މޯލްޑިވްސް ނެޝަނަލް ޕާޓީ (އެމްއެންޕީ)ގެ ފަރާތުން ކޮމަންޑޫ ދާއިރާގެ ރައްޔިތުންގެ މަޖިލިސް އިންތިހާބުގައި ވާދަކުރައްވާ ކެންޑިޑޭޓް ޢަބްދުލް ޙަންނާން އިދުރީސްގެ ކެމްޕޭން ޖަގަހަ އެ ދާއިރާގެ 3 ރަށުގައި ހުޅުވައިފިއެވެ.
އެގޮތުން އެމްއެންޕީގެ ކެންޑިޑޭޓް އަދި އެ ޕާޓީގެ ލީޑަރޝިޕް ކެމްޕޭންކުރުމަށް މިމަހުގެ 6 ވަނަ ދުވަހު ފެށި ދަތުރުގައި ޙަންނާންގެ ކެމްޕޭން ޖަގަހަ އެންމެ ފުރަތަމަ ހުޅުވާފައިވަނީ 7 ޖެނުއަރީގައި މަރޮށީގައެވެ. އަދި ހަމަ އެރޭ ޙަންނާންގެ ފޯކައިދޫ ކެމްޕޭން ޖަގަހަވެސް ވަނީ ހުޅުވާފައެވެ. އޭގެ އިތުރުން ރޭ ޙަންނާނުގެ ކޮމަންޑޫ ކެމްޕޭން ޖަގަހަވެސް ވަނީ ހުޅުވާފައެވެ. މިޖަގަހަތައް ހުޅުވުމާއެކު ކޮމަންޑޫ، ފޯކައިދޫ އަދި މަރޮށީގައި ކެމްޕޭން ހަރަކާތްތައް ކުރިޔަށް ވުރެ ބާރު ސްޕީޑްގައި ކުރެވިގެންދާނެކަމަށް އެމްއެންޕީން ބުންޏެވެ.
ރޭ ކޮމަންޑޫގައި ޙަންނާންގެ ކެމްޕޭން ޖަގަހަ ހުޅުވުމަށް ބޭއްވި ރަސްމިއްޔާތުގައި އެމްއެންޕީގެ ލީޑަރޝިޕުގެ އިތުރުން ޕާޓީގެ މެންބަރުންނާއި ޙަންނާނަށް ތާޢީދުކުރާ ދާއިރާގެ ގިނަ ރައްޔިތުން ވަނީ ބައިވެރިވެފައެވެ. މިރަސްމިއްޔާތުގައި ވާހަކަފުޅު ދައްކަވަމުން އެމްއެންޕީގެ ކެންޑިޑޭޓް ޙަންނާން ވިދާޅުވީ ދާއިރާގެ ރައްޔިތުން ހަވާލުކުރައްވަން ތައްޔާރުވަނީ ވަރަށް ބޮޑު މަސްޢޫލިއްޔަތެއް ކަމަށާއި، މިމަސައްކަތުގައި ކާމިޔާބު ހޯދައި، ރައްޔިތުންނަށް ދިމާވާ ހުރިހާ ކަންކަމުގައި ޕާޓީގެ ލީޑަރޝިޕާއެކު ރައްޔިތުންނަށް އެހީތެރިވުމުގައި ދެމިތިބޭނެ ކަމަށެވެ. އަދި މިމަސައްކަތް ބޮޑުތަނުން ކާމިޔާބުކުރާނެކަމަށްވެސް ހަންނާން ވިދާޅުވިއެވެ.
މި ރަސްމިއްޔާތުގައި އެމްއެންޕީގެ ރައީސް ކާނަލް (ރޓޑ) މުޙައްމަދު ނާޒިމް ވިދާޅުވީ ކޮމަންޑޫ ދަރިންގެ ޝުޢޫރަކީ ބޭރު ރަށްރަށުގެ މީހުން އައިސް ރަށުން ފޭބުމަށް ނުގޮވޭނެ ކަމަށެވެ. ޙަންނާނާ ބެހޭ ގޮތުން ވާހަކަފުޅު ދައްކަވަމުން ނާޒިމް ވިދާޅުވީ ޙަންނާނަކީ ތަޢުލީމީ، ހުނަރުވެރި ވަރަށް ޤާބިލު ބޭފުޅެއްކަމަށެވެ. އަދި އެދާއިރާގައި މީހުން ނުދެކޭވަރު، މީހުން ވަރަށް ގަދަރުކުރާ ބޭފުޅެއް ކަމަށެވެ. އަދި ޙަންނާނަކީ މީހުން ތަރުބިއްޔަތުކުރުމުގައި ނަމޫނާ ބޭފުޅެއް ކަމަށާއި، މިފަހަރު މިކުރެވުނު ދަތުރުގައި ރައްޔިތުންގެ ނިކަމެތިކަން ފެނުން ކަމަށާއި، މިފެންނަނީ ރައްޔިތުންނަށް ޙައްޤު މިންވަރު ނޫންކަމަށް ނާޒިމް ވިދާޅުވިއެވެ.
ރޭ ކޮމަންޑޫގައި ހުޅުވުނު ޖަގަހައާއެކު، ކުރިން ފޯކައިދޫ އަދި މަރޮށީގައި ހުޅުވުނު ޖަގަހަތަކުގެ އިތުރުން ހުޅުމާލޭގައިވެސް ޙަންނާންގެ ކެމްޕޭން ޖަގަހައެއް ހުޅުވުމަށް ދަނީ ތައްޔާރުވަމުންކަމަށް އެމްއެންޕީން ބުންޏެވެ.
