ކ.ގާފަރުގެ ރައްޔިތުންނަށް ދިމާވެފައިވާ ފެނުގެ މައްސަލައަށް ހައްލެއް ހޯދައިދ ދިނުމުގެ ގޮތުން، ސްޓެލްކޯއިން އެރަށުގެ ރައްޔިތުންނަށް ހިލޭ ފެން ފޯރުކޮށްދޭން ފަށައިފިއެވެ.
ސްޓެލްކޯއިން އެ ރަށުގައި ބަހައްޓާފައި ހުރި ފެން ޕްލާންޓުތަކުން ވަގުތީ ގޮތުން ފެން ދޫކުރަން ފަށާފައިވަނީ ހޫނު މޫސުމާ ދިމާކޮށް އެރަށް ފެނަށް ޖެހުމުންނެވެ. ސްޓެލްކޯއިން ވަނީ ގާފަރުގައި 15 ޓަނުގެ އާރުއޯ ދެ ޕްލާންޓް ބަހައްޓާފައެވެ.
ސްޓެލްކޯއިން ބުނީ ކ.ގާފަރުގައި ބަހައްޓާފައިވާ 15 ޓަނުގެ ދެ އާރުއޯ ޕްލާންޓުން އާންމު ބޭނުންތަކަށް ގާފަރު ރައްޔިތުންނަށް ފެން ދޫކުރުމަށް ފަށާފައިވާކަމަށެވެ. އެގޮތުން ގާފަރުގެ ކޮންމެ ރައްޔިތަކަށްވެސް ދުވާލަކު 20 ލީޓަރުގެ ފެން އާންމު ބޭނުންތަކަށް ހިލޭ ދޫކުރެވިގެންދާނެކަމަށް ސްޓެލްކޯއިން ބުންޏެވެ.
ކ. ގާފަރުގައި ބަހައްޓާފައިވާ 15 ޓަނުގެ ދެ RO ޕްލާންޓުން އާންމު ބޭނުންތަކަށް ގާފަރު ރައްޔިތުންނަށް ފެން ދޫކުރުމަށް މިއަދު ވަނީ ފަށާފައި. އެގޮތުން ގާފަރުގެ ކޮންމެ ރައްޔިތަކަށްވެސް ދުވާލަކު 20 ލީޓަރުގެ ފެން އާންމު ބޭނުންތަކަށް ހިލޭ ދޫކުރެވިގެންދާނެ. pic.twitter.com/vATe3aEBo2
— STELCO (@STELCOMALDIVES) January 16, 2022
ގަފަރު ކައުންސިލުން ބުނީ ކޮންމެ ހޫނު މޫސުމެއްގައިވެސް އެރަށް ފެނަށް ޖެހޭކަމަށެވެ. އެގޮތުން މިފަހަރުވެސް އެރަށް ފެނަށް ޖެހިފައިވާކަމަށާއި، ނަމަވެސް ސްޓެލްކޯއިން ފެން ޕްލާންޓުން ފެން ދޫކުރަން ފެށުމަކީ ރައްޔިތުންނަށް ލިބުނު ވަރަށް ބޮޑު ލުޔެއްކަމަށެވެ. މިއީ ވަގުތީ ހައްލެއްކަމަށާއި، އެރަށުގައި ކުރިއަށްދާ ފެނާ ނަރުދަމާ ނިޒާމް ޤާއިމްކުރުމުގެ މަޝްރޫޢު ނިމުމުން އެކަމަށް ދާއިމީ ހައްލެއް ލިބޭނެކަަމަށްވެސް ގާފަރު ކައުންސިލުން ބުންޏެވެ.
ސްޓެލްކޯއިން އެރަށުގެ ރައްޔިތުންނަށް ފެން ދޫކުރަނީ ގެތަކަށް އަދި ފެނުގެ ކަނެކްޝަން ގުޅާފައިނުވާތީ ފެން ޕްލާންޓް ބޭރުގައި ހަރުކޮށްފައިވާ އިސްކުރުންނެވެ. ސްޓެލްކޯއިން ވަނީ ކޮންމެ ދުވަހަކު ހަވީރު 4އިން 6ކަށް ޚިދުމަތް ދިނުމަށް ނިންމާފައެވެ.
