ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރަކީ އިންތިޚާބުތަކަށް އެކަނި، ފޮޅޭ މަލެއް ނޫންކަމަށާއި، ސަރުކާރުގެ ތަރައްޤީގެ މަސައްކަތް އިންތިޚާބެއް އައުމަކުން މަޑު ޖައްސާލައިގެން ތިބެވެން ނެތް ކަމުގައި އެމްޓީސީސީގެ ސީއީސޯ އާދަމް އާޒިމް ވިދާޅުވެއްޖެއެވެ.
ސަރުކާރުގެ ރާއްޖޭގެ އެކި ކަންކޮޅުތަކުގައި ކުރަމުންދާ ތަރައްޤީގެ މަޝްރޫއުތަކާއި ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން އާޒިމް ވިދާޅުވީ، ރާއްޖޭގެ ތާރީހުގައިވެސް މިހާތަނަށް ނުހިންގޭހާ ގިނަ މަޝްރޫއު މިސަރުކާރުން ހިންގަމުންދާ ކަމަށެވެ. މިސަރުކާރުން ވެރިކަމާއި ހަވާލުވިއިރު، އަސާސީ ހައްގުތަކުން ދިވެހި ރައްޔިތުން މަހުރޫމްވެފައިވާއިރު، އެކަން ކަށަވަރު ކޮށްދެއްވުމަށް މިވީ ތިން އަހަރު ކުރެވުނު މަސައްކަތުން އެތައް ރަށެއްގެ ރައްޔިތުންނަށް ހިތްހަމަޖެހުން ގެނުވާފައިވާކަމަށެވެ.
އެމްޓީސީސީން އެކަނިކުރި މަސައްކަތުން އަތޮޅު ތެރޭގެ އެތައް ރަށެއްގައި ރައްޔިތުންނަށް ބޭނުންވާ އެތައް މަސައްކަތެއް ކުރެވިފައިވާކަމަށް އާޒިމް ފާހަގަ ކުރެއްވިއެވެ. މިހާރުވެސް 35 ބަނދަރެއްގެ މަސައްކަތް ކުރެވޭއިރު، ޕެންޑަމިކްގެ ތެރޭގައި 25 ބަނދަރު ނިންމއި، އެއާޕޯޓެއްގެ މަސައްކަތް ނިންމާފައިވާކަމަށް އޭނާ ވިދާޅުވިއެވެ. އަދި މިހާރު 2 އެއާޕޯޓެއްގެ މަސައްކަތް ހިނގަމުންދާއިރު، އެތައްރަށެއްގައި ފެނައި ނަރުދަމާގެ ނިޒާމު ގާއިމް ކުރުމާއި މަގު ހެދުމުގެ މަސައްކަތް ކުރިއަށްދާކަމަށެވެ.
މިއަދުގެ ސަރުކާރަކީ ކޮންމެ ދުވަހަކުވެސް ރައްޔިތުންނަށް ޕްރޮޖެކްޓްސް ހިންގައިދީ ކޮންމެ ދުވަހަކުވެސް ޕްރޮޖެކްޓް ތަކުގައި ސޮއިކުރެވި، ކޮންމެ ދުވަހަކުވެސް، ޕްރޮޖެކްޓްތައް ނިންމަމުން އަރަމުން ރައްޔިތުންނަށް ހަވާލު ކުރަމުންދާ ސަރުކާރެއް. ކޮންމެ ދުވަހަކުވެސް މިސަރުކާރުގެ މާ ފޮޅޭނެ.
– އާޒިމް ވިދާޅުވިއެވެ.
ރާއްޖޭގައި މިއަދު ކުރެވިގެން މިދާ މަސައްކަތްތަކަކީ މީގެ އެތައް އަހަރެއް ވަންދެން ނުކުރެވި، އަޅާނުލައި ހުރި ކަންތައްތަކެއް ކަމަށް އާޒިމް ވިދާޅުވިއެވެ. ރައްޔިތުންނަށް ބޭނުންވާ ކަންކަން ފަހި ކުރުމަށް ސަރުކާރުން މިއަދު މަސައްކަތް ކުރަމުންދަނީ އެމަސައްކަތް ހަވާލު ކުރެވޭ ބަޔަކަށް، ފައިސާއާއި، ވަސީލަތް ދިނުމަށްފަހު ކަމަށާއި، މަސައްކަތެއް ކަނޑައެޅިފައިވާ ތާރީހަށް ނުނިމެއްޖެނަމަ އެކަމުގުގެ ޒިންމާ ނަގަންޖެހޭ ރައީސުލްޖުމްހޫރިއްޔާ ނުވަތަ ސަރުކާރުން ނޫނަކަމަށެވެ.
