ސަރުކާރުން ކޮމަންޑޫ ދާއިރާގައި ހިންގާ އެއްވެސް މަޝްރޫޢުއަކަށް މޯލްޑިވްސް ނެޝަނަލް ޕާޓީ (އެމްއެންޕީ)އިން ހުރަސް އަޅަމުން ނުދާކަމަށް ވިދާޅުވެ އެޕާޓިގެ ރައީސް މުޙައްމަދު ނާޒިމް ރައްދު ދެއްވައިފިއެވެ. ނާޒިމް މިހެން ވިދާޅުވީ ކޮމަންޑޫއާއި މަތިކޮމަންޑޫ ގުޅާލުމަށް ހިންގާ މަޝްރޫޢު ހުއްޓުވުމަށް ބަޔަކު މަސައްކަތްކުރައްވާކަމަށް އިކޮނޮމިކް މިނިސްޓަރ ފައްޔާޟް އިސްމާޢީލް ތުހުމަތު ކުރެއްވުމާއި ގުޅިގެންނެވެ.
އަންނަ މަހުގެ ފަސް ވަނަ ދުވަހު ކޮމަންޑޫ ދާއިރާގެ ބައި އިލެކްޝަން ބޯމަތިވެފައިވަނިކޮށް، އެ ދާއިރާގައި ކުއްލިއަކަށް ގިނަ މަޝްރޫޢުތަކެއް ހިންގާ، ދެ ކޮމަންޑޫ ގުޅާލުމިގެ މަޝްރުއާއި އިތުރު މަޝްރޫޢުތަކެއްގެ އަމަލީ މަސައްކަތް ފަށާފައިވަނީ ބައެއް ފަރާތްތަކުން ވަނީ ފާޑުކިޔުން އަމާޒުކޮށްފައެވެ. މިއީ އިންތިޚާބަށް ނުފޫޒްފޯރުވުންކަމަށް ބައެއް ފަރާތްތަކުން ސިފަކުރެއެވެ.
ފައްޔާޟްގެ އެ ތުހުމަތުތަކާއި ގުޅިގެން ނާޒިމް ވިދާޅުވީ، ކޮމަންޑޫ ދާއިރާއަށް ސަރުކާރުން ކޮށްދޭ ކަންކަން ބާރަށް ކުރިއަށް ގެންގޮސް ނިންމާލުމަކީ އެޕާޓީން އެދޭ ގޮތްކަމަށެވެ. ކޮމަންޑޫ ދާއިރާއަށް އެމްއެންޕީން ވާދަކުރާ ޢަބްދުލް ހަންނާންގެ ހުޅުމާލެ ކެމްޕެއިން ޖަގަހަ ހުޅުވުމަށް ރޭ ހުލުމާލޭގައި ބޭއްވި ހަރަކާތުގައި ވާހަކަފުޅު ދައްކަވަމުން ނާޒިމް ވިދާޅުވީ، އެދާއިރާއަށް ސަރުކާރުން ވަޢުދުވެފައިވާ އެއަރޕޯޓް ވުޖޫދުވާން ބޭނުންފުޅުވާކަމަށެވެ. އަދި ސްލިޕްވޭ އަޅައިދިނުމާއި ޒުވާނުންނަށް ކޮށްދޭން ވިދާޅުވެފައި ހުރި ކަންކަން ކޮށްދޭން ބޭނުންވާކަމަށްވެސް ނާޒިމް ވިދާޅުވިއެވެ.
އަޅުގަނޑުމެން ބޭނުންވަނީ ވައުދު ފުއްދުމަށްޓަކައި އެތަންތަން ފުރާ މަންޒަރު ފެންނަން. އަޅުގަނޑުމެން އިރާދަކުރެއްވިއްޔާ ނުވާނަން އެއްވެސް ހުރަހަކަށް.
– އެމްއެންޕީގެ ރައީސް މުޙައްމަދު ނާޒިމް ވިދާޅުވިއެވެ.
އެމްއެންޕީން ބޭނުންވަނީ ކޮމަންޑޫ ދާއިރާގެ ރައްޔިތުން މިހާރު ތިބި ދަތި ހާލަތުން ފުދުންތެރި، ތަނަވަސް ހާލަތަކަށް ގެންގޮސްދިނުންކަމަށާއި، އެއީ އެޕާޓިގެވެސް ތަސައްވުރެއްކަމަށެވެ. ކޮމަންޑޫ ދާއިރާއަށް ނާޒިމް ހޮއްވަވައިދެއްވައިފިނަމަ، އެ ދާއިރާއަކީ ތަޢުލީމީ ފުދުންތެރި އަދި ފާގަތި ދާއިރާއަކަށް ހައްދަވައިދެއްވާނެކަމަށްވެސް ނާޒިމް ވިދާޅުވިއެވެ.
ންނަ މަހުގެ 5ގައި ކޮމަންޑޫ ދާއިރާގެ ބައި އިލެކްޝަން ބޭއްވުމަށް ނިންމާފައިވަނިކޮށް ސަރުކާރުން މި މަޝްރޫޢުތައް ކުއްލިއަކަށް ހިންގާތީ އިދިކޮޅުން އަންނަނީ ކަންބޮޑުވުން ފާޅުކުރަމުންނެވެ. މިއީ އިންތިޚާބަށް ނުފޫޒް ފޯރުވުންކަމަށް އެފަރާތްތަކުން ބުނެއެވެ. ނަމަވެސް ރައީސް އިބްރާހީމް މުޙައްމަދު ޞާލިޙް ވަނީ މިއީ އިންތިޚާބަށް ނުފުޒް ފޯރުވުންކަމަށް އިދކޮޅުން ބުނިނަމަވެސް މިއީ ބާރު ސްޕީޑުގައި ކޮންމެހެން ކުރަންޖެހޭ ކަމެއްކަމަށް ވިދާޅުވެފައެވެ.
