަންޑޫ ބަނދަރުގެ ބޭރު ތޮށީގައި ދޯނިފަހަރު އެޅޭނެ ގޮތް ހަދައި، އެ ރަށުގައި އައިސް ޕްލާންޓެއް ޤާއިމްކުރުމަށް ވަނީ ހަމަޖެހިފައެވެ. ހަމަ މިއާއިއެކު ކޮމަންޑޫ ކައިރީގައި އޮންނަ ރަށްތަކުގައި ޓޫރިޒަމް ފެށުމަށް 3 ރަށެއް ވަނީ ބިޑަށް ހުޅުވާލާފައެވެ.
ފޯކައިދޫގެ ޕޮލިސް ސްޓޭޝަނާއި ސިއްހީ މަރުކަޒުގެ މަސައްކަތް ފެށުމަށް ވަނީ ތައްޔާރުވެފައެވެ. އަދި ފޯކައިދޫ ޗަކަ ބިމަށް ވެލި އަޅައި، އެ ތަނުން ގޯތިދޫކުރުމުގެ މަސައްކަތްވެސް އަވަހަށް ފެށިގެންދާނެއެވެ. ހަމަމިއާއިއެކު މަރޮށީގެ ބަނދަރުގެ މަސައްކަތްވެސް ވަނީ ފެށިފައެވެ މިނޫނަސް އެ ދާއިރާއަށް ސަރުކާރުން ދަނީ ފުޓްސަލް ދަނޑު އެޅުމާއި، ބަށި ކޯޓާއި، ވޮލީކޯޓުތައްވެސް އަޅަމުންނެވެ.
ކޮމަންޑޫ ދާއިރާގެ ރައްޔިތުންނަށް މިއަދު ފެނިގެންދާ ކުއްލި އަދި އަވަސް ތަރައްޤީއަކީ އިންތިޚާބުގެ ބޭނުމުގައި ނަމަވެސް އެދާއިރާއަށް ލިބިގެންދާ ވަރަށް ބޮޑު ކުރިއެރުމެކެވެ. މިސަރުކާރަށް މިވީ ތިން އަހަރުގެ ތެރޭގައި ނުކުރެވި ފަހަތުފަޔަށް ބުރަވެފައިވާ އެތައްކަމެއް މިވަނީ ފެށިފައެވެ. ކޮމަންޑޫ ދާއިރާގެ ރައްޔިތުންނަށް މިވަނީ ތަރައްޤީގެ އީދެއްގެ މުޅިން އާބާބެއް ފެށިފައެވެ.
މިކަމުން ރާއްޖޭގެ އެކި ކަންކޮޅުތަކުގެ ރައްޔިތުންނަށް ސަރުކާރުން ދީފައިވާ މެސެޖަކީ ހަމަ ހަގީގަތުގައިވެސް ސަރުކާރުގެ އިޚްލާސްތެރިކަމެއް އޮވެއްޖެނަމަ، ތަރައްޤީއަކީ އިސާހިތަކު ގެނެވޭނެ އެއްޗެއްކަމެވެ. ނަމަވެސް އެޝައުގުވެރިކަން ސަރުކާރުގައި ނެތްނަމަ، ރައްޔިތުން ކިތަންމެ ދަތިހާލުގައި ތިބި ނަމަވެސް އެކަމަށް ބަދަލެއް ނާންނާނެކަން ވަނީ ހާމަވެފައެވެ.
ކޮމަންޑޫ ދާއިރާއަށް ސަރުކާރުން މިހުރިހާ ކަމެއް ކުއްލިއަކަށް މިކޮށްދެނީ ހަމަ ޔަގީނުންވެސް އިންތިޚާބު ކާމިޔާބު ކުރުމަށްކަން ހަމަބުއްދިން ވިސްނާލި ކޮންމެ މީހަކަށްވެސް ކަށަވަރު ވާނެއެވެ. މަޖިލީހުގެ ސާފު އައުލަބިއްޔަތު މިހާރުވެސް އޮތް އެމްޑީޕީއަށް މިގޮޑި ކާމިޔާބު ކުރުމަށް މުޅި ސަރުކާރު ހުއްޓިފައިވާއިރު، އިންތިޚާބުގައި ވާދަކުރާ އިދިކޮޅު ކެންޑިޑޭޓުންގެ ފަރާތުން ފެންނަ މަންޒަރުތަކުން މިއިންތިޚާބަކީ ސަރުކާރަށް ފިލާވަޅެއް ލިބިގެންދާނެ އިންތިޚާބަކަށް ވުމަކީވެސް އެކަށީގެންވާ ކަމެކެވެ.
