ކޮމަންޑޫ ދާއިރާގެ ބައި އިލެކްޝަންގައި އެންމެ ގިނަ ވޯޓާއެކު ހޮއްވަވައިދެއްވައިފިނަމަ އެންމެ މަސައްކަތްތެރި މެންބަރަކަށް ވާނެކަމުގެ ޔަޤީންކަން އެދާއިރާއަށް އެމްއެންޕީގެ ޓިކެޓްގައި ވާދަކުރައްވާ ޢަބްދުލް ޙަންނާން ވިދާޅުވެއްޖެއެވެ.
ކޮމަންޑޫ ދާއިރާއަށް އެމްއެންޕީގެ ޓިކެޓްގައި ވާދަކުރައްވާ ހަންނާންގެ ކެމްޕެއިން ފެށުމަށް ރޭ ކޮމަންޑޫގައި ބޭއްވި ޖަލްސާގައި ވާހަކަފުޅު ދައްކަވަމުން އޭނާ ވިދާޅުވީ، އެދާއިރާގައި ކުރަންޖެހޭ ވަރަށް ގިނަ މަސައްކަތްތަކެއް އެބަހުރިކަމަށެވެ. ނަމަވެސް އެކަންކަމަށް ސަރުކާރުން އަޅަނުލާކަމަށާއި، ނަމަވެސް އެންމެ ގިނަ ވޯޓާއެކު އެދާއިރާއަށް އިންތިޚާބުކޮށްދެއްވައިފިނަމަ އެންމެ މަސައްކަތްތެރި މެންބަރަށް ވާނެކަމަށް ހަންނާން ވިދާޅުވިއެވެ. ކޮމަންޑޫ ދާއިރާއަށް ހަންނާނުގެ އިތުރުން އެމްޑީޕީއާއި ޕީޕީއެމް އިންވެސް ވާދަކުރެއެވެ.
ހަންނާން ވިދާޅުވީ ތަޢުލީމީ ދާއިރާގައި ހިނަ ދުވަސްތަކެއް ވަންދެން ޚިދުމަތްކުރުމަށްފަހު ސިޔާސީ މަސްރަހަށް ނިކުންނެވުމުން ބައެއް ފަރާތްތަކުން ސުވާލު އުފައްދާކަމަށެވެ. ނަމަވެސް ބޭނުންވަނީ ޤައުމަށް ޚިދުމަތްކުރެއްވުމަށްކަމަށް، ތަޢުލީމީ ދާއިރާއަށް 30 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ހަންނާން ވިދާޅުވިއެވެ.
އަޅުގަނޑު މިއައީ މިކަން ވަރަށް ކުރާ ހިތުން ކުރަން. މި ތިން ރަށުގެ ރައްޔިތުންގެ ކަންބޮޑުވުންތައް ފިލުވައިދިނުމަށްޓަކައި ވަރަށް ކުރާ ހިތުން މަސައްކަތް ކުރަން މިއައީ. އަޅުގަނޑު މީގެ ކުރީގައި ވެސް މަސައްކަތް ކުރަމުން ދިޔައީ ސަރުކާރަށް ހިދުމަތް ކުރުމުގައޭ. މި އައީވެސް ޤައުމަށް ޚިދުމަތްކުރަންށޭ.
– ޢަބްދުލް ހަންނާން
އެމްއެންޕީގެ ކެންޑިޑޭޓް ޙަންނާނު އަދި ޕާޓީގެ ލީޑަރޝިޕް ބައިވެރިވެވަޑައިގަންނަވާ ކެމްޕޭން ޖަލްސާގެ ތެރެއިން #AaFikurakaaEku #Vote4Hannan pic.twitter.com/HKBx0r8wLf
— Maldives National Party (@MNP_Secretariat) January 6, 2022
ހަންނާން ވިދާޅުވީ ދާއިރާގެ ރަށްތަކުގައި ހުރި މައްސަލަތައް ހިފައިގެން މަޖިލީހުގެ ތެރެއިން ހައްލު ހޯދައި ދެއްވާނެކަމަށެވެ. އޭނާ ވަނީ ބައެއް މެންބަރުން މަޖިލީހުގައި އިޝްތިހާރުވާން އުޅުއްވާކަމަށްވެސް ތުހުމަތުކުރައްވާ ފާޑުވިދާޅުވެފައެވެ.
ކޮމަންޑޫ ދާއިރާގައި އެއަރޕޯޓެއް އެޅުމަށް ސަރުކާރުން ވަޢުދުވީނަމަވެސް، މިހާރު އެއީ އެރަށުގައި އޮތް މަޝްރޫޢުއެއް ނޫންކަން އެނގުމުން ރައްޔިތުން ތިބީ ވަރަށް މާޔޫސްކަމެއްގައިކަމަށްވެސް ހަންނާން ވިދާޅުވިއެވެ. ހަންނާން ވިދާޅުވީ ރަށްރަށުގައި މަސައްކަތްކުރެވޭނީ ސަރުކާރު މެންބަރުންނަށްކަމަށް ބުނިނަމަވެސް އެއީ ހަގީގަތެއް ނޫންކަމަށެވެ. ހަންނާން ވަނީ މަޖިލީހަށް އިންތިޚާބުކޮށްދެއްވައިފިނަމަ ތަފާތު ދައްކާނެކަމަށް ވިދާޅުވެފައެވެ.
ކޮމަންޑޫ ދާއިރާގެ އިންތިޚާބު އޮންނާނީ އަންނަ މަހުގެ 5ގައެވެ. އެދާއިރާއަށް އެމްއެންޕީގެ އިތުރުން އެމްޑީޕީއާއި ޕީޕީއެމް އިންވެސް ވާދަކުރެއެވެ.
