ބ.އަތޮލޫގައި އިތުރު ރިސޯޓެއް ނުހެދުމަށާއި، ފަޅުރަށްތަކާއި ފިނޮޅުތައް އަތޮޅު ކައުންސިލްގެ ބެލުމުގެ ދަށަށް ބަދަލުކުރުމަށް ގޮވާލާ އަތޮޅު ކައުންސިލުން ޤަރާރެއް ފާސްކޮށްފިއެވެ.
މި ޤާރަރުގައި އެއަތޮޅުގެ ގިނަ ރަށްތަކެއްގެ ކައުންސިލްތަކުގެ ރައީސުން ވަނީ ސޮއިކުރައްވާފައެވެ.
އަތޮޅު ކައުންސިލުން ފާސްކޮށް ނެރުނު ޤަރާރުގައި ވަނީ ބ. އަތޮޅުގައި މިހާރު ބޭނުންކުރަން ނުފަށާ ހުރި ފަޅުތަކާއި ފިނޮޅުތަކާއި އަދި ފަޅުރަށްތަކުގެ ޙާލަތު ދެނެގަތުމަށް ކުރެވުނު މަސައްކަތުން ގިނަ ކަންތައްތަކެއް ފާހަގަކުރެވިފައިވާކަމަށެވެ.
ޤަރާރުގައި ގޮވާލާފައިވާ މައިގަނޑު ކަންކަން:
1. ވަރުވާއަށް ދޫކުރެވިފައިވާ ބައެއް ރަށްރަށް ކުނި އަޅައި ފުރާލާފައިވާކަން.
2. ހުއްދަ ނުނަގައި ބައެއް ރިސޯޓްތަކުން ފިނޮޅުތައް ބޭނުންކޮށް މާލީ މަންފާ ހޯދަމުންދާކަން.
3. ރިސޯޓް ހަދަން ދޫކޮށްފައިވާ ބައެއް ރަށްރަށުގައި އެއްވެސް މަސައްކަތެއް ކޮށްފައިނުވާކަން.
4. ދަނޑުވެރިކަމަށް ދޫކޮށްފައިވާ ރަށްތައް އެންމެ އެކަށީގެންވާ ގޮތަށް ބޭނުންނުކުރާކަން.
މި ކަންކަމަށް ބަލައި އަތޮޅުގައި އެއްވެސް ރިސޯޓެއް އިތުރަށް ނުހެދުމަށާއި އިތުރަށް އެއްވެސް ރިސޯޓެއް ހަދާނަމަ ހަދަން ހުޅުވާލަންވާނީ ބ. އަތޮޅު ކައުންސިލްގެ އިޒުނައެއް ހޯދުމަށް ފަހުގައި ކަމަށާއި ބ. އަތޮޅުގައި
މިހާރު ފަރުވާއަށް ދޫކޮށްފައިވާ ރަށްތަކުގެ އެއްބަސްވުންތައް އަތޮޅު ކައުންސިލްގެ މައްޗަށް ބަދަލުކޮށްދިނުމަށް މި ޤަރާރުގައި ގޮވާލާފައިވެއެވެ.
Baa atoll biosphere reserve ge hingun atoll council ge belumuge dhashah badhalukoh baa atoll ge himaayai kurevifaivaa reethi kan vihkaigen libey aamdhanee akee seedhaa baa atoll council ah libey aamdhanee kamuga vaan vaane! Aee alhugadumenge visnun! https://t.co/8RiZ2RJH0G
— shaafiu19(Baabi) (@shaafiu19) January 14, 2022
އަދި އެ އަތޮޅުން ދަނޑުވެރިކަމަށް ދޫކޮށްފައިވާ ރަށްތައް މޮނިޓަރކުރެވޭނެ ދައުރެއް ބ. އަތޮޅު ކައުންސިލަށް ހަވާލުކުރުމަށާއި ބ. އަތޮޅު ރަށްރަށުގެ އިޚްތިޞާޞްގެ ތެރެއަށް ނުވަދެހުރި ހުރިހާ ފަޅުތަކާއި ފިނޮޅުތަކާއި އަދި ފަޅުރަށްތައް ބެލެހެއްޓުން ޙަވާލުކުރުމަށްވެސް ޤަރާރުގައި ގޮވާލާފައިވެއެވެ.
މީގެ އިތުރުން ޤަވާއިދާ ޚިލާފަށް ބޭނުންކޮށްފައިވާ ރަށްތަކާއިމެދު ފިޔަވަޅުއެޅުމަށާއި ބ. އަތޮޅު ބަޔޮސްފިޔާ ރިޒާވަކީ ބ. އަތޮޅު ކައުންސިލްގެ ދަށުން ހިނގާ ތަނެއްގެ ގޮތުގައި ހަމަޖެއްސުމަށް ސަރުކާރުގެ ކަމާބެހޭ އިދާރާތަކަށް ގޮވާލާކަމަށްވެސް އެ ޤަރާރުގައި ވަނީ ބަޔާންކޮށްފައެވެ.
މުޅި ބ. އަތޮޅުން އެކި ޓެކްސްތަކަށް އަހަރެއްގެ މައްޗަށް 557 މިލިއަން ރުފިޔާ ދައްކަ އެވެ. ނަމަވެސް އަތޮޅުގެ ގިނަ ރައްޔިތުން ތިބީ އަސާސީ ބޭނުންތަކުން މަހްރޫމްވެފައިކަމަށް އެއަތޮޅުގެ ބައެއް މީހުން ބުނެއެވެ.
