ކޮމަންޑޫ ދާއިރާއަށް ކުރިއެރުމާއި، ތަރައްޤީ ގެނެސްދިނީ މިވެރިކަން އައިފަހުން އެމްޑީޕީގެ ސަރުކާރުން ކަމުގައި އެދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓުން މުޙައްމަދު ރާޝިދު ވިދާޅުވެއްޖެއެވެ.
އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގެ ކެމްޕެއިން އަދި އެއްވެސް ޕާޓީއަކުން ރަސްމީކޮށް ނުފެށި ނަމަވެސް ކެނޑިޑޭޓުންނާއި، ޕާޓީތަކުން ގެންދަނީ އިންތިޚާބުގެ މަސައްކަތް ފަށާފައެވެ. މިއިންތިޚާބުގައި ވާދަކުރާ އެމްޑީޕީގެ ކެނޑިޑޭޓް ރާޝިދު ވިދާޅުވީ، ކޮމަންޑޫ ދާއިރާއަކީ އެތައް ޒަމާނެއް ވަންދެއް އަޅާނުލައި ދޫކޮށްލާފައި އޮތް ދާއިރާއެއްކަމަށެވެ.
ކޮމަންޑޫ ދާއިރާއަކީވެސް އޮތް ދާއިރާއެއްކަން ގަބޫލުކޮށް، ދާއިރާއަށް ތަރައްޤީއާއި ކުރިއެރުން ގެނެސްދެއްވަމުން ގެންދަނީ މިހާރު އޮތް އެމްޑީޕީ ސަރުކާރުން ކަމަށާއި، މިި އިންތިޚާބުގައި ކޮމަންޑޫ ދާއިރާގެ ރައްޔިތުން އެމްޑީޕީ ނޫޏް ޕާޓީއަކަށް ވޯޓު ނުދޭނެކަމީ ޔަގީންވާ ކަމެއްކަމަށް ރާޝިދު ވިދާޅުވިއެވެ.
އެތަކެއް ޒަމާނެއް ވަންދެން އަޅާނުލައި ދޫކޮށްލާފަ އޮތް ކޮމަންޑޫ ދާއިރާއަށް ދިރުން ގެނެސްދެއްވީ އެމްޑީޕީ ސަރުކާރުން. ވޯޓު ދޭނީ އެމްޑީޕީއަށް. ކާމިޔާބު އޮތީ އެމްޑީޕީއާއިއެކު.
– ރާޝިދު ކުރި ޓުވީޓުގައި ވިދާޅުވިއެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާގުޅިގެންނެވެ. ހުސެއިން ވަހީދު މަޖިލީހުގައި ކޮމަންޑޫ ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
ކޮމަންޑޫ ދާއިރާގެ ބައި-އިލެކްޝަންގައި ވާދަކުރާނެ ކަމަށް ޝައުގުވެރިކަން ފާޅުކޮށްފައިވާ ޕާޓީތަކަކީ އެމްޑީޕީއާއި، އިދިކޮޅު ޕީޕީއެމްގެ އިތުރުން، އެމްއެންޕީންނެވެ. މިއިންތިޚާބަކީ ވާދަވެރިކަން ބޮޑުވެގެންދާނެ އިންތިޚާބެއްކަމަށް ބެލެވެއެވެ.
މިއިންތިޚާބުގައި ވާދަކުރާ ތިން ކެނޑިޑޭޓުންވެސް އިންތިޚާބުތަކާއިބެހޭ ޤާނޫނާއި، ރައްޔިތުންގެ މަޖިލީހުގެ އިންތިޚާބުތަކާއި ބެހޭ ޤާނޫނަށް ފުރިހަމައަށް އަމަލު ކުރުމަށް ކޮމިޝަންގެ ރައީސްވަނީ އެދިވަޑައިގަންނަވާފައެވެ. އަދި މިއިންތިޚާބުގައިވެސް ކެނޑިޑޭޓުން ޚަރަދު ކުރާއިރު، ކޮންމެ ކެނޑިޑޭޓަކުވެސް އިންތިޚާބަށް ޚާއްސަ އެކައުންޓެއް ހުޅުވައި، ޤާނޫނުގައި ބުނެފައިވާ ގޮތަށް އަމަލު ކުރުމަށް ވަނީ ދަންނަވާފައެވެ.
