ޕީޕަލްސް ނޭޝަނަލް ކޮންގްރެސް، ޕީއެންސީ އުފެއްދުމަށް އިލެކްޝަންސް ކޮމިޝަނަށް ހުޅުމުން، ފޯމް ހުށަހެޅި އެންމެންނަށް ވަކިވަކިން އިލެކްޝަންސް ކޮމިޝަނުން ގުޅިކަމުގައި ޕީޕީއެމްގެ ސެކެޓްރީ ޖެނެރަލް މުހައްމަދު ތޮލާލް ވިދާޅުވެއްޖެއެވެ.
ތޮލާލް މިފަދައިން ވިދާޅުވީ ހުރިހާ ސިޔާސީ ޕާޓީތަކުންވެސް މެންބަރުން ރެޖިސްޓްރީ ކުރުމުގެ ވަގު ފޯމު ހުށަހަޅާ ކަމަށާއި އެކަން ހުއްޓުވުމަށް އިލެކްޝަންސް ކޮމިޝަން(އީސީ)އަށް ކުރެވޭނެ ކަމެއް ނެތް ކަމަށް އީސީގެ ރައީސް ފުވާދު ތައުފީގް ވިދާޅުވެ ދެއްކެވި ވާހަތަކާއި ގުޅިގެންނެވެ.
އިލެކްޝަންސް ކޮމިޝަންގައިވެސް ކުރިން މަސައްކަތް ކުރެއްވި ތޮލާލް ވިދާޅުވީ އިދިކޮޅު ޕީއެންސީ އުފެއްދުމަށް އޭރު ކުރި މަސައްކަތުގައި އިލެކްޝަންސް ކޮމިޝަނުން ފޯމު ހުށަހެޅި ހުރިހާ މީހުންނަށް ވަކިވަކިން ގުޅިކަމަށެވެ. އަދި ނުގުޅޭ މީހުންނަށް ޕާޓީގައި ރަޖިސްޓްރީ ވުމުގެ ފުރުސަތުވެސް ދީފައި ނުވާކަމަށެވެ. ހުރިހާ ސިޔާސީ ޕާޓީތަކާއި މެދުވެސް އިލެކްޝަންސް ކޮމިޝަނުން މަސައްކަތް ކުރަންޖެހޭނީ ހަމަހަމަ އުސޫލަކުން ކަމަށާއި، ވަކި ބަޔަކަށް ވުމުން ވަކި ގޮތަކަށް އިލެކްޝަންސް ކޮމިޝަނުން އަމަލުކޮށްގެން ނުވާނެކަމަށް ތޮލާލް ވިދާޅުވިއެވެ.
ޕީއެންސީ ރަޖިސްޓްރީ ކުރަން ހުށަހެޅުމުން، ހުށަހެޅި ހުރިހާ ފޯމެއްގައި ތިބި އެންމެންނަށް އިލެކްޝަންސް ކޮމިޝަނުން ގުޅާ ވެރިފައިކުރި، ނުގުޅޭ މީހުން ރަޖިސްޓްރީގައި ނުހިމަނާ. މިއުސޫލު ހުރިހާ ޕާޓީއަކަށްވެސް އެޕްލައި ކުރައްވާ. ހަމަހަމަ ކަމާއިއެކު މަސައްކަތް ކުރައްވާނަމަ ވަގު ފޯމް ރަޖިސްޓްރީ ކުރުން މަދު ކުރެވޭނެ.
– ތޮލާލް ވިދާޅުވިއެވެ.
"ސަންގު ޓީވީ"ގެ ޕްރޮގްރާމެއްގައި ވާހަކަ ދައްކަވަމުން ފުވާދު ވިދާޅުވީ ޕާޓީ އުފައްދަން ހުށަހަޅާ ފޯމު ސެޓުތަކުގައި، ސައްހަ ނޫން ފޯމު އިންތިހާއަށް ގިނަ ކަމަަކަށެވެ. މި މައްސަލަ ހައްލުކުރުމަށް ޕާޓީތަކުގެ އިސްވެރީންނާއެކު މީގެ ކުރީން ވެސް މަޝްވަރާ ބައްދަލުވުންތަކެއް ބޭއްވި ކަމަށް ފުވާދު ވިދާޅުވިއެވެ.
މި ކަމުގައި ވަކި ޕާޓީއެއް އިސްތިސްނާވުމެއް ނެތް ކަން ފާހަގަކުރައްވައި ފުވާދު ވިދާޅުވީ ހުރިހާ ޕާޓީތަކަށް ވެސް މި މައްސަލަ ދިމާވެފައިވާ ކަމަށެވެ.
