ކޮމަންޑޫ ދާއިރާގެ ބައި އިލެކްޝަނާއި ގުޅިގެން އެދާއިރާގެ ރައްޔިތުންނަށް ކޯވިޑް-19ގެ ބޫސްޓަރ ޑޯޒް ޖަހައިދިނުމަށް އެއްވެސް ޕާޓިއަކުން ވަޢުދުވިތޯ ރައްޔިތުންގެ މަޖިލީހުގެ ކުރީގެ ނާއިބު ރައީސް އަދި އެމްޑީޕީގެ ކުރީގެ ޗެއަރޕާސަން މޫސާ މަނިކު (ރިކޯ) ސުވާލުކުރައްވައިފިއެވެ.

އަންނަ މަހުގެ 5ގައި ބާއްވާ ކޮމަންޑޫ ދާއިރާގެ ބައި އިލެކްޝަންގައި ތިން ޕާޓިއަކުން ވާދަކުރާއިރު ވާދަވެރިކަން ވަނީ ވަރަށް ބޮޑަށް އިތުރުވެ ފޯރިގަދަވެފައެވެ. އިންތިޚާބުގައި ވާދަކުރަނީ ވެރިކަންކުރާ މައި ޕާޓީ އެމްޑީޕީގެ ފަރާތުން މުޙައްމަދު ރާޝިދާއި، އިދިކޮޅު ޕީޕީއެމް އިން މޫސާ ފަޠުހީ އާދަމާއި، އެމްއެންޕީން ޢަބްދުލްޙަންނާން އިދުރީސްއެވެ.

އިންތިޚާބާއި ދިމާކޮށް ކޮމަންޑޫ ދާއިރާގައި ގިނަ މަޝްރޫޢުތަކެއް ސަރުކާރުން ވަނީ ފަށާފައެވެ. މިކަމާއި ގުޅިގެން މިއީ އިންތިޚާބަށް ނުފޫޒް ފޯރުވުންކަމަށް ބައެއް ފަރާތްތަކުން ސިފަކުރެއެވެ.

މަޖިލީހުގެ ކުރީގެ ނާއިބު ރައީސް މޫސާ މަނިކު ވަނީ އިންތިޚާބުގެ ކުރިން އެދާއިރާގެ ހުރިހާ ރައްޔަތުންނަށް ވެކްސިން ދެޑޯޒާއެކު ބޫސްޓާ ޑޯޒް ޖަހާދޭން އެއްވެސް ޕާޓީ އަކުން ވަޢުދުވިތޯ ސުވާލުކުރައްވާފައެވެ.

ރާއްޖޭގަ ބާއްވާ އިންތިޚާބުތަކުގަ އާއްމުކޮށްދޭވެކްސިންތަކުގެ ވާހަކައެއްނޫން އަޅުގަނޑު ފާހަގަކުރީ ކޮވިޑް 19އާއި ގުޅިގެން ދުނިޔޭގަ ޖަހަމުންމިދާ ބާވަތުގެ ވެކްސިން ކަމުގާދަނަވަން !! އޮޅުންއެރި ފަރާތްތަކުގެ މައަލޫމާތަށްޓަކާ ސާފުކޮށްލަދިނީ.

– މޫސާ މަނިކު

ވޯޓުގެކުރިން ކޮމަންޑޫދާއިރާގެ ހުރިހާރައްޔަތުންނަށް ވެކްސިންދެޑޯޒާއެކު ބޫސްޓާ ޑޯޒް ޖަހާދޭން އެއްވެސް ޕާޓީ އަކުން ވައުދުވިބާ؟

— Moosa Maniku (Reeko) (@ReekoMoosa) January 17, 2022

ކޮމަންޑޫ ދާއިރާގެ އިންތިޚާބުގައި އެމްޑީޕީގެ ކެނޑިޑޭޓަށް ތާއީދު ހޯދަވައިދެއްވުމަށް ދައުލަތުގެ އިސްވެރިންނާއި ވަޒީރުންނާއި ކުންފުނިތަކުގެ ވެރިންނާއި މަޖިލިސް ގިނަ ޢަދަދެއްގެ އެމްޑީޕީ މެންބަރުން އަންނަނީ އެދާއިރާގައި ހަރަކާތްތެރިވަމުންނެވެ.