ކޮމަންޑޫ ބައި އިލެކްޝަންގައި އެމްއެންޕީގެ ފަރާތުން ހަންނާނު ވާދަކުރުމުން ވާދަވެރި ކެނޑިޑޭޓުން އަދި ޕާޓީތަކުން ޖެހިލުންވެއްޖެ ކަމުގައި އެޕާޓީގެ ނައިބް ރައީސް އަބްދުﷲ ރިޔާޒު ވިދާޅުވެއްޖެއެވެ.
ރާއްޖޭގައި އެންމެ ފަހުން އުފެދުނު ސިޔާސީ ޕާޓީ ކަމުގައިވާ އެމްއެންޕީން، ކޮމަންޑޫ ދާއިރާއަށް ވާދަކުރަން ނިކުންނަނީ އެދައިރާއަށް އުފަން ގިނަ ޚިދުމަތްތަތަކެއް ކުރައްވާފައިވާ އަބްދުލް ހަންނާން އިދުރީސްއެވެ. އަބްދުލް ހަންނާން އިދުރީސަކީ ތައުލީމީ ދާއިރާއަށް ގިނަ ޚިދުމަތްތަކެއް ކުރައްވާފައިވާބޭފުޅެކެވެ.
ހަންނާނަށް ތާއީދު ހޯދުމަށް އެމްއެންޕީގެ ލީޑަރޑިޕުން ދަނީ ކޮމަންޑޫ ދާއިރާގައި ކެމްޕެއިން ކުރަމުންނެވެ. އެމްއެންޕީގެ ނައިބް ރައީސް އަބްދުﷲ ރިޔާޒު ވިދާޅުވީ ހަންނަކީ ތައުލީމީ ގާބިލް ފަސްބައި ސާފު ބޭފުޅަކަށް ވުމުން، ވާދަވެރިން އޭނާދެކެ ނުހަނު ޖެހިލުން ވާކަމަށެވެ. އެމްއެންޕީއަކީ ހަމައެކަނި އިންތިޚާބެއް އައުމުން ރަށްރަށަށް އަރައި ރައްޔިތުންގެ ހާލު ބަލާ ޕާޓީއެއް ނޫންކަމަށާއި، އަބަދުވެސް ރައްޔިތުންނާއި ގާތުން ޚިދުމަތް ކުރުމަށް މަސައްކަތް ކުރަމުންދާ ޕާޓީއެއްކަމަށެވެ.
ކޮމަންޑޫ ބައި އިލެކްޝަންގަ ހަންނާނު ވާދަކުރުމުން ވާދަވެރި ކެނޑިޑޭޓުން އަދި ޕާޓީތަކުން ޖެހިލުންވެއްޖެ. އެމްއެންޕީއަށް ރައްޔިތުން މުހިންމުވާނީ އިންތިޚާބެއް ބޯމަތިވުމަކުންނޫން. ރައްޔިތުންނާއި ގާތުން އަބަދުވެސް މަސައްކަތްކުރުމަކީ އެމްއެންޕީގެ އަމާޒް. ނަންބަރު 3 ހަންނާނަށް ވޯޓުދެއްވާ!
– ރިޔާޒު ވިދާޅުވިއެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާ ގުޅިގެންނެވެ. ހުސެއިން ވަހީދު މަޖިލީހުގައި ކޮމަންޑޫ ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
މިއިންތިޚާބުގައި ކެނޑިޑޭޓުންގެ މަންދޫބުންގެ ނަންތައް އިލެކްޝަންސަށް ހުށަހެޅުމުގެ މުއްދަތުވެސް ވަނީ ޖެނުއަރީ މަހުގެ 4 ވަނަ ދުވަހާއި ހަމައަށް ހުޅުވާލާފައެވެ. ނަންތައް ހުށަހަޅުއްވާއިރުވެސް ކޮންމެ ކެނޑިޑޭޓަކުންވެސް ވަގުތު އޮއްވައި ނަންތައް ހުށަހެޅުމަށް އިލެކްޝަންސް ކޮމިޝަނުން ވަނީ އިލްތިމާސްކޮށްފައެވެ.
މިއިންތިޚާބުގައި ވާދަކުރާ ތިން ކެނޑިޑޭޓުންވެސް އިންތިޚާބުތަކާއިބެހޭ ޤާނޫނާއި، ރައްޔިތުންގެ މަޖިލީހުގެ އިންތިޚާބުތަކާއި ބެހޭ ޤާނޫނަށް ފުރިހަމައަށް އަމަލު ކުރުމަށް ކޮމިޝަންގެ ރައީސްވަނީ އެދިވަޑައިގަންނަވާފައެވެ. އަދި މިއިންތިޚާބުގައިވެސް ކެނޑިޑޭޓުން ޚަރަދު ކުރާއިރު، ކޮންމެ ކެނޑިޑޭޓަކުވެސް އިންތިޚާބަށް ޚާއްސަ އެކައުންޓެއް ހުޅުވައި، ޤާނޫނުގައި ބުނެފައިވާ ގޮތަށް އަމަލު ކުރުމަށް ވަނީ ދަންނަވާފައެވެ.
