ކޮމަންޑޫ ދާއިރާގެ ކުރީގެ މެންބަރު މަރްހޫމް ޙުސައިން ވަހީދު އެ ދާއިރާއަށް ވަރަށް ގިނަ މަސައްކަތްތަކެއް ކުރުމަށް ފައްޓަވާދެއްވާފައިވާކަމަށާއި، ޙުސައިން ވަޙީދުގެ ވަޢުދުތައް މޯލްޑިވްސް ނެޝަނަލް ޕާޓީ (އެމްއެންޕީ)އިން ފުއްދައިދެއްވާނެކަމަށް އެޕާޓިގެ ރައީސް ކާނަލް (ރިޓަޔަރޑް) މުޙައްމަދު ނާޒިމް ވިދާޅުވެއްޖެއެވެ.

ކޮމަންޑޫ ދާއިރާއަށް އެމްއެންޕީގެ ޓިކެޓްގައި ވާދަކުރާ ޢަބްދުލް ޙަންނާނެގެ ކެމްޕެއިން ފެށުމުގެ ގޮތުން ކޮމަންޑޫގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ދަނގެތި ދާއިރާގެ މެންބަރުކަންވެސް ކުރައްވާ ނާޒިމް ވިދާޅުވީ، އެ ޕާޓީން އެންމެ އިސްކަމެއް ދޭނެ އެއްކަމަކީ ދާއިރާގެ ގިނަ ބައެއްގެ ލޯބިލިބިފައިވާ ކުރީގެ މެމްބަރު ހުސައިން ވަހީދުގެ ވައުދުތައް ފުއްދުމަށްކަމަށެވެ.

ކޮމަންޑޫ ދާއިރާގައި ހިމެނޭ ރަށްރަށަށް ކުރީގެ މެންބަރު ޙުސައިން ވަޙީދު ވަރަށް ގިނަ ކަންތައްތަކެއް ކޮށްދެއްވާ އަދި އިތުރު ވައުދުތަކެއްވެސް ވެވަޑައިގެންފައިވާ ކަމަށާއި، އެމްއެންޕީން އެކަން ފުއްދައި ދޭނެ ކަމަށް ނާޒިމް ވިދާޅުވިއެވެ.

އަޅުގަނޑުމެން ތިބޭފުޅުނަށް ދަންނަވާލަން އޮތީ އަލްމަރުހޫމް ހުސައިން ވަހީދު ވެވަޑައިގެންނެވި ހުރިހާ ވައުދުތަކެއް އަޅުގަނޑުމެންގެ ޕާޓީން ތިބޭފުޅުނަށް ފުއްދައިދޭނަމޭ.

– މުޙައްމަދު ނާޒިމް

ނާޒިމް ވިދާޅުވީ ޕާޓީގެ ފިކުރަށް ނުބަލައި އެންމެ ރަނގަޅު ކެންޑިޑޭޓަކު ހޮވަން ޖެހޭ ކަމަށާއި އެ ކެންޑިޑޭޓަކީ ހަންނާނު ކަމަށެވެ. ކޮމަންޑޫ ދާއިރާގެ އެ ބައި-އިލެކްޝަނަކީ އެ ޕާޓީ ޅަފަތުގައި އޮއްވާ ކުރިމަތިލާ ވަރަށް ބޮޑު އިމްތިހާނެއް ކަން ފާހަގަކުރައްވާ ނާޒިމް ވިދާޅުވީ، ބޮޑެތި ޕާޓީތަކާ ވާދައަށް ނުކުންނަ އިރުވެސް ތައުލީމީ ރަނގަޅު ކެންޑިޑޭޓަކު އެޕާޓީގެ ފަރާތުން ނެރެފައިވާކަމަށެވެ. އެންޕީ ވުޖޫދުވެގެން އައީ ފުދުންތެރިކަން ރައްޔިތުންނަށް ހޯދައިދިނުމަށް ކަމަށާއި އެ މަސައްކަތް އެމްއެންޕީން ކުރާނެ ނާޒިމް ވިދާޅުވިއެވެ.

ނާޒިމްގެ ވާހަކަފުޅުގައި ނުކިޔަވައި ތިބި މީހުން ރައްޔިތުންގެ މަޖިލީހަށް އިންތިހާބު ކުރުމުން ފެންނަ މަންޒަރުތައް މަޖިލީހުން ފެންނަކަމަށާއި، ނަމަވެސް  ތައުލީމީ ދާއިރާގައި 30 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ ހަންނާނު، ރައްޔިތުން އެދޭ ކަންކަން މަޖިލީހުގައި އިއްވާނެ ކަމުގެ ޔަޤީންކަން އެބައޮތްކަމަށެވެ.

ކޮމަންޑޫ ދާއިރާގެ ބައި އިލެކްޝަން އޮންނާނީ އަންނަމަހުގެ 5ގައެވެ. އެ ދާއިރާއަށް އެމްއެންޕީގެ އިތުރުން އެމްޑީޕީއާއި ޕީޕީއެމް އިންވެސް ވާދަކުރެއެވެ.