ކޯޓަށް ގޮސް އިންތިޚާބެއް ބާތިލްލުރާނަމަ، ބާތިލްކުރަން ކޯޓަށް ދިއުން އެންމެ އައުލާކަންބޮޑު އިންތިޚާބަކީ 2013ގެ ރިޔާސީ އިންތިޚާބު ކަމުގައި، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީނަށް ނާކާމިޔާބުވި 2018 ވަނަ އަހަރުގެ ރިޔާސީ އިންތިހާބު ބާތިލްކުރަން އިދިކޮޅު ފަރާތްތަކުން ކޯޓަށް ދާން އަނެއްކާވެސް ނިންމި ނިންމުމާއި ގުޅިގެން ވައްޑެ ވިދާޅުވީ ރިޔާސީ އިންތިޚާބުތަކުގެ ތެރެއިން ކޯޓަށް ގޮސް އިންތިޚާބު ބާތިލްކުރާނަމަ، ކޯޓަށް ދާންޖެހޭ އިންތިޚާބަކީ 2013ގެ ރިޔާސީ އިންތިޚާބު ކަމަށެވެ. އެތައް ފަހަރަކު އިންތިޚާބުގައި ވޯޓު ނަގަންޖެހުނު މިއިންތިޚާބަކީ ބާތިލްކުރުން މާ އައުލާކަންބޮޑު އިންތިޚާބެއްކަމަށް ވައްޑެ ވިދާޅުވިއެވެ.
2013 ގައި ފުލުހުންނާ ކޯޓުތައް ލައްވައި، އަތް ބާނުވައިގެން ތިންހަތަރު ބުރަށް ވޯޓު ނަގަންޖެހުނު އިންތިޚާބު ބާތިލުކުރަން ކޯޓަށް ދިޔުން މާއައުލާކަން ބޮޑު.
– ވައްޑެ ވިދާޅުވިއެވެ.
ޕީޕީއެމް/ޕީއެންސީގެ ވަކީލުން އިއްޔެ ބޭއްވި ނޫސްވެރިންގެ ބައްދަލުވުމެއްގައި ކުރީގެ ގާޒީ މުހައްމަދު ރާގިބު އަހުމަދު ވިދާޅުވީ ރިޔާސީ އިންތިހާބުގައި އޮޅުވާލުންތަކާއި ވޯޓު ބާތިލް ކުރެވޭނެ ގިނަ ކަންތައްތަކެއް ހުރުމުން އެ މައްސަލަތައް ކޯޓުތަކާއި އެންމެހާ މުއައްސަސާތަކަށް ހުށަހެޅުމުގެ މަސައްކަތް ފަށާފައިވާ ކަމަށެވެ. އަލަށް ތިލަވެފައިވާ މައްސަލަތަކާއި ލީކުވި ކަމަށް ބުނާ ބަޔާންތަކަށް ބަލާއިރު ވޯޓު ބާތިލު ކުރެވޭ ކަންކަން އެބަހުރި ކަމަށް ރާގިބު ވިދާޅުވިއެވެ.
ސެޕްޓެމްބަރު 2018 ގައި ބޭއްވި ރިޔާސީ އިންތިހާބު ބާތިލްކުރަން އިންތިހާބުގެ ނާކާމިޔާބީއާ އެކު ވެސް ޕީޕީއެމުން ހުށަހެޅިއެވެ. އެ މައްސަލާގައި ހުކުމް ކުރީ އިންތިހާބުގެ ނަތީޖާއަށް ބަދަލު އަންނަ ވަރުގެ އެއްވެސް މައްސަލައެއްގެ ހެއްކެއް ނެތް ކަމަށާއި އެހެންވެ އިންތިހާބު ބާތިލްކުރަން ނުޖެހޭ ކަމަށެވެ.
ޕީޕީއެމުން އަންނަނީ ރައީސް ޔާމީން ނާކާމިޔާބުވި ދުވަހުން ފެށިގެން ވެސް ވޯޓު އޮޅުވައިލި ކަމަށް ތުހުމަތު ކުރަމުންނެވެ. އެ ވާހަކަތައް އަލުން ދައްކަން ފެށީ އިދިކޮޅު ލީޑަރު ޖަލުން މިނިވަންވުމާއެކުގައެވެ. އީސީން ތަކުރާރުކޮށް ބުނަމުން ދަނީ އިންތިހާބުގައި އެއްވެސް އޮޅުވާލުމެއް ނެތް ކަމަށާއި އީސީ އަށް ތުހުމަތުކޮށް ދައްކާ ވާހަކަތަކުގައި އަސްލެއް ނެތް ކަމަށެވެ.
