ޔޫކުރެއިންގެ މައްސަލާގައި އެމެރިކާއިން ރަޝިއާއި ދެކޮަޅަށް ދަތިކުރުމުގެ އިތުރު ފިޔަވަޅުތަކެއް އަޅައިފިނަމަ، ދެގައުމުގެ ދެމެދުގައި އޮތް ގުޅުންތައް އެކީ ކެނޑިގެންދާނޭ ކަމަށް ވިދާޅުވެ، ރަޝިއާގެ ރައީސް ލާޑީމިރު ޕުޓިން ޖޯ ބައިޑްންއަށް އިންޒާރު ދެއްވައިފިއެވެ.
ފާއިތުވެދިޔަ ހަފްތާގެ ބުރާސްފަތު ދުވަހު، ފޯނުން ދެގައުމުގެ ވެރިންގެ މެދުގައި ބޭއްވުނު ވާހަކަތަކުގައި، ޕުޓިން ބައިޑްންއަށް އިންޒާރު ދެއްވަމުން ވިދާޅުވެފައިވަނީ، މިފަދަ ދަތިރުކުރުމުގެ ފިޔަވަޅުތަކެއް އެޅުން ވެގެންދާނީ، "ހެދޭ ވަރަށްބޮޑު ގޯހަކަށް" ކަމުގައެވެ.
ރަޝިއާގެ ރައީސްގެ އެދިވަޑައިގަތުމަށް ބޭއްވިގެންދިޔަ މި މަޝްވަރާތަށް ގަޑިއެއް ހާއިރަށް ދިގުދެމިގެން ދިޔައިރު، މިއީ ދެގައުމުގެ ވެރިންގެ މެދުގައި ފާއިތުވެދިޔަ މަހެއްހާ ދުވަހުގެ ތެރޭގައި ބޭއްވިގެންދިޔަ މިފަދަ ދެވަނަ މަޝްވަރާ ބައްދަލުވުމެވެ.
މިއީ، ޔޫކުރެއިންގެ އިރުމަތީ ބޯޑަރު ކައިރީގައި އުފެދިފައިވާ ނުތަނަވަސްކަން ކުޑަކުރުމަށް އަމާޒުކުރެވިގެން އެންމެ ފަހުން ކުރެވިގެންދިޔަ މަސްކަތަށް ވާއިރު، ޔޫކްރެއިން އިން ބުނަމުންދަނީ، އެގައުމުގެ ބޯޑަރު ކައިރިއަށް ރަޝިއާގެ އެއް ލައްކައަށްވުރެ ގިނަ ސިފައިން ޖަމާ ކޮށްފައިވާ ކަމަށެވެ.
ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައިވަނީ އުފެދިގެން ގޮސްފައެވެ. އަދި އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ.
އެހެންނަމަވެސް ޔޫކްރެއިންއަށް ހަމަލާދިނުމަށް ރަޝިއާއިން ތައްޔާރުވަމުން ދާކަމަށް ކުރެވެމުންދާ ތުހުމަތުތައް އެގައުމުންވަނީ ދޮގު ކޮށްފައެވެ. އަދި ރަޝިއާއިން ބުނެފައިވަނީ، ޔޫކްރެއިން ބޯޑަރު ކައިރީގައި ކުރިޔަށްދަނީ އެގައުމުގެ އަސްކަރީ ތަމްރީންތައް ކަމަށާއި، އެގައުމުގެ ފަސްގަޑުގެ ކޮންމެ ހިސާބަކަށްވެސް ސިފައިން ޖަމާކުރުމުގެ ހައްގު އެގައުމަށް އޮތް ކަމުގައެވެ.
ދެގައުމުގެ ރައީސުންގެ މެދުގައި ބޭއްވުނު މިހާވަހަކަ ތަކުގައި، ދެ ރައީސުންވެސް އެއްބޭފުޅަކު އަނެއް ބޭފުޅަކަށް އިންޒާރު ދެއްވާފައިވާއިރު، މި ފޯން ކޯލަށްފަހު ކުޑަ ވަގުތުކޮޅެއްގެ ތެރޭގައި، ރަޝިއާގެ ފޮރިންގ ޕޮލިސީ އެޑްވައިޒަރ ޔޫރީ އުޝަކޯވް ރިޕޯޓަރުންނަށް ވިދާޅުވެފައިވަނީ، މިވާހަކަތަކާ ގުޅޭގޮތުން ޕުޓިން ހިތްޕުޅު ހަމަޖެހި ވަޑައިގަންނަވާ ކަމުގައެވެ. އޭނާ ވިދާޅުވި ގޮތުގައި މި ވާހަކަތަކުގެ ސަބަބުން މުސްތަގުބަލްގެ މަޝްވަރާތަކަށްވަނީ ދޮރު ހުޅުވިގެން ގޮސްފައެވެ.
މި ވާހަކަތަކާ ގުޅޭގޮތުން އެމެރިކާގެ ސީނިއަރ އޮފިޝަލަކު، ނަން ހާމަނުކުރުމަށް އެދި، ބައެއް މީޑިއާތަކަށް މައުލޫމާތު ދީފައިވާ ގޮތުގައި ވާހަކަތަކަކީ "ސީރިއަސް އަދި އުފެއްދުންތެރި" ވާހަކަތަކެކެވެ.
