ކުރިއަށް އޮތް ކޮމަންޑޫ ދާއިރާގެ މަޖިލިސް އިންތިޚާބަކީ ކޮމަންޑޫ ދާއިރާގެ މަސްވެރިންނަށް ކުރިމަތިވާ ވަރަށް ބޮޑު އިމްތިޚާނެއް ކަމަށާއި، މަސްވެރިންނަށް މިސަރުކާރުން ޖެއްސި ހާލަތަށް މަސްވެރިން މިއިންތިޚާބުގައި ވޯޓުން ނަތީޖާ ދައްކަން ޖެހޭ ކަމުގައި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) ވިދާޅުވެއްޖެއެވެ.
އިދިކޮޅު ކޯލިޝަނުން މިރޭ އެޕާޓީގެ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން ޓޮމް ވިދާޅުވީ ކޮމަންޑޫ ދާއިރާގެ މަސްވެރިން މިއަދު ތިއްބެވީ ކޮން ހިސާބެއްގައިކަން އެމަސްވެރިންނަށް ސާފުވާނެކަމަށެވެ. ވެރިކަމަށް އައުމަށް ވައުދުވި އޮފްޝޯޕްލެޓް ފޯމްތަކާއި، ގޭދޮށު މަސްފެކްޓްރީތަކާއި، ބޭނި މަހަށް ފައިސާ ލިބޭ މިންވަރާއިމެދު މިއަދު ސުވާލު ކޮށްލަންޖެހޭކަމަށެވެ.
މިއަދު ސަރުކާރަކީ ދައުލަތުގެ ހުރިހާ ބާރެއް، ލިބި، މަޖިލީހުގެ 64 ގޮޑި އޮތް ބަޔަކަށް ވާއިރު އިތުރު ގޮޑިއެއް ލިބިގެން ސަރުކާރަށް ކުރާނެ އެއްވެސް ފައިދާއެއް ނުފެންނަ ކަމަށެވެ. އަދިމިއީ ސަރުކާރުން ރައްޔިތުންނާއި މެދު އަމަލު ކުރަމުންދާ ހިތްދަތި ގޮތްތަކަށް ވަރަށް ސާފުކޮށް، ސަރުކާރަށް މެެސެޖެއް ދޭންވީ އިންތިޚާބެއްކަމަށެވެ.
ކޮމަންޑޫދާއިރާއަކީ އަޚްލާގު ރަނގަޅު ރައްޔިތަކު ދިރިއުޅޭ ދާއިރާއަކަށްވާއިރު ކޮމަންޑޫ ދާއިރާގެ ވިސްނުންތެރި ރައްޔިތުން ޚާއްސަކޮށް މަސްވެރިން މިއިންތިޚާބުގައި ސަރުކާރަށް ހެޔޮވަރުގެ މެސެޖެއް ދޭން ތައްޔާރުވާންޖެހޭކަމަށް ޓޮމް ވިދާޅުވިއެވެ. ކޮންމެ އިންތިޚާބަކާއި ދިމާކޮށް މުޅި ދައުލަތް އެދާއިރާއަކަށް އަރައި ކުރަުންދާ ކަންތައްތަކަކީ އެއްވެސް ހެޔޮ ނިޔަތެއް ނެތި ކުރާ ކަންތައްތަކެއްކަން މާޒީއަށް ބަލައިލުމުން ސާފުވާނެކަމަށް ޓޮމް ވިދާޅުވިއެވެ.
މިވީ ތިން އަހަރު ކޮމަންޑު ދާއިރާގެ ރައްޔިތުން ތިބި ހާލަތާއިމެދު އެއްވެސް އޯގާތެރިކަމެއް ނެތް ސަރުކާރަކުން، ސަރުކާރުގެ އަމިއްލަ ބޭނުމަށް ކުރާ ކަންކަމުގެ ނަތީޖާ ރައްޔިތުން ސަރުކާރުން ދޭންޖެހޭކަމަށް ޓޮމް ވިދާޅުވިއެވެ. އޭނާ ވިދާޅުވީ މަޖިލީހަށް ހޮވަންޖެހޭނީ ގާބިލް ހަރުދަނާ، ތައުލީމީ ބޭފުޅުން ކަމަށްވާއިރު، އެފަދަ ބޭފުޅަކީ ފަތުހީ ކަމާއިމެދު އެދާއިރާގެ އެއްވެސް ރައްޔިތަކު ޝައްކު ނުކުރައްވާކަމަށެވެ.
