ކޮމަންޑު ދާއިރާގެ ބައި އިލެކްޝަނާއި ދިމާކޮށް، ފޯކައިދޫގެ ގިނަ އަދަދެއްގެ ޒުވާނުން ޕީޕީއެމްއާއި ގުޅިއްޖެއެވެ.
ކޮމަންޑޫ ދާއިރާގެ ބައި އިލެކްޝަންގައި އިދިކޮޅު ކެނޑިޑޭޓް މޫސާ ފަތުހީގެ ކެމްޕެއިން ލޯންޗު ކުރުމަށް މިރޭ ބޭއްވި ޖަލްސާގައި ގިނަ އަދަދެއްގެ ޒުވާނުން ވަނީ ޕީޕީއެމްއާއި ގުޅި މޫސާ ފަތުހީއަށް ތާއީދުއޮތްަން ހާމަކޮށްދީފައެވެ. ޒުވާނުންގެ ފޯމްތަކާއި ހަވާލުވެ ވަޑައިގެންނެވި ޕީޕީއެމްގެ ރައީސް އަބްދުﷲ ޔާމީންއެވެ.
މިޖަލްސާގައި ރައީސް ޔާމީން ވިދާޅުވީ ފޯކައިދޫ ޒުވާނުންނާއި ރާއްޖޭގެ ޒުވާނުންނަށް މިސަރުކާރުން އެއްވެސް ވަރަކަށް އަޅާނުލާކަން މިވީ ތިން އަހަރުން ހާމަވެފައިވާކަމަށެވެ. ފޯކައިދޫގައި ނިމިދިޔަ ސަރުކާރުން ގާއިމްކުރި ސްޕޯޓްސް އެރީނާ މިއަދު ވީރާނާ ވެގެންދާއިރު، އެކަމަށް އެއްވެސް އަޅާލުމެއް ނުބައްހައްވާކަމީ ޒުވާނުންގެ މަތީން މިސަރުކާރު ހަދާން ނައްތާލާފައިކާން ހާމަވާ ކަމެއްކަމަށެވެ.
ފޯކައިދޫ ޒުވާނުންނަކީ ރާއްޖޭގެ އެންމެ މޮޅަށް ފުޓުބޯޅަ ކުޅޭ ޒުވާނުން ތިބި ރަށަށްވާއިރު އެޒުވާނުންނަށް އެފުރުސަތު ބަންދުވުމަކީ ގަބޫލު ކުރެވޭނެ ކަމެއްނޫންކަމަށް ރައީސް ޔާމީން ވިދާޅުވިއެވެ. އެމަނިކުފާނު ވިދާޅުވީ ކޮމަންޑޫ ދާއިރާގެ ކޮންމެ ރަށަކުންވެސް އެމަނިކުފާނަށް ގިނަ ހުށަހެޅުންތަކެއް ލިބިފައިވާކަމަށެވެ. އެކަން ވަނީ މިސަރުކާރަށް ކަމެއް ނުކުރެވި އަންނަން އޮތް ސަރުކާރާއިމެދު ކުރެވޭ އުންމީދު ބޮޑުވުންކަމަށެވެ.
ރައީސް ޔާމީން ވަނީ ކޮމަންޑު ދާއިރާގެ ރައްޔިތުން އެދޭކަންކަން ހާސިލް ކޮށްދެއްވާނެކަމުގެ ޔަގީންކަން ދެއްވާފައެވެ. އަދި މި އިންތިޚާބުގައި ޒުވާނުންގެ ބައިވެރިވުމާއިއެކު ބޮޑު ތަފާތަކުން ފަތުހީއަށް މިއިންތިޚާބު ކާމިޔާބު ކޮށްދެއްވުމަށް ރައީސް ޔާމީން ވަނީ އެދިވަޑައިގެންފައެވެ.
