ޔޫރަޕިއަން އިއްތިހާދު، އީޔޫގެ ޕާލަމެންޓުގެ ރައީސް ޑޭވިޑް ސަސޮލި ކޯވިޑް ބަލީގައި، އިޓަލީގެ ހޮސްޕިޓަލެއްގައި ފަރުވާ ދެމުން ދަނިކޮށް ނިޔާވެއްޖެއެވެ. އޭނާ ކޯވިޑަށް ޕޮޒިޓިވްވެ، ހޮސްޕިޓަލުގައި އެޑްމިޓް ކޮށްފައިވަނީ ފާއިތުވެދިޔަ ޑިސެމްބަރު މަހުއެވެ.
އިޓަލީގެ ރައްޔިތެއް ކަމުގައިވާ، އުމުރުން 65 އަހަރުގެ ސަސޮލި ކޯވިޑަށް ޕޮޒިޓިވްވެ، އޭނާގެ ދިފާއީ ނިޒާމު ރަގަޅަށް މަސައްކަތް ނުކުރުމުގެ ސަބަބުން ހޮސްޕިޓަލުގައި އެޑްމިޓް ކޮށްގެން ފަރުވާ ދެމުންދާތާ ދެ ހަފްތާއެއްހާ ދުވަސް ވަނީ ވެފައެވެ.
"ޑޭވިޑް ސަސޮލި ވަނީ ޖެނުއަރީމަހުގެ 11 ދުވަހުގެ ރޭގެ މެންދަމު 1:15ގައި، އިޓަލީގެ އެވިއާނީ ހޮސްޕިޓަލުގެ ސީއާރުއޯގައި ނިޔާވެފައި،" ސޮސަލީގެ ތަރުޖަމާން ރޮބާޓޯ ކުލޯ ޓުވީޓު ކުރައްވާފައި ވެއެވެ. "ޖަނާޒާ ބޭއްވިގެންދާނެ ތަނަކާއި ވަގުތެއް ކުރިޔަށް އޮތް ވަގުތުތަކުގައި އާންމު ކުރެވިގެން ދާނެ."
ސޮސަލީގެ ތަރުޖަމާން ރޮބާޓޯ ކުލޯ ފާއިތުވެދިޔަ ހޯމަ ދުވަހު ވިދާޅުވެފައިވަނީ، އޭނާ ފާއިތުވެދިޔަ ޑިސެމްބަރުމަހު 26 ވަނަ ދުވަހު އެޑްމިޓް ކުރެވިފައިވަނީ، "ދިފާއީ ނިޒާމު އެކަށީގެންވާ ގޮތުގައި މަސައްކަތް ނުކޮށްގެން ކުރިމަތިވި މައްސަލަތަކެއް ސަބަބުން،" ކަމުގައެވެ. އަދި ހޯމަދުވަހު އޭނާ ވަނީ ސޮސަލީގެ ރަސްމީ ކަންކަން ވަގުތީގޮތުން މެދު ކަނޑާލާފައިވާކަންވެސް އިއުލާން ކޮށްފައެވެ.
ކުރިން ޓީވީ ޚަބަރު ކިޔާ މީހެއްގެ ގޮތުގައި މަސައްކަތް ކޮށްފައިވާ، ސޮސަލީއަށްވަނީ ފާއިތުވި އަހަރުގެ ސެޕްޓެމްބަރުމަހު، ނިއުމޯނިއާގެ އާލާސްކަންފުޅުގައި، ހަފްތާތަކެއް ވަންދެން ހޮސްޕިޓަލުގައި އެޑްމިޓް ކޮށްގެން ފަރުވާ ދީފައެވެ.
ޔޫރަޕިއަން ޕާލަމެންޓަކީ ކޮންމެ 5 އަހަރަކުން އެއްފަހަރު އިންތިޚާބު ކުރެވޭ މަޖިލީހަކަށް ވިނަމަވެސް، ޕާލަމެންޓުގެ ރައީސްކަމުގެ މަގާމަކީ އޭގެ ދެބައި ކޮށްފަ އެއްބައިގެ މުއްދަތަށް އައްޔަން ކުރެވޭ މަގާމެކެވެ.
ސޮސަލީވަނީ މީގެ ކުރިން ވަނީ އޭނާ އަލުން އެމަގާމަށް އިންތިޚާބު ވުމަށް ކުރިމަތި ނުލައްވާނެކަމަށް ވިދާޅުވެފައެވެ.
30 އަހަރުގެ ދިގު މުއްދަތަކަށް ޖާރނަލިސްޓެއްގެ ގޮތުގައި މަސައްކަތް ކުރައްވާފައިވާ ސޮސަލީ އެންމެ ފުރަތަމަ މަސައްކަތް ކުރައްވަން ފައްޓަވާފައިވަނީ ނޫހެއްގައެވެ. އެއަށްފަހު ޓީވީގައި މަސައްކަތް ކުރައްވަން ފެއްޓެވުމަށްފަހު އޭނާ ވެގެން ދިޔައީ މުޅި އިޓަލީއަށް މަޝްހޫރު ޚަބަރު ކިޔާ މީހަކަށެވެ.
ސޮސަލީ ޔޫރަޕިއަން ޕާލަމެންޓުގެ މެމްބަރަކަށް ވެވަޑައިގަތީ 2009ވނަ އަހަރުއެވެ. އެއަށްފަހު ރައީސްކަމަށް ވަޑައިގަތީ 2019 ވަނަ އަހަރުއެވެ.
